UJOBHO 20

₂“Mbala, imikhumbulo engikhathazako ingenza bona ngiphendule,

ngebanga lokungabi nokuhlaliseka ngaphakathi kwami.

₃Ngizwa ukusolwa okungihlambalazako,

nomqondo engingawuzwisisiko ongenza ngiphendule.

₄Angithi uyakwazi lokhu:

Kusukela kade,

ekubekweni komuntu ephasini,

₅ukujabula kwabakhohlakeleko kufitjhani

nokuthokoza konganaZimu kungokwesikhatjhana.

₆Nanyana ukuziphakamisa kwakhe kufika emkayini,

nehlokwakhe ithinta emafini,

₇uzakubhubha isiphelani njengothuvi bakhe.

Labo abambonileko bazakuthi, ‘Uphi nje?’

₈Uphapha njengebhudango, angasabonwa,

agijinyiswe njengombono webusuku.

₉Ilihlo elakhe lamrhedlula, alisoze lisambona,

angeze lisambona endawenakhe.

₁₀Abantwabakhe bazakubuyisela umnothwakhe kabadududu,

iye, kube sisandla sakhe esibuyisela akuthethe kibo.

₁₁Amathambakhe gade anamandla wobutjha,

kodwana amandla lawo azakulala naye ethulini.

₁₂“Izenzo ezimbi zinjengeliju ngemlonyenakhe,

azifihle ngaphasi kwelimu lakhe.

₁₃Iye, zinjengeliju alimumethe angalikhafuli,

alibambe ngerhwalabha lakhe.

₁₄Kodwana ukudlokho nasele kungendeni kuyajika:

Kube sihlungu senyoka ngaphakathi kwakhe.

₁₅Uhlanza umnono awuginyileko,

uZimu amgonyulukise wona.

₁₆Uphila ngokumunya isihlungu seenyoka,

nje-ke, uzakubulawa lilimu lesiqandani.

₁₇Akangathabeli imisele,

iye, imilanjana egeleza iliju nemilaza:

₁₈Uzakubuyisa akukhandlekeleko angakakugomi,

anganandiphi ngitjho nenzuzo yerhwebo lakhe.

₁₉Nanyana agandelele bewalahla abadududu,

iinkumba abemuke zona angeze azivuselela.

₂₀“Ngebanga lokobana amarhamaru,

umnonwakhe angeze wamsindisa.

₂₁Ngenca yokurhiribidela kwakhe,

ubunjinga bakhe angeze badzimelela.

₂₂Uzakuthi asadakwe mnono, afikelwe lisizi,

iye, amatlhuwo amthelekele ngamandla.

₂₃Uzakuzalisa isisu sakhe ngesizi!

Iye, uZimu amvuthele ngetukuthelwakhe,

imnethe njengezulu eliwulukela phezu kwakhe.

₂₄Nanyana athi ubalekela isibulawo sesimbi,

uzakuhlatjwa msebe onetlobo yekoporo.

₂₅Kuzakuthi nawutsomulako

kobana uphume emhlanakhe,

itlobo leyo imanyazele inyongo.

Uzakwehlelwa livalo lokufa!

₂₆Bumnyama bodwa obubekelwe amagugwakhe,

umlilo ongakabaswa mumuntu uzamtjhwamadela,

uqothule nokuseleko emzinakhe.

₂₇Amazulu azakwambula isono sakhe,

nephasi lijamelane naye.

₂₈Iinkhukhula zizakukhukhula nekumbakhe,

iye, amadlambi wamanzi ngelanga letukuthelo kaZimu.

₂₉Sinjalo-ke isiphetho uZimu asibekele isikhohlakali,

iye, ilifa elimenyezelwe nguZimu.”