UJOROMIYA 34

₁Lokha uNebukadiretsari ikosi yeBhabheli nalo loke ibutho lakhe kanye nayo yoke imibuso nabantu abasembusweni ongaphasi kwakhe nabasalwa neJerusalema nawo woke amadorobho alibhodileko, kwafika nanti ilizwi kuJoromiya livela kuSomnini: ₂“Nakhu okutjhiwo nguSomnini, uZimu ka-Israyeli, ‘Khamba uye kuTsedekhiya ikosi yakwaJuda ufese uyitjele bona uSomnini uthi: Qala, sele ngizokunikela idorobheli esandleni sekosi yeBhabheli, yona-ke izalibhubhisa ngomlilo. ₃Nakunguwe, awuzukusinda emazitjhenayo, kodwana ngambala uzakubanjwa bese unikelwa esandleni sayo. Uzakubona ikosi yeBhabheli ngamehlwakho lawo begodu izakhuluma nawe ubuso nobuso. Nje-ke uzakusiwa eBhabheli. ₄Kodwana nawulalela ilizwi lakaSomnini, wena Tsedekhiya, kosi yakwaJuda, nakhu okutjhiwo nguSomnini ngawe: Awuzukubulawa ngesabula; ₅uzakuhlongakala ngokuthula. Njengombana abantu batjhisela aboyihlo iinthako nabahlongakeleko, okumakhosi waphambilini akwandulelako, ngokunjalo nawe bazakutjhisela iinthako bebakulilele bathi: Maye ngekosethu! Mina ngokwami ngikutjhwile lokho.’ Kutjho uSomnini.”

₆Yeke umphorofidi uJoromiya watjela uTsedekhiya ikosi yakwaJuda koke lokho eJerusalema, ₇lokha ibutho lekosi yeBhabheli nabegade lisilwa neJerusalema kanye namanye amadorobho wakwaJuda ebegade asajamile, okuyiLakitjhi ne-Azekha. La ngiwo wodwa amadorobho anemithangala ebegade asasele kwaJuda.

₈Ilizwi lafika kuJoromiya livela kuSomnini ngemva kobana ikosi uTsedekhiya yenze isivumelwano nabo boke abantu eJerusalema ukumemezela itjhaphuluko yamakhoboka, ₉okutjho bona woke umuntu begade afanele atjhaphulule amakhoboka namakhobokakazakhe wamaHebheru. Akakho obegade afanele abophelele umfowabo omJuda. ₁₀Yeke zoke iinduna kanye nabantu abangena esivumelwanenesi bavuma bonyana bazakutjhaphulula amakhoboka namakhobokakazi nokobana angeze basawabophelela. Bavumelana, nje-ke bawatjhaphulula. ₁₁Kodwana ngemva kwalokho bahlanuka, babuya godu bathatha amakhoboka ebebawatjhaphululile bawakatelela kobana abe makhoboka namakhobokakazi godu.

₁₂Nje-ke ilizwi lakaSomnini lafika kuJoromiya lathi: ₁₃“Nakhu okutjhiwo nguSomnini, uZimu wakwa-Israyeli, ‘Mina ngenza isivumelwano naboyihlo lokha nangibakhupha eGibhide ekumbeni yobukhoboka, ngathi: ₁₄Njalo emnyakeni wekhomba omunye nomunye wenu kumele atjhaphulule umfowabo omHebheru ozithengise kini. Ngemva kobana akusebenzele iminyaka esithandathu, kumele umtjhaphulule. Kodwana-ke aboyihlo azange bangilalele namkha banginake. ₁₅Mhlapha nje nina nitjhugulukile nabe nenza okufaneleko phambi kwami: Omunye nomunye wenu umemezele itjhaphuluko emuntwini wekhabo. Nenze nesivumelwano phambi kwami ngethempelini elibizwa ngami. ₁₆Kodwana senihlanukile nasilaphaza ibizo lami; iye, omunye nomunye wenu uhlanukile wabuya godu wathatha amakhoboka namakhobokakazi ebeniwatjhaphulule ngokuthanda kwawo. Niwakatelele kobana abe makhobokenu godu.’

₁₇“Ngalokho-ke nakhu okutjhiwo nguSomnini, ‘Nina azange ningilalele kobana omunye nomunye amemezele itjhaphuluko yabafowabo nabantu bekhabo. Yeke, gadesi nginimemezelela itjhaphuluko, iye, itjhaphuluko yokobana ngininikelele ngesabula, ngamatshwenyeko nangendlala, nibe sisethuso kiyo yoke imibuso yephasi.’ Kutjho uSomnini. ₁₈‘Abantu abephule isivumelwano sami ngokungalandeli imibandela yesivumelwano abasenze phambi kwami, ngizabenza njengekunzana abayihlahlele phakathi bese bakhamba hlangana nezitho zayo. ₁₉Iinduna zakwaJuda nezeJerusalema, iinkhulu zesigodlo, abaphristi kanye nabo boke abantu benarha abakhamba hlangana nezitho zekunzana, ₂₀ngizabanikela ezandleni zezitha zabo nezandleni zalabo abazumana nepilwabo. Iindumbu zabo zizakuba kukudla kweenyoni zomkayi neembandana zommango.

₂₁“ ‘Ngizokunikela uTsedekhiya ikosi yakwaJuda kanye neenduna zakhe ezitheni zabo, ezandleni zalabo abazumana nepilwabo nezandleni zebutho lekosi yeBhabheli esele isukile edorobheneli.’ ₂₂Iye, uSomnini uthi, ‘Ngizokhupha umyalo, ngibuyise ibutho edorobheneli. Lizakulwa nalo, lilithathe bese liyalitjhisa. Ngizakwenza amadorobho wakwaJuda abe libhudu ukuze kungabi namuntu ohlala kiwo.’ ”