UJesu ukhuluma ngokugirizwa kwethempeli
(Mk 13:1-2; Lk 21:5-6)
1UJesu besele aphumile ngethempelini, akhamba lokha abafundi bakhe nabazakuza kuye bamkhombisa umakhiwo wethempeli. 2Wathi kibo: “Niyazibona zoke izintwezi na? Ngiqinisile ngiyanitjela bona akunalitje nalinye lapha elizakusala liphezu kwelinye, elinye nelinye lawo lizokugirika.”
3Kwathi uJesu asahlezi entabeni ye-Oliva, abafundi beza kuye ngasese, bafese bathi: “Akhe usitjele bona izintwezi zizokwenzeka nini? Sizakuba yini isibonakaliso sokuza kwakho nesokuphela kwesikhathi na?”
4UJesu waphendula wathi: “Yelelani bona kungabi nomuntu onikhohlisako 5ngombana banengi abazakuza ebizweni lami bathi, ‘NginguMesiya!’ Nje-ke bazakukhohlisa abanengi. 6Nizakuzwa ngezipi nangamahlebezi wezipi; kodwana qinisekani bonyana anethuki. Izinto ezinjalo kumele zenzeke, kodwana azitjho bona isiphetho sesifikile. 7Isizwe sizakuvukela isizwe nombuso uvukele umbuso. Kuzakuba khona indlala nokusikinyeka kwephasi eendaweni ezahlukahlukeneko. 8Koke lokhu kukuthoma kwemirhelo.
9“Ngemva kwalapho nizakukhaphelwa ekuhlungaphazweni nekubulaweni. Begodu nizokuzondwa ngizo zoke izizwe ngebanga lami. 10Ngesikhatheso abanengi bazakuhlubuka ekukholweni bese bayakhaphelana bebazondane. 11Kuzakuba khona abaphorofidi abanengi bamanga bakhohlise abantu abanengi. 12Ngenca yokwanda kobukhohlakali, ithando labanengi lizokuya liphola. 13Kodwana loyo ozokubambelela bekube sekupheleni uzokusindiswa. 14Nje-ke ivangeli lombusweli lizakutjhunyayelwa ephasini loke, kube bufakazi kizo zoke izizwe ngaphambi kobana kufike isiphetho.”
Isinyenyiso esibhubhisako
(Mk 13:14-23; Lk 21:20-24)
15“Lokha nanibona endaweni ecwengileko kujame isinyenyiso esibhubhisako, okuyinto eyakhulunywa mphorofidi uDanyela, ofundako azwisise. 16AbaseJudiya ababalekele eentabeni. 17Ophezu kwekumbakhe angahliki athi uyokuthatha okuthileko ngekhaya. 18Osesimini angabuyeli ekhaya ayokuthatha isambatho sakhe. 19Maye kuzokuthusa kangangani emihleni leyo ebafazini abasemzimbeni nakibomma abamunyisako! 20Thandazani bona ukubaleka kwenu kungabi sebusika namkha ngeSabatha 21ngombana iinhlupheko ngesikhatheso zizabe zizimbi khulu, zingalingani nalezo ezakhe zaba khona kusukela ekuthomeni kwephasi bekwaba kunjesi nezingasoze zaba khona godu. 22Nakube amalanga lawo bekangakancitjhiswa, akakho obezakusinda, kodwana ngenca yalabo abakhethiweko, amalanga lawo azokuncitjhiswa.
23“Ngesikhatheso nanyana ngubani othi kini, ‘Qalani nangu uMesiya!’ namkha, ‘Nanguya!’ ningamkholwa umuntu loyo. 24Ngambala abosingamesiya nabaphorofidi bamanga bazakuvela, benze iimbonakaliso nemikarisomraro emikhulu ukuze nakwenzekileko bakhohlise ngitjho nabakhethiweko. 25Qalani, nginitjele lokhu ngaphambi kobana kufike isikhathi.
26“Yeke nakube nanyana ngubani uthi kini, ‘Qalani nanguya erhalawumbeni,’ ningayi lapho; nanyana asithi, ‘Nanguya ngemalawini angaphakathi,’ ningakukholwa lokho. 27Yeke njengombana umbani ovela ngepumalanga ubonakala ngitjho netjingalanga, kuzokuba njalo ukuza kweNdodana yoMuntu.
