U-ISAYA 43

₁Nje-ke nakhu okutjhiwo nguSomnini

owakudalako, wena Jakopo,

owakubumbako, wena Israyeli, uthi:

“Ungesabi ngombana ngizakuhlenga.

Ngakubiza ngebizo; wena ungowami.

₂Lokha naweyama emanzini

ngizakuba nawe,

lokha naweyama imilambo,

ayizukwemuka nawe.

Nawukhamba hlangana nomlilo,

awukazokurhabula;

amalangabu angeze akutjhisa

₃ngombana nginguSomnini uZimakho,

oCwengileko ka-Israyeli, umsindisakho.

Ngakuhlawulela ngeGibhide,

ngakwenana ngeKutjhe neSeba.

₄Njengombana usese ligugu kimi

begodu uhloniphekile emehlwenami,

iye, njengombana mina ngikuthanda,

ngizakwenana ngabantu

godu nginikele ngezizwe

esikhundleni sepilwakho.

₅Ungesabi ngombana nginawe,

ngiletha abantwabakho abangepumalanga,

ngikubutha ngetjingalanga.

₆Ngithi etlhagwini, ‘Batjhaphulule!’

ngithi esewula, ‘Ungabagugudlheli!

Lethani amadodanami asemajukujukwini

namadodakazami asepelazwe,

₇iye, woke obizwa ngebizo lami,

engimdalele idumo lami,

ngamenza bengambumba.’ ”

“Letha njengofakazi isizwe esiphopheleko

ije sinamehlo,

iye, iinthulu ije zineendlebe.

₉Zoke izizwe zibuthene ndawonye

nabantu bahlangene.

Ngubani hlangana nabosingazimu bazo

okhe wabika ngalokhu,

wamemezela kithi ngokwaphambilini na?

Abosingazimabo abaveze abofakazi babo

ukuqinisekisa indababo

ukuze abalaleleko bathi, ‘Iye, awa kuliqiniso’.”

₁₀USomnini uthi:

“Nina ma-Israyeli, nibofakazi bami.

Iye, wena Israyeli uyincekwami engiyikhethileko

ukuze wazi bewukholwe kimi

begodu ulemuke bonyana nginguye onguye.

Azange khekube noZimu omunye ngaphambi kwami

begodu angeze kwaba khona omunye.

₁₁Mina lo, ngimi ngedwa uSomnini

begodu ngaphandle kwami abe akunamsindisi.

₁₂Ngimi owabika, wasindisa bewamemezela.

Angisuye otjhili phakathi kwenu

begodu nina nibofakazi bami

bonyana nginguZimu.”

Watjho njalo uSomnini.

₁₃“Mbala nangokuzako ngisazakuba njalo.

Akunamuntu onganenyela esandleni sami.

Nangigadangileko ngigadangile!”

₁₄Nakhu okutjhiwo nguSomnini umsindisenu,

oCwengileko ka-Israyeli:

“Kungebanga lenu ngithumele umhluli eBhabheli,

ngenza bonyana labo ebebabaleka

behlele phasi, iye boke;

ngitjho namaKasidi ajakada ngemikhumbawo.

₁₅NginguSomnini, oCwengileko wenu,

umdali ka-Israyeli, iKosenu.”

₁₆USomnini owavula indlela elwandle,

iye, umzila emanzini anamandla,

₁₇owabangela iinjomani neenkarana zepi,

okutjho ibutho neengorho ndawonye

kobana zilandele u-Israyeli;

iye, lezo esele zirabhalele lapho unomphela,

zicinyiwe, zavuthelwa njengesibani

wakhuluma amezwi la:

₁₈“Ningasakhumbuli izinto ezidlulileko,

yeke libalani ngokwaphambilini.

₁₉Qalani, sele ngizokwenza into etja!

Nakhu sele ivumbuka.

Kghani aniyiboni na?

Mbala, ngivula indlela erhalawumbeni

nemilambo egagadwini.

₂₀Iimbandana zommango ziyangihlonipha,

iimpungutjha neenciliba

ngombana ngiletha amanzi erhalawumbeni

nemilambo egagadwini,

ukuze abantu bami basele, labo abakhethiweko,

₂₁abantu engazibumbela bona

bonyana bamemezele idumo lami.”

₂₂“Bekungasimi obewuseze umlotjha, wena Jakopo,

mbala, ukutjhabatjheka kwakho

bekungasi ngenca yami, wena Israyeli.

₂₃Kwakhona beningaletheli mina

izimvu zemihlabelo yokutjhiswa

begodu beningahloniphi ngemihlabelo yetjhebiswano.

Azange nginidisibeze ngeminikelo yeenthoro

nanyana nginikhathaze ngokutjhiswa kwelebhona.

₂₄Azange ningithengele ibhule

nanyana ningitende ngamafutha wemihlabelwenu.

Kwaphela ningidisibeze ngezonokazi zenu

benangikhathaza nangemilandwenu.

₂₅Ngimi, iye ngimi osula iimphambeko zenu.

Kungebanga lebizo lami

ukobana ngingasakhumbuli izono zenu.

₂₆Wena Israyeli,

ngimangalela-ke ngokudlulileko,

asigwebe indaba ndawonye,

veza ubumsulwa bakho.

₂₇Ukhokho wenu wona kade;

nabakhulumeli bakho baphambeka kimi.

₂₈Nje-ke ngarhubutjha iinkhulu zethempeli,

nganikela uJakopo ekubhujisweni

iye, u-Israyeli ekunyazekeni.”