U-ISAYA 18

₁Izazizwa inarha enemikhumbi eneenseyila

ngaphetjheya kwemilambo yeKutjhe,

₂ithumele abazenda ngeNayili

ngeenthayamanzi zephaphirasi emanzini!

Khambani nina nthunywa ezinebelo,

niye esizweni eside nesibutjhelelezi,

ebantwini abesatjwa eduze nakude,

isizwe esinamandla nesitshidlhako,

esinenarha esezelwa milambo.

₃Noke nina zakhamuzi zelizwe,

nina enihlala ephasini,

yeniqale lokha nakuphakanyiswa iphawu eentabeni!

Lalelani lokha nakuvuthelwa ipalapala!

₄Nakhu okwatjhiwo nguSomnini:

“Ngizakuqala phasi ngisendawenami,

ngizithulele njengesimuku emini

nanjengelifu lehlobo nakutjhisako.

₅Ngaphambi kwesivuno samadiribe,

isikhathi sokuphalaza sele sidlulile

sekulotjha iinthelo ezihlaza,

amagatja angakahlomi azakuhlungwa ngemikhwa

namahlumela womrabhu aruthulwe, alahlwe.

₆Ngokunjalo abantwabo bazakulahlwa boke

emadlangeni weentaba neembandaneni zommango.

Amadlanga azazitika ngabo ihlobo loke,

ngokunjalo neembandana zommango ebusika.

₇“Ngesikhatheso kuzakulethwa iimbiko

kuSomnini uMninimandlawoke,

zivela esizweni eside nesibutjhelelezi

ebantwini abesatjwa eduze nakude,

isizwe esinamandla nesitshidlhako,

esinenarha esezelwa milambo.

Zizakulethwa entabeni iZiyoni,

lapha kuhlala khona ibizo lakaSomnini uMninimandlawoke.”