UJOBHO 37

₁Ngalokho ihliziywami iyathuthumela,

yeqayeqa endawenayo ngebanga lomdumakhe.

₂Lalela ukundonda kwelizwi lakhe

nokundindiza okuvela emlonyenakhe,

₃uthukulula umdumo usabalale nephasi loke.

Umbanakhe uphazima emaphethelweni wephasi,

₄ngemva kwalapho kurarambe umdumo,

iye, adume ngelizwi lobukhosi bakhe.

Akagodli ukunyazima kwakhe

ukuze azwakalise ilizwi lakhe.

₅Iphimbo lakaZimu lithuthumba ngeendlela ezibabazekako,

wenza izinto ezikulu ngaphezu kokwazi kwethu:

₆Uyala iliqhwa athi, ‘Yehlela ephasini!’,

umwuluko wezulu,

iye, umwuluko ukhombisa amandlakhe.

₇Ujamisa boke abantu ekusebenzeni,

ukuze bazi imisebenzakhe.

₈Iinyamazana zibhaca eenkhundleni zazo,

zihlale emiphandwinazo.

₉Isiwuruwuru sivela ngesewula

nemimoya ihlakaza amakhaza.

₁₀Ukuphefumula kwakaZimu kuveza iliqhwa,

ngaphezu kwamanzi kulale irhwaba.

₁₁Uzalisa amafu ngomswakama,

amafu wezulu asabalalise imibanakhe.

₁₂Umbani ugijima mazombe,

ngokuhlahlwa nguZimu,

kobana wenze koke ayala ngakho,

wehlele phasi ehlabathini yoke indawo.

₁₃Ngamafu anzima uhlunguphaza iphasi,

namkha ngesisa sakhe, abusise ngawo.

₁₄“Lalela lapha wena Jobho,

akhe ujame, uyelele iimangaliso zakaZimu.

₁₅Uyazi bonyana uZimu ulawula njani imibani,

akhanyise njani amafu wakhe na?

₁₆Ingabe uyalemuka bona imimoya

iphephula njani amafu na?

Kuziimangaliso zopheleleko ngelwazi

₁₇lokha izambatho zakho nazifuthumalako,

iphasi nalithulileko kunganamsikinyeko

ngebanga lomtjhiso otjhwabisako.

₁₈Ungamsiza uZimu ekwendlaleni isibhakabhaka,

sona esiqine inga siboniboni sekoporo na?

₁₉Sitjela-ke bonyana sithini kuZimu.

Ngebanga lokobana sisebumnyameni,

angeze sakghona ukwendlala indabethu.

₂₀Udlumbana bona

kufuze atjelwe engikutjhoko,

namkha kukhona ozakuthi indaba le ayibikwe na?

₂₁“Ehlobo umbani awusabonwa

uphazima emafini,

ngombana ummoya sewudlulile

wembula isibhakabhaka,

₂₂watjhiya umkayi wangetlhagwini

uphazima njengegolide.

UZimu wembethwe bukhosi obesabekako,

₂₃nje-ke asikwazi ukufikelela koSabekako.

Omkhulu ngamandla nangokulunga

akadingi ukuphendula.

₂₄Ngalokho, inga abantu bangamesaba,

boke abahlakaniphileko bamhloniphe!”