UJOBHO 4

₂“Nange umuntu angakhuluma nawe

ungakhubeka na?

Nokho-ke, akunamuntu ongathula nakunje.

₃Qala, ufundise abanengi,

waqinisa abazandla zibuthakathaka.

₄Amezwakho abe sisekelo kokhutjwako,

waqinisa abamadolo nzima.

₅Kodwana nasele zibuya ngawe,

uphela amandla,

nawuthintekako, uyakakamala.

₆Kanti ukwesaba kwakho uZimu, akukuqinisi na?

Ubuqotho bepilwakho, abusilithemba lakho na?

₇Akhese ucabangisise kuhle:

Wakhe wabonaphi omsulwa atjhabalaliswa na?

Kukuphi lapha olungileko akhe abhujiswa khona?

₈Mina-ke ngokubona kwami:

Labo abalima ikohlakalo, batjale isizi,

bavuna abakutjalileko.

₉UZimu naphefumulako, bayabhubha,

navuthela ngobukhali bakhe, bayaphela.

₁₀Ukubhodla kwebhubezi,

ilizwi lengwenyama ethukutheleko

namazinyo webhubezana akuwasizi.

₁₁Ikosi yeenyamazana izulazula inganakudla

namawundlu webhubezikazi aphadlhalele.

₁₂“Ilizwi leza kimi ngefihlakalo,

indlebami yezwa umhlebezwana,

₁₃emizindlweni yemibono yamabhudango,

lokha abantu nababanjwe buthongo.

₁₄Ngehlelwa kukwesaba nokuthuthumela,

amathambami woke aqhaqhazela.

₁₅Kwavela isithunzi ebusweni bami,

kwaphakama iinhluthu ehlokwami.

₁₆Isithunzeso sajama rwe,

azange ngazi bona yintobani.

Kwathi isigeso sisajame phambi kwami njalo,

ngezwa ilizwi elihlebezako lithi,

₁₇‘Obhubhako angaba neqiniso ngaphezu koZimu na?

Umuntu angaba msulwa ngaphezu komDali wakhe na?

₁₈Qala, uZimu akanikeli iindalwa zezulu ukuzilawula

begodu neengilozi zakhe uyazisola nazenza iimphoso.

₁₉Alo, bebayini-ke abahlala eenkumbeni zamasoyi,

ezidzimelele esisekelweni sethuli,

abapitlizeka lula njengomuhlwa na?

₂₀Babhujiswa ngalanga linye

batjhabalala unomphela banganakwa.

₂₁Angithi nakuqhusulwa intambo yamatendabo,

bayafa ngokungazi kwabo!’ ”