28“Nanyana kukuphi lapha kunesidumbu khona, amadlanga ahlangana lapho.”
Ukuza kweNdodana yoMuntu
(Mk 13:24-27; Lk 21:25-28)
29“Khonokho ngemva kweenhlupheko zemihleni leyo,
“ilanga lizakufiphala,
inyezi ingakhanyisi,
iinkwekwezi zizakuwa emkayini,
amandla wezulwini asikinywe.
30“Ngesikhatheso isibonakaliso seNdodana yoMuntu sizakuvela emkayini, kuthi zoke izizwe zephasi zilile. Zizakubona iNdodana yoMuntu isiza ngamafu womkayi, ngamandla nangephazimulo ekulu. 31Yeke izakuthuma iingilozi zayo ngokulila okukhulu kwepalapala. Zona zizakubuthelela abakhethekileko bayo emagumbini womane wephasi, ukusuka ehlangothini elinye lomkayi bekube kukelinye.
Ifundiso ngomuthi wamakhiwani
(Mk 13:28-31; Lk 21:29-33)
32“Nje-ke fundani isifundo nasi ngomuthi wamakhiwani: Msinyana ngemva kobana iimpanjana zawo zihlangene, kumila amakari, seniyazi-ke bonyana ihlobo seliseduze. 33Ngokunjalo-ke nanibona zoke izintwezi, nizakwazi bonyana sekuseduze, iye sekusemnyango. 34Ngiqinisile ngiyanitjela bona isizukulwanesi ngambala asisoze sadlula zingakenzeki zoke izintwezi. 35Izulu nephasi kuzakudlula, kodwana amezwami angekhe adlula.”
Isikhathi sokubuya kwakaJesu asaziwa
(Mk 13:32-37; Lk 17:26-30,34-36)
36“Akakho noyedwa owaziko ngelangelo nangesikhatheso, neengilozi ezisezulwini azazi ilitho, ngitjho neNdodana ngokwayo ayazi; kodwana nguBaba kwaphela owaziko. 37Njengombana kwakunjalo emihleni kaNowa, kuzakuba njalo-ke ukuza kweNdodana yoMuntu. 38Emihleni leyo ngaphambi komthwalela, abantu bebagoma, basela, batjhada bebatjhadise, kufikela elangeni uNowa angena ngalo ngemkhunjini. 39Bebangakhathali ngalokho okuzokwenzeka bekwaba kumhlana kufika umthwalela warhurhula boke. Kuzokuba njalo-ke ukuza kweNdodana yoMuntu. 40Ngesikhatheso amadoda amabili azabe asebenza esimini; kuzakuthathwa eyodwa kutjhiywe eyodwa. 41Abafazi ababili bazabe basila elitjeni, kuthathwe oyedwa kutjhiywe oyedwa.
42“Yeke, hlalani nilindile ngombana anazi bona iKosenu izakuza nini. 43Kodwana yazini lokhu: Nakube umninikhaya bekasazi bona isela lizakufika ngasiphi isikhathi sobusuku, ubazakuhlala alindile, ubangekhe avumela bonyana indlwakhe ifahlwe. 44Nani-ke kumele nihlale nilindile ngombana iNdodana yoMuntu izakufika ngesikhathi eningakayilindeli ngaso.
45“Ngiyiphi-ke inceku ethembekileko nehlakaniphileko umniniyo ayibeke bona yeluse iinsebenzi ekhaya, iziphe ukugoma kwazo ngesikhathi esifaneleko na? 46Kuzakuba kuhle encekwini leyo lokha umniniyo nafikako ayifumana isenza lokho. 47Ngiqinisile ngiyanitjela bona uzayibeka bona yeluse yoke ipahlakhe. 48Kodwana akhesithi inceku leyo ikhohlakele bese izitjela ithi, ‘Ikosami isekukhambeni, kuzayithatha isikhathi ukubuya’, 49bese idula ezinye iinceku esebenza nazo, irhiribidele beyidakwe neendakwa. 50Umnininceku leyo uzakufika ngelinye ilanga ingakamlindeli ngesikhathi engasaziko. 51Uzayidabula iinquqwana ayilahlele endaweni yabazenzisi lapha kuzakuba khona ukurhahlawula nokugedla kwamaziyo.”
