U-EKSODUSI 30

₁USomnini wathi kuMosi: “Yenza i-aldari lokutjhisela itjhwalo ngomuthi womtholo. ₂Alibe sikwere ngaphezulu okutjho isiquntu semitha ubude nesiquntu semitha ububanzi. Libe ngaphasi kwemitha ukuphakama, iimpundu zalo zilingane nalo. ₃Ulinameke ngegolidembala ngaphezulu nemahlangothini walo kanye neempundu zalo. Umphethwalo uwenze ngegolide. ₄Ulenzele amasongo wegolide abe ngaphasi komphetho walo. Kube masongo amabili ngehlangothini linye namabili ngehlangothini elifulatheleko. Azakuba ziimphatho zalo lapha kufakwa khona iingodo zokulithwala. ₅Ulungise iingodo zomuthi womtholo bese uzinameka ngegolide. ₆Beka i-aldarelo ngaphambi kwesiyaya sendawo ecwenge khulu, lapha kunomfaji wobufakazi khona. Ulibeke lapha ngizakuhlangana nawe khona okutjho ngaphambi kwesisibekelo somfaji esisibekela ubufakazi. ₇U-Aroni uzakutjhisela kilo amakha wetjhwalo njalo ekuseni ngesikhathi sokucima iimbani abe azilungise. ₈Godu awatjhise ngamarhwaqela lokha nakhanyisa iimbani. Umphristi omkhulu akatjhise amakha wetjhwalo imihla ngemihla phambi kwakaSomnini iinzukulwana ngeenzukulwana. ₉Ungenzeli kilo itjhwalo elingakacwengi, umhlabelo wokutjhiswa nomnikelo weenthoro. Ungalingi wenzele kilo umnikelo wokuselwako. ₁₀U-Aroni uzakuninda iimpundu zalo ngeengazi zomhlabelo wehlambululo kanye ngomnyaka. Qobe mnyaka uzakwenza ngaleyondlela itethelelo kilo. I-aldarelo licwenge khulu kuSomnini.”

₁₁USomnini wathi kuMosi: ₁₂“Lokha nawubala ama-Israyeli bona utlolise amadoda wepi, omunye nomunye wawo uzakuhlawulela ipilwakhe kuSomnini. Enze njalo ukuze kungabi namatshwenyeko phakathi kwawo lokha natloliswako. ₁₃Omunye nomunye otlolisweko uzakunikela ngalokhu: amagremu asithandathu wesiliva ukuya ngokwesilinganiso sendawo ecwengileko kube mnikelo kaSomnini. ₁₄Woke umuntu otlolisweko, ukusuka koneminyaka ematjhumi amabili ukuya phezulu uzakunikela umnikelo kaSomnini. ₁₅Lokha naninikela umnikelo kaSomnini ukuze nizenzele itethelelo, abanesabo banganikeli ngaphezu kwamagremu asithandathu nabadududu banganikeli ngaphasi kwamagremu asithandathu. ₁₆Uthathe isiliva yomnikelo wetethelelo kuma-Israyeli ibe ngeyomsebenzi wetende lokuhlanganela. Isiliva leyo izakuba sikhumbuzo sama-Israyeli phambi kwakaSomnini kobana nizenzele itethelelo.”

₁₇USomnini wathi kuMosi: ₁₈“Godu yenza isitja sekoporo sibe nesinzinziso sekoporo kube ngesokuhlambela. Usibeke hlangana netende lokuhlanganela ne-aldari lomhlabelo. Uthele amanzi ngaphakathi kwaso ₁₉ukuze u-Aroni namadodanakhe bahlambele khona izandla neenyawo zabo lapho. ₂₀Abahlambe lokha nabaya ngetendeni lokuhlanganela, namkha nabatjhidela e-aldarini kobana balotjhe nalokha nabatjhisela uSomnini umnikelo. Nakungasinjalo bazakufa. ₂₁Abahlambe izandla neenyawo zabo, nakungasinjalo bazakufa. Lokhu kuzakuba simiso sanini nanini kibo ngitjho nakuye kube ziinzukulwana ngeenzukulwana.”

₂₂USomnini godu wathi kuMosi: ₂₃“Zithathele iinthako eziphambili zalokhu: amakhilogremu asithandathu wemire emagiqana, isinamoni nomgaba okuzizinto ezinuka kamnandi, zibe makhilogremu amathathu ngayinye, ₂₄amakhilogremu asithandathu wegcolo lomuthi wekhasiya ukuya ngokwesilinganiso sendawo ecwengileko kanye namalitha asithandathu nesiquntu wamafutha we-oliva. ₂₅Uthathe koke lokhu wenze ngakho amafutha wokuzesa ahlukaniselweko kube mvango okhethekileko. Ulungise umvango lowo ube njengowomvangi weenhlahla. Uthathe amafutha wokuzesa ahlukaniselweko lawo, ₂₆uzese ngawo itende lokuhlanganela, umfaji wobufakazi, ₂₇itafula nezitja zakhona zoke, ilithi leembani nezitja zakhona, i-aldari letjhwalo, ₂₈i-aldari lomhlabelo wokutjhiswa nazo zoke izitja zakhona kanye nesitja sokuhlambela nesinzinziso sakhona ₂₉ukuze kube ngokucwengileko. Iye, kuzakuba ngokucwenge khulu kangangobana nanyana yini ekuthintako izakucwenga.

₃₀“Uzese u-Aroni namadodanakhe, ubahlukanisele ukuze babe baphristi bami. ₃₁Bese uthi kuma-Israyeli, ‘Lokhu kuzakuba mafutha akhethekileko wokuzesa kibo boke abaphristi bangomuso. ₃₂Ningazesi nanyana ngubani, godu ningenzi amanye afana nawo ngeenthako. Amafutha la akhethekile, nakini akabe ngakhethekileko. ₃₃Nanyana ngubani ozenzela wakhe afana nawo namkha azese ngawo nanyana ngubani ongakahlukaniselwa, uzakujutjwa ebantwini bekhabo.’ ”

₃₄USomnini godu wathi kuMosi: “Zithathele iinthako ezilinganako zamakha alandelako: uburegu bomuthi webhalisamu, inovu enuka kamnandi ye-onikha neyegalibhanumu kanye noburegu obutsengileko bomuthi welebhona. ₃₅Ngeenthakwezo wenze itjhwalo libe inga lenziwe muvangi weenhlahla. Ulinunge ngetswayi elihlanzekileko nelikhethekileko. ₃₆Ukghadlhe ingcenye yazo zibe ziinquqwana bese uzibeka ngaphambi kobufakazi ngetendeni lokuhlanganela lapha ngizakuhlangana nawe khona. Itjhwalweli lizakuba ngelikhetheke khulu kini. ₃₇Itjhwalo enizolenza ukuya ngeenthako zalo ningazenzeli nina. Ngakini lizakuba ngelikhethekileko kuSomnini. ₃₈Nanyana ngubani owenza elifana nalo kobana alisebenzise njengamakha wakhe uzakujutjwa ebantwini bekhabo.”