UJAKOPO 2

₁Bazalwana bami enikholwa yiKosethu yephazimulo uJesu Krestu, ningabandlululi muntu. ₂Nangabe kungena umuntu emhlanganweni wenu ofake idzilamunwana yegolide embethe zakanokutjho, kubuye kungene osichaka embethe maratha, ₃bese nitjheja loyo owembethe zakanokutjho ngokuthi “nasi isihlalo esihle esilungele wena”, komaratha nithi “jama lapha wena” namkha nithi “hlala phasi eenyaweni zami”, ₄ngokwenza njalo nizabe ningakabandlululi phakathi kwenu ngokuzenza abagwebi ngemikhumbulo emimbi na?

₅Lalelani bazalwana abathandekako: UZimu akakakhethi abachakileko bephaseli kobana banothe ngokukholwa, babe ziindlalifa zombuso awuthembisa labo abamthandako na? ₆Kodwana nina niyamrhubutjha ochakileko. Akusibo abanjingileko abanigandelelako bebanidosele phambi kwesigungu sababusi na? ₇Akusibo abahlambalaza ibizo elihle enibizwa ngalo na?

₈Kwamambala nizabe nenza okufaneleko nanilonda umthetho wobukhosi njengombana kutloliwe kwathiwa: “Thanda umuntu omunye njengombana uzithanda wena!” ₉Kodwana nanibandlululako, nenza isono begodu nilahlwa ngomthetho njengabaweqako. ₁₀Nangabe umuntu ulonda woke umthetho kodwana aphule munye wawo unomlandu wawo woke ₁₁ngombana loyo owathi “ungahlobongi” wabuye wathi “ungabulali”. Nangabe awuhlobongi kodwana uyabulala, usiseqamthetho. ₁₂Khulumani bese nenza njengalabo abazokugwetjwa mthetho oletha ikululeko ₁₃ngombana ukugweba akunasirhawu kiloyo ongazange abonise isirhawu, nokho isirhawu siyahlula phezu kwesigwebo.

₁₄Bazalwana bami, kusizani umuntu athi unokukholwa kodwana anganayo imisebenzi na? Ukukholwa kwakhe kungamsindisa na? ₁₅Nakube umfo namkha udade ukhamba hlubule begodu akanakudla ₁₆bese omunye wenu athi kibo “khambani ngokuthula, nifuthumale, nisuthe”, lokho kusizani naninganikeli lokho okudingekako ngokomzimba na? ₁₇Ngokunjalo-ke, nokukholwa nakunganamisebenzi, kufile.

₁₈Kodwana omunye uzakuthi: “Wena unokukholwa, mina nginemisebenzi.” Ngitjengisa ukukholwa kwakho ngaphandle kwemisebenzi, nami ngemisebenzami ngizakutjengisa ukukholwa kwami. ₁₉Uyakholwa bona uZimu munye na? Wenza kuhle; namadimoni ayakholwa abe ahlengezele. ₂₀Wena siyila ndina, ufuna ukutjengiswa bona ukukholwa ngaphandle kwemisebenzi kulilize na? ₂₁Kanti ukhokho wethu u-Abrahamu akhange alungisiswe ngemisebenzi lokha nakanikela ngo-Isaka indodanakhe e-aldarini na? ₂₂Uyabona-ke bonyana ukukholwa kwasebenza kanye nezenzo zakhe, nokobana ukukholwa kwapheleliswa ngemisebenzi. ₂₃Nje-ke kwazaliseka umtlolo othi: “U-Abrahamu wakholwa kuZimu, kwabalelwa kuye njengokulunga,” begodu wabizwa bona umngani kaZimu. ₂₄Niyabona bonyana umuntu ulungisiswa ngemisebenzi, ingasi ngokukholwa kwaphela.

₂₅Kwaba njalo nangoRarhabu ingwadla, walungisiswa ngemisebenzi lokha nakamukela iinthunywa wabuye wazikhupha ngenye indlela.

₂₆Njengombana nomzimba nawunganammoya ufile, ngokunjalo nokukholwa nakunganamisebenzi kufile.