Amatshwenyeko weenrhwarhwa
1Yeke uSomnini wathi kuMosi: “Khamba uye kuFaro uthi kuye, ‘Nakhu okutjhiwo nguSomnini: Tjhaphulula abantu bami ukuze bangilotjhe. 2Nawala ukubatjhaphulula, ngizakwehlisela inarhakho yoke ngeenrhwarhwa. 3INayili izakuzala swi ngeenrhwarhwa. Zizakukhuphuka zipharumele ngesigodlweni sakho, zingene ngelawini lakho zimumele umbhedakho, zingene ngeenkumbeni zeenkhulu zakho nebantwini bakho, zizale nangema-ondweni nangezitjeni zakho zokudubela. 4Iinrhwarhwa zizakunamathela wena nabantu bakho kanye neenkhulu zakho zoke.’ ”
5Yeke uSomnini wathi kuMosi: “Tjela u-Aroni elulele isandla sakhe ngedondolo lakhe ngehla kwemilambo yeGibhide okutjho imilanjana yeNayili nemisele bese kuvele iinrhwarhwa zembathe inarha yeGibhide.”
6Nje-ke u-Aroni welulela isandla sakhe ngehla kwamanzi weGibhide. Kwavela iinrhwarhwa zembatha inarha. 7Abosomlingo benza soneso ngemilingwabo. Nabo benza bonyana kube neenrhwarhwa enarheni yeGibhide.
8Yeke uFaro wabiza uMosi no-Aroni wathi kibo: “Ncengani uSomnini bonyana asuse iinrhwarhwakazezi kimapha nebantwini bami, ngizakutjhaphulula ama-Israyeli bonyana ayokuhlabela uSomnini.”
9UMosi wathi kuFaro: “Kukuwe ukubeka isikhathi kobana ngikuncengele neenkhulu zakho kanye nabantu bakho bonyana iinrhwarhwa zinigadunge ngaphandle kwalezo eziphila eNayili.”
10UFaro wathi: “Kusasa okusakokhu!”
UMosi wathi: “Kuzakuba njengokutjho kwakho ukuze wazi bonyana akakho ofana noSomnini uZimethu. 11Iinrhwarhwa zizakusuka kuwe, esigodlweni sakho, eenkhulwini nebantwini bakho. Zizakuba seNayili kwaphela.”
12Ngemva kobana uMosi no-Aroni basukile kuFaro, uMosi wathandaza kuSomnini malungana neenrhwarhwa azehlisele kuFaro. 13USomnini wenza njengokwesibawo sakaMosi. Iinrhwarhwa ebegade zingeenkumbeni, ngeenrhodlweni nemasimini zafa. 14Zabuthelelwa zaba maqubi. Inarha yoke yazala isivunda. 15Kodwana uFaro nabona bonyana sele kubetha ummoya, wakhunyalalisa ihliziywakhe, azange alalele uMosi no-Aroni. Kwaba njengokutjho kwakaSomnini.
Amatshwenyeko wemiyani
16USomnini wathi kuMosi: “Tjela u-Aroni bonyana aphakamise idondolo lakhe bese ubetha ithuli lehlabathi. Enarheni yoke yeGibhide ithuli lizakuphenduka imiyani.”
17Bakwenza-ke lokho. Kwathi lokha u-Aroni nakelula isandla sakhe esiphethe idondolo wabetha ithuli lehlabathi, kwavela imiyani yadumela abantu neenlwana. Loke ithuli enarheni yoke yeGibhide laphenduka imiyani. 18Abosomlingo balinga ukuveza imiyani ngemilingwabo, kodwana babhalelwa. Ngokubona bonyana imiyani inamathele abantu neenlwana, 19abosomlingo bathi kuFaro: “Lesi sisandla sakaZimu!” Kodwana ihliziyo kaFaro gade iqinile begodu azange alalele. Kwaba njengokutjho kwakaSomnini.
Amatshwenyeko weembawu
20Yeke uSomnini wathi kuMosi: “Vuka ekuseni ulindele uFaro lokha naya emlanjeni bese uthi kuye, ‘Nakhu okutjhiwo nguSomnini: Tjhaphulula abantu bami ukuze bangilotjhe. 21Nakungasinjalo, ngizokuthumela iwoma leembawu phezu kwakho neenkhulu zakho, phezu kwabantu bakho ngitjho nangesigodlweni sakho. Iinkumba zamaGibhide zizokuzala ngeembawu ngitjho nemasiminawo.
22“ ‘Kodwana mhlokho ngizokusebenza ngokwahlukileko enarheni yeGotjheni lapha kuhlala khona abantu bami. Angeze kwaba khona iimbawu lapho ukuze nazi bonyana mina Somnini ngisenarheni le. 23Ngizakwenza umahluko phakathi kwabantu bami nebakho. Isibonakaliswesi sizokwenzeka kusasa.’ ”
24Ngambala uSomnini wakwenza lokho. Kwavela iwoma elimabhombo leembawu lamumela isigodlo sakaFaro langena ngeenkumbeni zeenkhulu zakhe. Iimbawezo zabanga umonakalo esifundeni samaGibhide.
25UFaro wabiza uMosi no-Aroni wathi kibo: “Khambani niyokuhlabela uZimenu khona enarhenapha.”
26Kodwana uMosi wathi: “Angeze kwalunga lokho. Imihlabelo esiyinikela uSomnini uZimethu izakuba sikghabhudlho emaGibhideni. Nje-ke nasenza imihlabelo ewakghabhudlhako azasikhanda ngamatje! 27Kumele sikhambe ikhambo lamalanga amathathu erhalawumbeni kobana sihlabele uSomnini uZimethu njengombana asiyala.”
28UFaro wathi: “Awa yeke, mina ngiyanitjhaphulula bonyana nihlabele uSomnini uZimenu erhalawumbeni, kodwana ningayi kude. Yeningithandazeleni-ke.”
29UMosi wathi: “Ngizakuthi bona ngisuke lapha, ngithandaze kuSomnini, kuzakuthi kusasa iimbawu zisuke kuFaro neenkhulwini zakhe kanye nebantwini. Kodwana uFaro aqinisekise bonyana akenzi ubuqili godu ngokwalela abantu bonyana bayokuhlabela uSomnini.”
30UMosi wasuka kuFaro, wafese wathandaza kuSomnini. 31USomnini wenza njengokwesibawo sakaMosi: Iimbawu zasuka kuFaro neenkhulwini nebantwini bakhe. Azange kusale ngitjho nasinye. 32Kodwana nagadesi uFaro wakhunyalalisa ihliziyo, azange atjhaphulule ama-Israyeli.
