U-ISAYA 47

₁“Yehla, ufese uhlale ethulini,

wena tlawu eliyindodakazi iBhabheli.

Hlala phasi ehlabathini

enganasihlalo sobukhosi,

wena ndodakazi yamaKasidi.

Awusenakubizwa bonyana ungothambileko nodedesako.

₂Thatha imbokotho ugaye iflowuru!

Yembula isiyaya sakho,

ukhuphe iinkozo zakho,

ubhince, weyame imilambo!

₃Ububhunubhunu bakho buzakuba semtarini,

kwembuleke ihlazo lakho.

Ngizazibuyiselela, kungabikhona ongivimbako.”

₄Ibizo loMhlengi wethu nguSomnini uMninimandlawoke,

ungoCwengileko wakwa-Israyeli.

₅“Hlala uthi du, ungene ebumnyameni

ntombi yamaKasidi, kuphelile ukubizwa

bonyana uyindlovukazi yemibuso.

₆Begade ngibathukuthelele abantu bami,

ngasilaphaza ilifa lami,

ngabanikela esandleni sakho,

kodwana azange ube nesisa kibo.

Ngitjho nemuntwini omdala

wenze ijogi lakho laba budisi.

₇Wathi: ‘Ngizakuhlabela phambili nini nanini,

ngibe yindlovukazi isiphelani.’

Kodwana azange ucabangisise ngezintwezi,

utjheje umphumela wazo.

₈Nje-ke, lalela-ke wena nyariya ndina

ebherelele endawenayo evikelekileko;

iye, wena ozitjela uthi, ‘Ngimingimi,

akakho omunye ngaphandle kwami.

Angeze ngaba mhlolokazi

namkha ngizwe ubuhlungu bokuloba abantwana.’

₉Kodwana izintwezi zizokwehlela zombili

ngesikhatjhana, ngalanga linye.

Iye, ukuloba abantwana nokuba mhlolokazi

kuzakwehlela phezu kwakho ngamandla,

phezu kobana unobuloyikazi obunengi

namalumbo anamandla.

₁₀Uthembele ebukhohlakalini bakho

bewuzitjela uthi, ‘Angibonwa mumuntu.’

Ukuhlakanipha nokwazi kwakho kukudurhisile,

nje-ke uzitjele uthi, ‘Ngimingimi,

akakho omunye ngaphandle kwami.’

₁₁Uzakwehlelwa yihlekelele

bewubhalelwe kuyiphepha ngomlingo.

Amatlhuwiso azakufikela

bewuhluleke kuwavika ngehlawulo;

Iye, ngesikhatjhana uzakwehlelwa kubhujiswa

obe ungakakulindeli.

₁₂Thuwelela ngamalumbo wakho lawo

nangobuloyikazi bakho obunengi lobo,

osoloko waphikelela ngabo

kusukela ebutjheni bakho.

Mhlamunye uzakuphumelela, asazi,

mhlamunye uzayethusa ihlekelele leyo!

₁₃Uziqede amandla namaqhingakho amanengi!

Labo abahlela iinkwekwezi ngeenqhema,

bazihlole inyanga nenyanga

kobana bakwazise ngalokho okuzokwehlela,

abavele-ke bakusindise.

₁₄Qala-ke, njengamawunguwungu

umlilo uyabaqothula.

Abakghoni ukuzisindisa emandleni welangabi.

La akusiwo amalahle wokufuthumeza umuntu;

iye, akusiwo umlilo wokothiwa!

₁₅Mbala, banjengamawunguwungu kuwe

abosomlingo bakho ebewusoloko ubaphikelele

kusukela ebutjheni bakho.

Omunye nomunye wabo uyona kakwenzako;

akakho namunye ongakusindisa.”