UJAKOPO 5

₁Nje-ke lalelani nina njinga; lilani nirhahlawule ngebanga leenhlupheko ezizanehlela. ₂Umnotho wenu wonakele neengubo zenu zidliwa yitshwele. ₃Igolide nesiliva lenu kukghorile, ukukghora lokho kuzokuba bufakazi obujamelene nani, kudle imizimba yenu njengomlilo. Nibuthelele umnotho emihleni le yokugcina. ₄Qalani, umvuzo weensebenzi ezisebenza emasiminenu eniwugodle ngobukhwebetjhana uyalila; begodu ukulila kwabavuni kufikile eendlebeni zakaSomnini uMinimandlawoke. ₅Ephasinapha niphile ngokuzigedla nokuzithokozisa, ninonisele iinhliziyo zenu mayelana nelanga lokuhlatjwa. ₆Nilahle benabulala onganacala, iye, onganiphikisiko.

₇Ngalokho nyamezelani, bazalwana, bekufike ilanga lokubuya kweKosi uJesu. Qalani, umlimi ulindela isithelo sephasi esiligugu, asinyamezelele bekube lizulu lokuthoma nelokugcina. ₈Nani-ke nyamezelani niqunge isibindi ngombana ilanga lokubuya kweKosi uJesu libandamele.

₉Bazalwana, ningavungamelani ukuze ningagwetjwa; qalani, uMgwebi ujame emnyango. ₁₀Thathani ukunyamezela nokuhlupheka kwabaphorofidi abakhuluma ebizweni lakaSomnini njengesibonelo. ₁₁Qalani, sibathatha bona babusisiwe labo abanyamezelako. Nezwa ngokunyamezela kwakaJobho, benabona umnqopho kaSomnini kobana mbala uSomnini unezwelo nesirhawu.

₁₂Ngaphezu kwakho koke bazalwana, ningafungi; kungaba ngezulu namkha ngephasi nanyana nangasiphi isifungo. U-iye wenu akabe ngu-iye; u-awa wenu abe ngu-awa ukuze ningalahlwa.

₁₃Kukhona ohluphekako hlangana nani na? Akathandaze. Kukhona owenamileko na? Akadumise. ₁₄Kukhona ogulako hlangana nani na? Akabize abaphathi bebandla bamthandazele bebamzese ngamafutha ebizweni lakaSomnini. ₁₅Umthandazo wokukholwa uzamsindisa ogulako, uSomnini amvuse, nanyana enze izono uzakulitjalelwa zona. ₁₆Ngalokho-ke vumani izono omunye komunye, nithandazelane ukuze niphiliswe. Umthandazo wolungileko unamandla begodu uyasebenza. ₁₇U-Elija bekamumuntu ofana nathi, wathandaza ngokuncama bona izulu lingani, mbala azange lana ephasini iminyaka emithathu neenyanga ezintandathu. ₁₈Wabuye wathandaza godu, umkayi wawulula izulu, iphasi labuye lathela iinthelo zalo.

₁₉Bazalwana bami, nangabe omunye hlangana nani uduka eqinisweni, omunye ambuyise, ₂₀yazini bona loyo obuyise isoni ekulahlekeni kwaso, usindise umphefumulwaso ekufeni begodu ugubuzesa nezono ezinengi.