UMTJHUMAYELI 8

₁Ngubani onjengohlakaniphileko na?

Ngubani owazi ihlathululo yezinto?

Ukuhlakanipha komuntu kukhanyisa ubuso,

kubuguqule ekubeni likhuni.

Bulunga umyalo wekosi

ngebanga lesithembiso esenziwe nguZimu.

₃Ungarhabi ukuphendula umbusi.

Tjhida phambi kwakhe

ngombana angenza nanyana yini ayithandako.

₄Ilizwi lekosi aliphikiswa.

Ngubani ongathi kiyo,

“Yintobani oyenzako le?”

₅Abahlakaniphileko bathi,

“Obulunga umyalo akazukwehlelwa ngokumbi

nengqondo yohlakaniphileko iyasazi isikhathi nesiqunto.

₆Kunesikhathi nekambiso efaneleko kiyo yoke into

nanyana isizi lomuntu liba budisi kuye.”

₇Kodwana akunamuntu owazi okuzakwenzeka!

Ngubani ongamtjela bonyana kuzakwenzeka njani?

₈Akunamuntu onamandla wokukhandela ummoya

begodu akakho onamandla phezu kwelanga lokufa.

Akunakutjhaphululwa ngesikhathi sepi

nomnono awubahlengi abaniniwo.

₉Koke lokhu ngakubona

lokha nangizinikela kikho koke okwenziwa

ngaphasi komthunzi welanga.

Kunesikhathi lapha umuntu aba negunya khona

phezu komunye umuntu ngokwenza okumbi.

₁₀Ngokunjalo ngabona abakhohlakeleko

batjhidela ethempelini, bangena,

kwathi labo abenze kuhle

kwafanela bona baphume endaweni ecwengileko

balitjalwe edorobheni.

Nalokho kulilize.

₁₁Ngebanga lokungakhutjhwa msinyana

kwesigwebo sobulelesi,

iinhliziyo zabantu zizala iimbozi

₁₂ngombana isikhohlakali singenza

ubelelesi kanenginengi,

khonapho siphile isikhathi eside.

Nami ngiyazi bona kuthiwa

kuzabakhambela kuhle abantu abesaba uZimu,

ngombana bayamhlonipha,

₁₃nokobana isikhohlakali angeze kwasikhambela kuhle

namalangaso angeze elulwa njengesithunzi

ngombana asihloniphi uZimu.

₁₄Kodwana ephasini kwenzeka nanti ilize:

Kunabantu abalungileko abehlelwa ngokufanele iinkhohlakali

neenkhohlakali ezehlelwa ngokufanele abalungileko.

Ngithi nalokho kulilize.

₁₅Nje-ke ngababaza ithabo

ngombana ayikho into engcono emuntwini

ngaphasi komthunzi welanga

ngaphandle kokugoma nokusela, ename.

Lokho kufanele kukhambisane naye

emtjhikatjhikenakhe emihleni yokuphila,

uZimu amuphe yona

ngaphasi komthunzi welanga.

₁₆Lokha nangizinikela kobana ngazi ukuhlakanipha

nokuyelela umsebenzi owenziwa ephasini,

okutjho bona amehlo womuntu

akabuboni ubuthongo ebusuku nemini,

₁₇nje-ke ngabona woke umsebenzi kaZimu:

Umuntu angeze azwisisa okwenziwa

ngaphasi komthunzi welanga.

Nanyana angajuluka kobana akufunyane

angeze azwisisa.

Ngitjho nanyana ohlakaniphileko asithi yena uyazi,

angeze akghona ukuzwisisa.