UJOBHO 14

₁Umuntu obelethwe mfazi,

imihlakhe mifitjhani

begodu izele ngomtlhago.

₂Uyavela njengethuthumbo, abuye atjhwabe;

uyabaleka njengesithunzi esingajamiko.

₃Konje ungakhe uqalelele onjalo,

umlethe phambi kwakho kobana umgwebe na?

₄Ngubani ongaveza okuhlambulukileko kokusilapheleko na?

Akakho do!

₅Njengombana amalangakhe abaliwe,

nesibalo seenyanga zakhe sikuwe,

wambekela umkhawulo angeze aweqa,

₆ungamqali, yewumlise,

ukuze azithokozise ngelanga lakhe njengomqatjhwa.

₇Mbala kunethemba emthini,

nakube uyagawulwa ukuze uhlume godu,

namahlumelawo akapheli.

₈Nanyana umrabhawo uluphalela equlwanini,

nesirumula sawo sifela ehlabathini,

₉nasizwa amanzi sizakuhluma

siveze iimpande njengesitjalo esincani.

₁₀Kodwana indoda nayifako, iphela amandla!

Umuntu nadlula ephasini, akasabonwa!

₁₁Njengamanzi nanyamalala elitsheni,

nomlambo uye ngokoma kere,

₁₂ngokunjalo nomuntu uyalala, angasavuka:

Kuzakudlula isibhakabhaka alele njalo,

angavuswa ebuthongweni bakhe.

₁₃“Inga ungangifihla endaweni yabafileko,

ungithukuse bekudlule itukuthelwakho,

ungibekele isikhathi esibekiweko, ungikhumbule!

₁₄Nakube umuntu nafako ubengabuye aphile,

bengizakulinda soke isikhathi engibekelwe sona,

bekufike idlhego lokuphunyuzwa kwami.

₁₅Bewuzakubiza, mina ngikuphendule,

ngombana ulangazelela imisebenzi yezandla zakho.

₁₆Nje-ke, mbala uzakubala amagadangwami,

awuzukuhlala weluse isono sami,

₁₇uzakuvalela isiphambeko sami ngembadeni,

usibekele ukona kwami.

₁₈Kodwana njengentaba nayiwako igirike,

kususwe idwala endawenalo,

₁₉iye, njengamanzi narhubha amatje,

iinkhukhula zikhukhule itjhwabatjhwaba,

ngokunjalo ubhubhisa ithemba lomuntu.

₂₀Uyamhlula nini nanini, adlule:

Urhohlomeza ubuso bakhe, umlise anjalo.

₂₁Amadodanakhe ayaphakanyiswa, nokho yena angazi litho,

namkha ehliselwe phasi, yena angayeleli litho.

₂₂Uzwa ubuhlungu bomzimbakhe kwaphela,

begodu uzililela yena kwaphela.”