UJOBHO 41

₁Ungakhupha ingwenya ngemanzini ngesikghopholahlambi,

uvalele ilimu layo

ngokubopha umlomayo ngentambo na?

₂Ungaphundlusa ipumulwayo ngomgaba,

namkha ubhoboze umhlathayo ngesikghopholahlambi na?

₃Izalokhu ikuncenga,

ikhulume kuwe amezwi athambileko na?

₄Izakubawa ukwenza nawe isivumelwano,

sokobana uyithathe ibe likhoboka lakho isiphelani na?

₅Ungayenza ifuyosithandwa njengenyoni

ebotjhwa ngomtiya enyaweni,

ukuze umntazanakho adlale ngayo na?

₆Abarhwebi bangaphalisana ngentengwayo,

abathengi babelane ngayo na?

₇Ungazalisa isikhumba sayo ngamasungulo

nehlokwayo ngemikhonto yokubamba iinhlambi na?

₈Nawubeka isandla sakho phezu kwayo,

uzakhumbula bona ipi injani;

angeze bewusathoma!

₉Loke ithemba lokuyibamba lililize.

Ukuyibona nje kwaphela uyaketuka!

₁₀Akakho noyedwa onesibindi sokuyiphaphamisa,

abuye ajame phambi kwayo!

₁₁Ngubani ongayisahlela ahlale angalimali na?

Ngaphasi komthunzi welanga,

ngimi ngedwa oyilawulako.

₁₂“Yithi ngikutjele ngengubayo,

ngamandlayo ababazekako

begodu ayifaniseki:

₁₃Ngubani ongayembula isambatho esingaphakathi,

ayihlubulise imbajayo yepi na?

₁₄Ngubani ongagabaza ayivule umlomo,

ogegwe mazinyokazi asabekako?

₁₅Umhlanayo unomsele ophahlwe marhururhuru,

abophene aba mlukuluku

₁₆abekwa aminyaniswa

kangangobana akunammoya ongadlula hlangana.

₁₇Ahlanganiswe ndawonye, aqiniswa,

anamathelene begodu angeze ahlukaniswa.

₁₈“Nayithimulako umrhwamuko uyaphazima,

amehlwayo afana nemisebe yokusa.

₁₉Emlonyenayo kuphuma iinhlothi ezivuthako,

kusabalale iinsahlela zawo.

₂₀Eempumulweni zayo kuphuma isikhutha,

inga siphuma embizeni ebilako

emalahleni avuthako.

₂₁Ukuphefumula kwayo kungavuthisa amalahle

namalangabi aphuma emlonyenayo.

₂₂Amandla alele entanyenayo,

ukwesabeka kukhamba phambi kwayo.

₂₃Amakghwakghwa womzimbayo anamathelene,

akghamathele phezu kwayo, akasuki.

₂₄Ihliziywayo iqine njengedwala,

iye, iqine njengelitje lokusila.

₂₅Lokha nayiphuma ngemanzini,

abanamandla bayathuthumela,

nayiphundluka esizibeni,

bayahlehla.

₂₆Isabula efika kiyo ayiyenzi litho,

ngitjho nomkhonto, neminye imihlobo yeenkhali.

₂₇Kiyo isimbi iba ngathi ziinhlanga,

ikoporo ifane nesigodo esinepehli.

₂₈Imisubela ayiyenzi ibaleke,

amatje wesarwayi afana neenhluba kiyo.

₂₉Iye, ngitjho nesibhuku sifana nehlanga kiyo;

ihleka ukukhecezela kwezenjana phezu kwayo.

₃₀Ilingaphasi layo lifana neenkghedlhu zembiza,

liveza umtlhala edakeni

inga lidosa isileyi sokubhula.

₃₁Yenza ukuzika kubile njengembiza,

inyakazise isiziba inga yimbiza yeenthako.

₃₂Ngemva kwayo kunomthala ophazimako ngemanzini,

kube ngathi ukuzika kuthukghele.

₃₃“Akunalitho emhlabenapha elilingana nayo,

mbala isidalwa esinganavalo.

₃₄Ikuqalela phasi koke okuziphakamisako,

iyikosi phezu kwakho koke okuzikhukhumezako.”