U-ISAYA 45

₁Nakhu okutjhiwo nguSomnini

kozesiweko wakhe onguKoretjhi,

obambe isidla sakhe

ukuze aguqise izizwe phambi kwakhe,

ahlangule amakhosi iinhlabano zawo,

avule iminyango phambi kwakhe,

iye, amasango angeze ahlala avaliwe,

₂uthi: “Ngizakukhamba phambi kwakho,

ngenze iintaba zibe libhabhadu;

ngephule iminyango yekoporo

bengiquntule iinqabo zesimbi.

₃Ngizakunikela umnono othukuswe ebumnyameni,

iye, ubunjinga obuseendaweni ezifihlakeleko,

ukuze wazi bonyana nginguSomnini,

uZimu wakwa-Israyeli

okubiza ngebizo lakho.

₄Ngenza lokho ngebanga lakaJakopo incekwami,

iye, ngebanga laka-Israyeli okhethiweko wami.

Ngikubiza ngebizo lakho

bengikunikele nebizo ledumo,

nanyana ungangazi nje.

₅Ngimi ngedwa uSomnini

begodu akakho omunye.

Ngaphandle kwami akunaZimu.

Ngizakuhlomisa nanyana ungangazi nje

₆ukuze kuthi kusukela ekuphumeni kwelanga

bekube sekutjhingeni kwalo

abantu bazi bonyana akakho omunye

ngaphandle kwami.

NginguSomnini begodu akakho omunye.

₇Ngimi owenza umkhanyo,

ngibuye ngidale ubumnyama.

Ngiletha ukuzotha

ngibuye ngidale ihlekelele.

NginguSomnini owenza koke lokho.

₈Nina mazulu, nisani ukulunga okuphezulu;

iye, nikuwulule nina mafu.

Iphasi alikhamise,

lona nomkayi kuveze isindiso.

Kanyekanye akube nehlalohle.

NginguSomnini okudalileko lokho.”

₉Uzazizwa loyo omangalela umbumbi wakhe!

Uyimbiza yomdaka nje hlangana nezinye!

Umdaka ukhe uthi kumbumbi wawo:

“Yintobani oyenzako le?

Umsebenzakho awazisi!”

₁₀Uzazizwa loyo othi kuyise: “Bewungisaphi?”

Iye, naloyo othi kunina: “Bewungibelethelani?”

₁₁Nakhu okutjhiwo nguSomnini,

ongoCwengileko noMbumbi ka-Israyeli:

“Ningibuza ngabantwabami

beningitjele ngomsebenzi wezandla zami na?

₁₂Ngimi lo owenze iphasi

begodu ngimi owadala nabantu abakilo.

Zizandla zamezi ezaqhisa isibhakabhaka,

ngalawula namabutho waso weenkwekwezi.

₁₃Ngimi owavusa uKoretjhi

kobana alungise.

Zoke iindlela zakhe ngizazinqophisa.

Nguye ozakuvuselela idorobho lami,

atjhaphulule nabathunjwa bami.

Lokho uzakwenza ngesihle.”

Kutjho uSomnini uMninimandlawoke.

“Imikhiqizo yeGibhide nokurhwebiweko kweKutjhe

nokwamaSeba amidlhomudlhomu

kuzakuza kuwe kube ngekwakho, Israyeli.

Izizwezi nazo zizakuba ngezakho:

Zizakulandela zibotjhwe ngeenketani.

Iye, zizakuza zikhothame phambi kwakho

bezikuncenge zithi:

‘Ma-Israyeli, ngini nodwa eninoZimu,

akakho omunye.’ ”

₁₅Mbala Zimu, Msindisi wakwa-Israyeli,

wena unguZimu ozifihlako!

₁₆Izizwezi zineenhloni,

zoke zihlaziswe ndawonye;

iye, abenzi babozinyanaba

bangene ekurhubutjhweni!

₁₇Kodwana u-Israyeli usindiswa nguSomnini

ngesindiso yesiphelani.

Iye, nina ma-Israyeli

angeze naba neenhloni

benihlaziswe nini nanini.

₁₈Mbala, owadala isibhakabhaka,

unguZimu yena!

Owabumba iphasi bewalenza

nguye owalinzinzisako!

Azange alidalele ihlangahlangano,

kodwana walibumba bonyana kuhlalwe kilo.

Yena wathi:

“NginguSomnini, akakho omunye.

₁₉Angikakhulumeli ngemsitheleni,

ebumnyameni ngaphasi kwephasi.

Azange khengithi eenzukulwaneni zakaJakopo,

‘Nizangifumana lapha kuhlangahlangene khona’.

Mina Somnini ngikhuluma iqiniso,

ngimemezela okulungileko.

₂₀Buthanani ndawonye nize,

khulumisanani nina bantu bezizwe ezisindileko!

Labo abathwala iinthombembazwa zabo zeengodo

abanangqondo;

iye, labo abathandaza abosingazimu abangasindisiko.

₂₁Yenisibikele, nibeke iinqiniseko;

iye, hlanganisani iinhloko nithathe isiqunto:

Ngubani kanti owabika lokho phambilini?

Ngubani owakumemezela kade na?

Akusimi lo, mina Somnini na?

Kambe akakho omunye uZimu

ngaphandle kwami;

iye, uZimu olungileko nosindisako.

Mbala, akakho omunye ngaphandle kwami.

₂₂Yizani kimi nisindiswe

noke nina mikhawulo yephasi

ngombana nginguZimu

begodu akakho omunye.

₂₃Ngizifunga ngokwami,

iye, emlonyenami kunesithembiso sesindiso

begodu sizakuphetheka, okutjho bona

woke amadolo azakuguqa phambi kwami

namalimu woke avume athi,

₂₄‘Izenzo zesindiso zikuSomnini kwaphela!’

Iye, ngilokho azokutjho ngami.”

Mbala, izizwe zizakuza kuSomnini,

kodwana boke abasambhavumulelako

bazakudana.

₂₅Yoke imbewu ka-Israyeli izakulungisiswa nguSomnini

begodu izakuvuma iingoma zokudumisa.