U-ISAYA 21

Njengeemvunguvungu zangesewula eziza ngokudlhegana,

ngokunjalo izitha zizakuza zivela erhalawumbeni,

iye, zivela enarheni eyesabekako.

₂Ngambulelwa amezwi anzima:

“Umkhapheli uyakhaphela

nomrhayili uyarhayila.

Khuphukani ma-Elamu!

Vimbezelani maMediya!

Koke ukububula okubangwe yiBhabheli

ngizakuphelisa.”

₃Ngalokho idini lami liyagedla

ngisahlelwe ziinhlungu

njengomfazi obelethako;

ngiyabinyabinyeka ngebanga lalokho engikuzwako,

ngikakamale ngalokho engikubonako.

₄Ihliziywami iyathukuza

ngethuswa lithunzi elesabekako;

ukuhlwa engikuthandako

kuphenduke ukuthuthumela kimi.

₅Balungisa isithebe,

bendlala iincabhana,

bayagoma, bayasela.

Sikimani nina nduna,

nilungise iinhlangu

₆ngombana nakhu okutjhiwo nguSomandla kimi:

“Khamba, ufese ubeke umlindi,

amemezele lokho akubonako;

₇emini aqaphe iinjomani ezibotjhelwe

eenkaraneni zepi

namajoni akhwele abodumbana namakamela,

ebusuku alalelisise kuhle.”

₈Yeke umlindi warhuwelela wathi:

“Somandla, ngijame esithaleni sokulinda

imini yoke,

ngibekwe endawenami yokulinda

ubusuku obunye nobunye.

₉Qala, nanguya umuntu asiza,

ukhwele ikarana yeenjomani!

Wabika wathi,

‘Iwile, ngithi iwile iBhabheli!

Zoke iinthombembazwa,

zabosingazimu bayo

ziphahlazeke phasi!’ ”

₁₀Bantu bami abagadangiweko,

iye, nina enibhuliweko,

engikuzwe kuSomnini uMninimandlawoke,

uZimu wakwa-Israyeli,

ngikumemezela kini.

Kunomuntu ongibiza aseSeyiri,

uthi: “Mlindi-ke, ubusuku sele bukhambe kangangani?

Mlindi-ke, ubusuku sele bukhambe kangangani?”

₁₂Umlindi wathi:

“Ukusa kuyeza bese kuyahlwa godu.

Nanisafuna ukubuza, ningabuza;

kodwana nibuye lokha godu.”

₁₃Isimemezelo sakaZimu mayelana nerhalawumba:

Nina milandelande yamaDedani

nina enihlala eenthukghwini zerhalawumba ebusuku

₁₄lethelani owomileko amanzi.

Nina bahlali benarha yeTema,

hlangabezani abaphalali ngesikwa

₁₅ngombana babalekele iinsabula,

iye, iinsabula ezirhwatjhiweko

nemisebe equtjhiweko,

iye, babalekele ukuwurubajwa yipi.