UGENESISI 10

₁Naku-ke umlando kaTjhemu, uRhamu noJafethi, amadodana kaNowa: Babelethelwa abantwana emva komthwalela.

₂Iinzukulwana zakaJafethi bekunguGomere, uMagogi, uMadayi, uJavani, uTubali, uMetjheki noTirasi. ₃Iinzukulwana zakaGomere bekungu-Atjhikenazi, uRifathi noTogarima. ₄Iinzukulwana zakaJavani bekungu-Elitjha, uTaratjhitjhi, amaKithi namaDodani. ₅Kilabo kwavela abantu abahlala ngokusabalala eduze kwelwandle bonyana kuthi ngemva kwesikhathi ikoro enye nenye yabantwabo ikhulume ilimi layo enarhenayo.

₆Iinzukulwana zakaRhamu bekunguKutjhe, uGibhide, uPhuthi noKanana. ₇Iinzukulwana zakaKutjhe bekunguSeba, uRhavila, uSabeta, uRama noSabiteka. Iinzukulwana zakaRama kunguTjheba noDedani. ₈UKutjhe godu wabeletha uNimrodi owaba yindlhondlho yokuthoma ephasini. ₉Gade amuzumi onamandla nowaziwako, kungebangelo kuthiwa: “NjengoNimrodi umzumi onamandla khulu.” ₁₀Ikaba yombuswakhe beyiseBhabheli, e-Ereke, e-Akadi neKaline enarheni yeTjhinari. ₁₁Ukusukela lapho umbuswakhe wanabela e-Asiriya, lapha akha khona iNiniva, iRerhobhothi, i-Iri neKalarha ₁₂kanye neReseni, idorobho elikhulu phakathi kweNiniva neKalarha.

₁₃UGibhide gade anguyise wamaLudi, ama-Anamu, amaLehabi, amaNafiturhi, ₁₄amaPatrusi, amaKasilurhi (lapha amaFilista avela khona) namaKafitori. ₁₅UKanana wabeletha uTsidoni izibulo lakhe walanywa nguRhethi, ₁₆godu waba nguyise wamaJebusi, ama-Amori, amaGirigatjhi, ₁₇amaRhivi, ama-Ariki, amaSini, ₁₈ama-Arivadi, amaTsemari namaRhamathi.

Emva kwalokho iinkoro zamaKanana zasabalala. ₁₉Imikhawulo yamaKanana yanaba ukusuka eTsidoni ukufika eGerari ngitjho nakude ukuya eGaza. Ukusuka lapho beyinabela eSodoma, eGomora, e-Adama, eTseboyimu ukuyokubetha eLatjha.

₂₀Lezo bekuziinzukulwana zakaRhamu ngokuya ngezizwe neenkoro zazo namalimazo eenarheni zazo.

₂₁UTjhemu ongumnakwabo lakaJafethi, naye wabelethelwa amadodana. Yena ungukhokho wazo zoke iinzukulwana zaka-Ebhere. ₂₂Amadodana kaTjhemu bekungu-Elamu, u-Atjhuri u-Aripakitjhadi, uLudi, no-Aramu. ₂₃Amadodana ka-Aramu bekungu-Utsi, uRhuli, uGeteri noMatjhi. ₂₄U-Aripakitjhadi wabeletha uTjhelarhi. UTjhelarhi wabeletha u-Ebhere. ₂₅U-Ebhere wabeletha amadodana amabili, enye beyibizwa bona nguPelegi ngombana ngeenkhathi zakhe izizwe zephasi bezihlukene. Umnakwabo gade abizwa bona nguJokhithani. ₂₆UJokhithani wabeletha u-Almodadi, uTjhelefi, uRhatsarimavethi, uJerarhi, ₂₇uHadoramu, u-Uzali, uDikhila, ₂₈u-Obhali, u-Abimayeli, uTjheba, ₂₉u-Ofira, uRhavila noJobabi. Boke labo bekumadodana kaJokhithani. ₃₀Isifunda agade ahlala kiso besinabe ukusuka eMetjha ukuya eSefari eentabeni zepumalanga.

₃₁Lezo bekuziinzukulwana zakaTjhemu ngokuya ngezizwe neenkoro zazo namalimazo eenarheni zazo.

₃₂Lezo-ke bekuziinkoro ezadabuka emadodaneni kaNowa ngokuya ngokulandelana kwazo ezizweni zazo. Ukusukela kilezonkoro, izizwe zasabalala nephasi loke emva komthwalela.