U-ISAYA 11

₁Nanyana kunjalo ihlumela lizakuvela esidindini sakaJese

iye, liqumbe lirarhe emirajenakhe.

₂UMoya kaSomnini uzakuba phezu kwalo,

uMoya wokuhlakanipha nokuzwisisa,

uMoya wokweluleka namandla,

uMoya wokwazi nowokwesaba uSomnini.

₃Indlela elithatha ngayo izinto

izakunzinza ekwesabeni uSomnini.

Alizukugweba ngokubona kwalo

namkha liqunte ngezwabethi.

₄Iye, lizakugweba abadududu ngokulunga,

kwabasweleko bephasi liqinte ngokulinganako.

Lizakurhadla iphasi ngentonga yeembhena zalo;

ngomphefumulo womlomalo libhubhise iinkhohlakali.

₅Ukulunga kuzakuba libhande ephangweni lalo,

iqiniso libe sithukulo edinini lalo.

₆Ipisi izakuphila nemvana,

ingwe ilale ndawonye nembuzi;

ikonyana, ibhubezana

nesilwana esinonisiweko kuzakuba ndawonye

kweluswe msanyana.

₇Ithole lizakudla mrhula munye nebhere,

amakonyana wakhona alale ndawonye,

ibhubezi lidle utjani njengekomo.

₈Isana lizakuthakasa hlanu komgodi webululu

nomntwana omncani afake isandla sakhe

ngemgodini wembedla.

₉Akakho ozakuba nokulimaza

namkha abange umonakalo

entabenami ecwengileko

ngombana iphasi lizakuzala ilwazi lakaSomnini

njengamanzi asibekele ilwandle.

₁₀Mhlokho umrabhu kaJese uzakujama njengephawu ebantwini;

izizwe ziwuhlulukele nekhaya lawo libe lidumo.

₁₁Mhlokho uSomandla uzakwelula isandla sakhe kwesibili

ukuhlenga imisalela yabantu bakhe abaseleko,

abasuse e-Asiriya, eGibhide, ePatrosi, eKutjhe,

e-Elamu, eTjhinari, eRhamathi neenhlengeleni zelwandle.

₁₂Uzakuphakamisela izizwe iphawu,

abuthelele abahlakazekileko bakwa-Israyeli;

abuthe abaphadlhaleleko bakwaJuda

kusukela emagumbini womane wephasi.

₁₃Umona ka-Efrayimu uzakunyelela

nezitha zakaJuda zipheliswe.

Iye, u-Efrayimu angekhe asaba nomona ngoJuda

noJuda angasabi sisitha saka-Efrayimu.

₁₄Boke njalo bazakudoyela

emehlelweni wemibundu yamaFilista ngetjingalanga,

bazakuphanga ipahla yabantu bepumalanga.

Bazakulawula i-Edomu neMowabi, ama-Amoni abakhonze.

₁₅USomnini uzakubhubhisa ilwandlana leGibhide;

akhombe iYufrathe ngesandla sakhe,

ngommoya onamandla ayirhadle,

ibe milanjana elikhomba

ukuze umuntu akwazi ukweyama khona ngamapatlagwana.

₁₆Kuzabakhona indlela evulekileko

yemisalela yabantu bakhe.

Kilabo abasele e-Asiriya,

kuzakuba njengamhlana ama-Israyeli

aphuma enarheni yeGibhide.