U-ISAYA 59

₁Qalani, ingalo kaSomnini ayisiyifitjhani

kobana ingahlala ingasindisi

nendlebakhe ayikathundubali,

kobana ingahlala ingezwa.

₂Kodwana amacalenu anihlukanise noZimenu

nezono zenu zisithe ubuso bakhe kini,

kobana angezwa.

₃Mbala, izandla zenu zisilaphele ngeengazi,

nemino yenu ngecala.

Iimbhena zenu zikhuluma amala

nelimu lenu lihumuza okukhohlakeleko.

₄Akakho omangalela ngokulunga,

akakho ozivikela ebandla ngobuqotho.

Bathembela elizeni,

bakhulume amanga;

bakhulelwe ngobukhohlakali,

bazala ihlekelele.

₅Baqoqosela amaqanda werabi,

baluke ubulembu besiswebu.

Ogoma amaqanda wakhona uyafa,

elinye lawo naliphadlhekako,

kuvumbuka isiqandani!

₆Ubulembu babo angeze baba ziingubo,

angeze bazembathisa ngabakwenzileko.

Izenzo zabo ngezehlekelele

nemisebenzi yenturhu isezandleni zabo.

₇Iinyawo zabo zigijimela ekoneni,

bamsinyana ekuphalazeni iingazi ezinganamlandu.

Imizindlo yabo iveza ihlekelele,

ukonakala nokubhubhisa kuseendleleni zabo.

₈Indlela yokuthula abayazi,

ukulunga akukho emizilenabo.

Iindlela zabo zimasongesonge,

okhamba kizo akasoze aba nokuthula.

₉Ngaleyondlela ubulungiswa bukude nathi

nokulunga akusifikeleli.

Siqalelele umkhanyo kodwana kumnyama,

iye, ukudarha, kodwana sikhamba ebumnyameni.

₁₀Siphumbutha ebodeni njengesiphofu,

iye, siphumbutha njengomuntu onganamehlo;

sikhutjwa emini ekulu inga kusebusuku.

Ije sinethezeka sifana nabafileko.

₁₁Soke sibhavumula njengamabhubezi

sihumuza ngokuhumuza njengeengwayi.

Siqalelela ukulunga kodwana akukho,

iye, ukusindiswa, kodwana kukude nathi.

₁₂Mbala, iimphambeko zethu zinengi

ebusweni bakho,

nezono zethu zifakaza ngokujamelana nathi.

Ngambala sibhodwe ziimphambeko,

iye, namacalethu siyawazi,

₁₃okutjho ukuphambuka nokudela uSomnini,

ukufulathela uZimethu,

ukukhuluma igandelelo nokuhlubuka,

ukumitha amala esiwahumuza ngeenhliziyo.

₁₄Nje-ke, ubulungiswa bubuyiselwa emuva

nokulunga kudedile kithi

ngombana iqiniso liyalahlwa ebandla

nobumsulwa abungeni lapho.

₁₅Iqiniso alisafunyanwa ndawo,

nobalekela ubumbi uyaphangwa.

USomnini wakuqala lokho,

kwaba kumbi kuye

ukubona bonyana akunabulungiswa.

₁₆Kwamdanisa ukubona bonyana akunamuntu

ojama esikhundleni sakhe;

ngalokho ingalwakhe yaba yisindiswakhe

nokulunga kwakhe kwamhlohlozela

kobana asikime.

₁₇Wembatha ukulunga njengesambatho sepi

nesikupuru sesindiso ehlokwakhe;

wembatha izambatho zokuzibuyiselela,

waziphuthela ngetjisakalo inga linaka.

₁₈Uzakuzibuyiselela ukuya ngabakwenzileko,

kube yitukuthelo ezitheni zakhe,

ukuzibuyiselela emanabenakhe,

abuyisele iinhlengele ngokufanelekileko.

₁₉Ukusuka etjingalanga,

abantu bazakwesaba ibizo lakaSomnini,

ukusuka epumalanga

besabe iphazimulwakhe

ngombana uzakuvela njengomlambo otshopako,

osunduzwa mumoya kaSomnini.

₂₀“Njengomhlengi uzakuza eZiyoni,

kilabo bakaJakopo abaphenduke

esiphambekweni sabo.”

Watjho njalo-ke uSomnini.

₂₁USomnini uthi:

“Ngokuya ngami,

lesi sivumelwano nesizwe sami:

UMoyami ophezu kwakho

namezwami engiwabeke emlonyenakho

akazukusuka eembheneni zakho,

namkha emilonyeni yabantwabakho,

nanyana emilonyeni yeenzukulwana zabo

ukusuka gadesi kuya kuyile.”

Iye, watjho njalo uSomnini.