Umfanekiso ngomtjali
(Mk 4:1-9; Lk 8:4-8)
1Khona mhlokho uJesu waphuma ngekumbeni wayokuhlala eqadi kwelwandle. 2Kwabuthana kuye isiqubuthu esikhulu kangangobana wangena ngemkhunjini, wahlala phasi khibe abantu bajame eligwini. 3Wabatjela okunengi asebenzisa imifanekiso, wathi: “Kwaphuma umtjali wayokutjala imbewu. 4Kwathi nasarhatjha imbewu njalo, enye yawela eqadi kwendlela, kwafika iinyoni zayidla. 5Enye yawela ekhetheni, lapha bekunganaqulwani enengi khona. Yamila msinyana ngombana iqulwani gade iyincani. 6Kodwana kwathi lokha ilanga naliphumako, iintjalo zarhabuka bezatjhwaba ngombana bezinganamirabhu. 7Enye imbewu yawela emeveni, akhula, abe ayiminyezela. 8Kodwana enye imbewu yawela equlwanini ehle, yakhiqiza isivuno esathela ngekhulu, ngamatjhumi asithandathu, nangamatjhumi amathathu kwalokho okutjaliweko.”
9“Oneendlebe akezwe!”
Isizathu somfanekiso
(Mk 4:10-12; Lk 8:9-10)
10Abafundi beza kuJesu, bambuza bathi: “Kubayini ukhuluma nabantu ngemifanekiso na?”
11Waphendula wathi: “Ilwazi leemfihlakalo zombuso wezulu linikelwe nina, kodwana bona abakanikelwa. 12Ngambala loyo onelitho uzokungezelelelwa ukuze abe nokunengi. Kodwana onganalitho uzokwemukwa ngitjho nokuncancani anakho. 13Kungalokho ngikhuluma nabo ngemifanekiso ngombana,
“nanyana barhudule amehlo nje,
ababoni ilitho,
nanyana badose iindlebe nje,
abezwa namkha abalemuki do.
14Ngabo, isiphorofido saka-Isaya siyaphetheka sokuthi,
‘Nizakusoloko nisizwa
kodwana ningazwisisi.
Nizakusoloko nibona
kodwana ningalemuki.
15Ngambala iinhliziyo zabantwaba zilikhuni,
iindlebe zabo zizwela kude
namehlwabo bawavalile.
Nakungasinjalo bebazakubona ngamehlwabo,
bezwe ngeendlebe zabo,
balemuke ngeenhliziyo zabo, baphenduke,
nje-ke bengizabapholisa.’ ”
16“Kodwana abusisiwe amehlwenu ngombana ayabona, neendlebe zenu ngombana ziyezwa. 17Ngambala ngiqinisile ngithi kini: Abaphorofidi abanengi nabantu abalungileko bakhanukela ukubona lokho enikubonileko, kodwana azange bakubone, nokuzwa enikuzwileko, kodwana azange bakuzwe.”
UJesu uhlathulula umfanekiso ngomtjali
(Mk 4:13-20; Lk 8:11-15)
18“Lalelani-ke bonyana umfanekiso ngomtjali utjho ukuthini. 19Nanyana ngubani ozwa umlayezo ngombuso kodwana angawulemuki, unjengembewu ewele eqadi kwendlela, omumbi wafika wahluthula lokho okutjalwe kuye. 20Loyo owamukela imbewu eyawela ekhetheni ngiloyo ozwa ilizwi, alamukele msinyana ngethabo. 21Kodwana ngebanga lokobana anganamrabhu, ubambelela isikhatjhana kwaphela. Lokha nakufika imiraro namkha ukurhayilwa ngebanga lelizwi, uwohloka msinyana. 22Owamukela imbewu eyawela hlangana nameva ngiloyo ozwa ilizwi, kodwana amatshwenyeko wepilo le, kanye nokuyengwa bugwili, kwayiminyanisa bekwayenza yangaba neenthelo. 23Kodwana owamukela imbewu eyawela equlwanini ehle ngiloyo ozwa ilizwi, alilemuke. Ukhiqiza isivuno esithela ngokubuyelelwe ngekhulu, ngamatjhumi asithandathu namkha ngamatjhumi amathathu kwalokho okutjaliweko.”
Umfanekiso ngekhula
24UJesu wabatjela umfanekiso omunye wathi: “Umbuso wezulu unjengomuntu owatjala imbewu ehle esiminakhe. 25Kodwana kwathi woke umuntu asalele, isitha sakhe safika satjala ikhula hlangana nekoroyi sabe sakhamba. 26Kwathi lokha ikoroyi nayikhulako ithoma nokuphalaza nekhula nalo lazipha amandla. 27Iinceku zomuntu loyo zeza kuye, zafika zathi, ‘Kosi, azange utjale imbewu ehle esiminakho na? Alo, ikhuleli libuyaphi?’ 28Waphendula wathi, ‘Sisitha esenze lokhu.’ Zambuza zathi, ‘Ufuna bona siyoliruthula na?’ 29Waphendula wathi, ‘Awa ngombana naniruthula ikhula, ningahle niruthule nekoroyi ehlanu kwalo. 30Lisani kukhule kokubili njalo ndawonye bekube sikhathi sokuvuna. Ngesikhatheso ngizakutjela abavuni ngithi: Thomani ngokubuthelela ikhula bese nilibopha libe ziinyanda kobana liyokutjhiswa; ngemva kwalokho-ke nibuthelele ikoroyi niyithele ngesilulwini sami.’ ”
Umfanekiso ngembewu yemastadi nangesibiliso
(Mk 4:30-32; Lk 13:18-21)
31UJesu wabatjela umfanekiso omunye godu wathi: “Umbuso wezulu ufana nembewu yemastadi eyathathwa mumuntu wayitjala esiminakhe. 32Nanyana iyimbewu encani kinazo zoke, kodwana nayikhulako iba sitjalo esikhulu ukuzedlula zoke esimini, ibe mumuthi lapha iinyoni zomkayi zifika zakhele khona eengaleni zawo.”
