U-ISAYA 39

₁Ngesikhatheso uMerodaki-Bhaladani umsa kaBhaladani ikosi yeBhabheli wathumela incwadi nesipho kuHezekhiya ngombana gade ezwile ngokugula nangokuphola kwakhe. ₂UHezekhiya wamukela iinthekeli ngetokozo bewazitjengisa koke okugade kungendlinakhe yamagugu: isiliva, igolide, iinungo namafutha we-oliva atsengiweko. Wazitjengisa nalokho ekugade kungendlini yeenkhali nakho koke okwafunyanwa ngeendlini zakhe zokubeka. Akunalitho ngesigodlweni sakhe namkha ebukhosini bakhe uHezekhiya angazange alikhombise iinthekelezo.

₃Nje-ke umphorofidi u-Isaya waya ekosini uHezekhiya wabuza wathi: “Bathini abantwaba, khisibe babuyaphi khona?”

UHezekhiya waphendula wathi: “Bavela khatjhana, eBhabheli.”

₄Umphorofidi wabuza wathi: “Baboneni ngesigodlweni sakho na?”

UHezekhiya wathi: “Babone koke okungesigodlweni sami. Godu akunalitho ngeendlini zami zokubeka engingazange ngibakhombise lona.”

₅Yeke u-Isaya wathi kuHezekhiya: “Lalela-ke ilizwi lakaSomnini uMninimandlawoke lithi, ₆‘Kwamambala isikhathi siyeza lapha koke okusesigodlweni sakho, nakho koke aboyihlo abakhe bakubulunga bekube namhlanje, kuzakuthathwa khona kusiwe eBhabheli. Akukho okuzakutjhiywa.’

“Godu uSomnini uthe: ₇‘Abanye bamadodanakho, abaziingazi nenyamakho, obabelethileko, bazakuba bathunjwa bebalotjhe esigodlweni sekosi yeBhabheli babaphakulwa.’ ”

₈UHezekhiya wathi ku-Isaya: “Liyazwakala ilizwi lakaSomnini alikhulumileko.” Gade azibuza athi: “Lokhu kutjho bona kuzakuba nokuthula nokuvikeleka kiso soke isikhathi sepilwami.”