Umfanekiso ngomnyanya womtjhado
(Lk 14:15-24)
1UJesu wakhuluma godu ebantwini ngemifanekiso, wathi: 2“Umbuso wezulu ufana nekosi eyalungiselela indodanayo umnyanya womtjhado. 3Yathumela iinceku zayo kilabo ebebamenyelwe emnyanyeni bona ziyobatjela beze, kodwana abantwabo babhala ukuza. 4Yeke yathuma ezinye iinceku yathi, ‘Tjelani abamenyiwekwabo bonyana sele ngilungise isidlo. Iinkabi zami kanye namathole anonisiweko sele ahlatjiwe nje-ke yoke into sele ilungile. Yenize emnyanyeni womtjhado.’ 5Kodwana azange bayelele, yeke omunye waziyela esiminakhe, omunye waziyela ezintweni zakhe. 6Abanye babamba iinceku baziphatha kumbi bebazibulala. 7Ikosi yathukuthela. Yathumela ibutho layo, lafese larhayila ababulalabo belatjhisa nedorobho labo. 8Yathi eencekwini zayo, ‘Umnyanya womtjhado sewulungile, kodwana abamenyiweko azange bafaneleke ukuza. 9Nje-ke khambani niye emajikeni weendledlana nimemele emnyanyeni nanyana ngubani enimfunyanako.’ 10Yeke iinceku zaphuma zaya eendledlaneni zabutha boke abantu ezibafumanako, abalungileko nabakhohlakeleko; irhubhe lomtjhado lazala iinthekeli.
11“Kwathi ikosi nayingenako bona izokubona iinthekeli, yayelela bonyana bekunomuntu ngapho obegade angakembathi izambatho zomtjhado. 12Yabuza yathi, ‘Mngani, ungene njani ngapha ungakembathi izambatho zomtjhado na?’ Kodwana umuntu loyo watlhoga ipendulo. 13Ikosi leyo yathi eencekwini zayo, ‘Mbopheni izandla neenyawo nimphosele ngaphandle ebumnyameni lapha kuzakuba khona ukurhahlawula nokugedla kwamazinyo!’ ”
14UJesu waphetha ngokuthi: “Banengi abamenyiweko, kodwana balibinzana abakhethiweko.”
Umbuzo ngomthelo wombusi
(Mk 12:13-17; Lk 20:20-26)
15AbaFarisi bakhamba bayokulumba amano wokubamba uJesu ngamezwakhe. 16Bathumela abafundi babo kuye bakhambisana nebakaHerode bathi: “Mfundisi, siyazi bona umumuntu oqotho nokobana ufundisa indlela kaZimu ngokuya ngeqiniso. Awuyi ngabantu ngombana awukhethi ubuso. 17Akhe utjho-ke bona umbonwakho uthini na? Kghani kulungile ukukhokha umthelo wombusi omkhulu na?”
18Kodwana uJesu ngokwazi kwakhe iqhinga labo elimbi wathi: “Nina bazenzisi ndina! Nilingelani ukungithiya na? 19Ngitjengisani imali enithela ngayo!”
Bamlethela udenariyu, 20wababuza wathi: “Mfanekiso kabani lo na? Mtlolo kabani lo na?”
21Bamphendula bathi: “Mfanekiso wombusi omkhulu.” Yeke uJesu wathi kibo: “Nikelani umbusi omkhulu okungekwakhe, ninikele uZimu okungekwakaZimu.”
22Kuthe bona bezwe lokhu, barareka kwamambala. Yeke bamtjhiya lapho bakhamba.
Umbuzo ngokuvuka kwabafileko
(Mk 12:18-27; Lk 20:27-40)
23Khona mhlokho abaSadusi abakholwa bonyana akukho ukuvuka kwabafileko beza kuJesu bambuza 24bathi: “Mfundisi, uMosi wasitjela bona indoda nayihlongakala inganabantwana, umfowabo kufanele angene umhlolokazayo bese ambelethele abantwana. 25Yeke bekukhona izelamani ezilikhomba ebezihlala khonapha. Izibulo lathatha kodwana lahlongakala linganabantwana, yeke latjhiya umhlolokazalo, wangenwa mfowabo. 26Kwenzeka soneso ngeselamani sesibili nesesithathu, bekwaba ngesekhomba. 27Ekugcineni umhlolokazi loyo naye wahlongakala. 28Manje-ke mhlana abafileko bavukako ekufeni, uzokuba mkabani kabalikhomba njengombana boke gade bamthethe na?”
29UJesu wabaphendula wathi: “Niyaphosisa niyazi! Kanti aniyazi imitlolo namkha amandla kaZimu na? 30Ekuvukeni, abantu angeze bathatha namkha bende ngombana bazokufana neengilozi ezisezulwini. 31Kodwana mayelana nokuvuka kwabafileko: Kghani anikafundi bona uZimu wathini kini? 32Angithi wathi, ‘NginguZimu ka-Abrahamu, uZimu ka-Isaka noZimu kaJakopo.’ AkasinguZimu wabafileko, kodwana ungowabaphilako.”
33Kwathi lokha iinqubuthu nazizwa lokhu, zarareka ngefundiswakhe leyo.
Umyalo ongomkhulu
(Mk 12:28-34; Lk 10:25-28)
34Kwathi bona abaFarisi bezwe bonyana uJesu uvale abaSadusi umlomo, bahlangana ndawonye. 35Omunye wabo, osisazi somthetho, wamlinga ngombuzo lo, wathi: 36“Mfundisi, ngimuphi umyalo ongomkhulu emthethweni na?”
37UJesu wamphendula wathi: “ ‘Thanda uSomnini uZimakho ngehliziywakho yoke, ngomphefumulwakho woke nangomkhumbulwakho woke.’ 38Lo myalo wokuthoma nongomkhulu. 39Wesibili ofana nawo ngothi, ‘Thanda umakhelwanakho njengombana uzithanda wena.’ 40Woke umthetho kanye nabaphorofidi kudzimelele emiyalweni emibili le.”
Umbuzo ngoKrestu
(Mk 12:35-37; Lk 20:41-44)
41Kwathi abaFarisi basahlangane ndawonye, uJesu wababuza wathi: 42“Nicabangani ngoKrestu na? Uyindodana kabani na?”
Bamphendula bathi: “UyiNdodana kaDavida.”
43Yeke uJesu wabuza wathi: “Alo, kubayini-ke uDavida nakhuluma ngoMoya ambize bona yiKosi na? Angithi wathi,
44“ ‘USomnini wathi eKosinami:
Hlala ngesidleni sami
bekube kulokha nangenza izitha zakho
zibe sinabelo seenyawo zakho.’
45Yeke, nangabe uDavida umbiza ngokuthi ‘Kosi’,
angaba yindodanakhe njani na?”
46Akakho noyedwa owakghona ukuphendula uJesu. Nje-ke kusukela mhlokho akakho noyedwa owakhe wagabaza wambuza eminye imibuzo.