33Godu uJesu wabatjela omunye umfanekiso wathi: “Umbuso wezulu ufana nesibiliso esathathwa mfazi wasihlanganisa neflowuru enengi kufikela lapha ihlama ikhukhumala khona.”
Ukukhuluma kwakaJesu ngemifanekiso
(Mk 4:33-34)
34UJesu wakhuluma koke lokhu esiqubuthwini ngemifanekiso, akunalitho alikhuluma kiso ngaphandle kokusebenzisa umfanekiso. 35Ngalokho kwazaliseka okwakhulunywa mphorofidi nasithi:
“Ngizakuvula umlomami ngomfanekiso,
ngiphuphume iimfihlakalo zekadeni.”
UJesu uhlathulula umfanekiso ngekhula
36Yeke watjhiya isiqubuthu, waya ngekumbeni. Abafundi bakhe beza kuye bathi: “Akhe usihlathululele umfanekiso wekhula esimini.”
37Wabaphendula wathi: “Owatjala imbewu ehle yiNdodana yoMuntu. 38Isimu liphasi, imbewu ehle madodana wombuso. Ikhula madodana wokhohlakeleko 39bese isitha esitjala ikhula nguSathana. Isivuno kuphela kwesikhathi; abavuni ziingilozi. 40Njengombana ikhula liyabuthelelwa belitjhiswe ngemlilweni, kuzokuba njalo-ke ekupheleni kwesikhathi. 41INdodana yoMuntu izakuthumela iingilozi zayo ukuyokubuthelela embusweni wayo yoke into ebanga isono nabo boke abenza ubukhohlakali. 42Zizabaphosa ngekehleni yomlilo obukhali, lapha kuzakuba khona ukulila nokugedla kwamazinyo. 43Nje-ke abalungileko bazakuphazima njengelanga embusweni kaYise wabo. Oneendlebe akezwe!”
Imifanekiso emithathu
44“Umbuso wezulu ufana nomnotho ofihlwe esimini. Lokha umuntu nawufunyanako, uyawufihla godu, bese kuthi ekuthabeni kwakhe akhambe ayokuthengisa koke anakho, athenge isimu leyo.
45“Godu umbuso wezulu ufana nomthengi ofunana namatje aligugu. 46Lokha nafumana elinenani eliphezulu, uyakhamba ayokuthengisa koke anakho, athenge ilitjelo.
47“Godu umbuso wezulu ufana nenede eyehliselwa ngelwandle, yabamba yoke imihlobo yeenhlambi. 48Kuthe bona izale, ababambi beenhlambi bayidosela ngaphandle eligwini. Yeke bahlala phasi bahlukanisa iinhlambi; ezihle zafakwa ngeenqwebini, kwathi ezingakalungi bazilahla. 49Kuzokuba njalo-ke ekupheleni kwesikhathi. Iingilozi zizakufika zehlukanise abakhohlakeleko kabalungileko, 50bese zibaphosela ngekehleni yomlilo obukhali, lapha kunokulila nokugedla kwamazinyo.”
51UJesu wababuza wathi: “Nikuzwisisile lokhu na?” Bamphendula bathi: “Iye.”
52Yena wathi kibo: “Yeke woke umfundisi womthetho ofundiswe ngombuso wezulu ufana nomnikazi wekumba okhupha ngebulungelweni lakhe amagugu amatjha namadala.”
UJesu uyaninwa eNazaretha
(Mk 6:1-6; Lk 4:16-30)
53Kuthe bona uJesu aqede ukukhuluma imifanekiso le, wasuka endaweni leyo. 54Wabuyela edorobheni lekhabo. Wafundisa ngesinagogini, kwathi labo abamuzwako barareka. Babuza bathi: “Umuntu lo ukuthethephi ukuhlakanipha kanye namandla wemikarisomraro engaka na? 55Akusiyindodana yombazi le na? Angithi unina nguMariya? Abafowabo akusinguJakopo, uJosefa, uSimoni noJudasi? 56Angithi abodadwabo boke siyabazi, bahlala lapha? Alo, umrhali lo ukuthethephi koke lokhu na?” 57Yeke bakhubeka ngaye.
Kodwana uJesu wathi kibo: “Kusemzini wekhabo nangekumbenakhe kwaphela lapha umphorofidi angahlonitjhwa khona.”
58Azange enze imikarisomraro eminengi lapho ngombana bebangakholwa kuhle.
