UJOROMIYA 19

₁Nakhu okutjhiwo nguSomnini: “Khamba uyokuthenga ikwana yomdaka. Ukhambisane nabanye babarholi babantu kanye nabaphristi abakhulileko, ₂uphume uye emrhobeni weBheni-Hinomu eduze kobungeno besango leDengela. Nawufika lapho umemezele amezwi engikutjela wona. ₃Kufuze uthi kibo, ‘Lalelani ilizwi lakaSomnini, nina makhosi wakwaJuda kanye nani bahlali beJerusalema. Nakhu okutjhiwo nguSomnini uMninimandlawoke, uZimu wakwa-Israyeli: Qalani, sele ngizokwehlisela ihlekelele phezu kwendawo le ezokwenza bona iindlebe zawo woke umuntu ozwako zibe buzikazikani ₄ngombana abantwabo bangihlubukile. Benza indawo le yaba ngetjhili ngokutjhisela kiyo abosingazimu itjhwalo, iye, abosingazimu abangabaziko nabangaziwa ngitjho naboyise namakhosi wakwaJuda. Bazalise indawo le ngeengazi ezinganamlandu. ₅Bakhe iindunduma zaboBhali kobana batjhisele kizo amadodanabo njengemihlabelo yokutjhiswa kiboBhali, okuyinto engingazange ngiyale ngayo namkha ngiyikhulume, ngitjho nemkhumbulweni ayizange ibe khona. ₆Ngalokho, mina Somnini ngithi: Yelelani, amalanga ayeza, lapha abantu bangeze basabiza khona indawo le bonyana yiTofethi namkha mrhoba weBheni-Hinomu, kodwana bazakuthi mrhoba wokuHlatjwa.

₇“ ‘Endaweni le ngizakufelelisa amahlelo wakwaJuda neJerusalema. Ngizabawisa ngesabula yezitha zabo, iye, labo abazumana nepilwabo. Ngizakunikela iindumbu zabo zibe kukudla kweenyoni zomkayi neembandana zommango. ₈Ngizakwenza idorobheli libe libhudu nento yokurarekelwa. Woke odlula kilo uzakumangala abe akhuze ngebanga lazo zoke iingemegeme zalo. ₉Ngizabenza batle inyama yamadodana namadodakazabo, batlane bona esizini nebudisini abazabubangelwa zizitha zabo nalabo abazumana nepilwabo.’

₁₀“Nje-ke wena Joromiya, yephula ikwana yomdaka leyo phambi kwabantu abakhamba nawe ₁₁bese uthi kibo, ‘Nakhu okutjhiwo nguSomnini uMninimandlawoke: Ngizakuphihliza isizwesi nedorobheli njengombana kuphahlazeke ikwana le begodu angeze isalungiseka. Bazakungcwaba abafileko eTofethi kufikela lapha kutlhogeka khona indawo. ₁₂Ngilokho-ke engizakwenza ngedorobheli nangabahlali balo. Ngizakwenza lifane neTofethi. Kutjho uSomnini. ₁₃Iinkumba zeJerusalema kanye nemakhiwo yamakhosi wakwaJuda izakufana neTofethi: Zizakusilaphazwa, okutjho zoke iinkumba lapha benzela khona imihlabelo phezu kwephahla lazo mayelana nalo loke ibutho lomkayi bebathulule neminikelo yokuselwako kibosingazimu.’ ”

₁₄UJoromiya wabuya-ke eTofethi lapha uSomnini gade amthume kobana ayophorofida khona, wafese wajama ngesirhodlweni sethempeli lakaSomnini, wathi kibo boke abantu: ₁₅“Nakhu okutjhiwo nguSomnini uMninimandlawoke, uZimu wakwa-Israyeli, ‘Qalani, sele ngizokwehlisela idorobheli nemizana elibhodileko yoke ihlekelele engakhuluma ngayo phezu kwalo ngombana abantu bakhona baqinisa iintamo begodu azange balalele amezwami.’ ”