UMATEWU 5

₁Kwathi lokha uJesu nabona iinqubuthu, wenyukela entabeni. Sele ahlezi phasi, abafundi bakhe beza kuye. ₂Yeke wathoma ukubafundisa wathi:

₁₁“Nibusisiwe lokha nabanithukako, banizuma bebakhulume koke okumbi ngani ngebanga lami. ₁₂Thabani nithokoze ngombana umvuzo wenu mkhulu ezulwini. Nabaphorofidi ababakhona ngaphambi kwenu babazuma ngayo indlela le.”

₁₃“Nina nilitswayi lephasi, kodwana itswayi nasele liqwatjhile, ubutswayi balo bungabuyiselwa njani na? Alisenamsebenzi, kwaphela selilungele ukulahlelwa ngaphandle, abantu baligadange.

₁₄“Nina nimkhanyo wephasi. Umuzi owakhiwe entabeni angekhe wafihleka. ₁₅Akakho othi angakhanyisa isibani asibeke ngaphasi kwesitja, kodwana usibeka phezu kwesitja lapha sizakukhanyisela khona woke ongekumbeni. ₁₆Ngokunjalo akukhanye ukukhanya kwenu phambi kwabantu ukuze babone imisebenzenu emihle, badumise uYihlo osezulwini.”

₁₇“Ningadlumbani bonyana ngizele ukuzokuchitha umthetho namkha abaphorofidi. Angikazeli ukuzokuchitha, kodwana ngizele ukuzokugcwalisa. ₁₈Ngambala ngiyanitjela bona kungakadluli izulu nephasi, akunaledere nalinye, ngitjho nesiqetjhana segama esizokudlula emthethweni bekupheliswe koke. ₁₉Yeke, nanyana ngubani owephula ngitjho nomncani wemiyalo le bese afundise nabanye ukwenza njalo, uzakubizwa bona mncani embusweni wezulu. Kodwana nanyana ngubani oyenzako abe ayifundise, uzakubizwa bona mkhulu embusweni wezulu ₂₀ngombana ngiyanitjela bonyana nakube ukulunga kwenu akudluli kwabafundisi bomthetho nabaFarisi, anisoze nangena embusweni wezulu.”

₂₁“Nizwile bona abantu ekadeni batjelwa kwathiwa, ‘Ungabulali; ngiloyo naloyo obulalako uzokugwetjwa.’ ₂₂Kodwana kwanjesi ngithi kini ngiloyo naloyo othukuthelela umfowabo uzokugwetjwa. Godu nanyana ngubani othi kumfowabo, ‘Nto ndina!’, uzokudoselwa ebandla. Godu nothi kumfowabo, ‘Sidlhadlha ndina!’, uzokuba sengozini yokuphoselwa emlilweni wesirhogo. ₂₃Yeke lokha nawuletha umnikelwakho e-aldarini, khonapho bese uyakhumbula bona umfowenu unamavundo nawe, ₂₄tjhiya umnikelwakho lapho phambi kwe-aldari, ukhambe khonokho uyokubuyisana naye bese uyabuya-ke uzokunikela umnikelwakho.

₂₅“Rhaba ulungise indaba naloyo okulwisako nisesendleleni yokuya ebandla, nakungasinjalo uzakunikela ezandleni zomgwebi, yena akunikele ezandleni zabalindi, uphoselwe ngesikhungweni. ₂₆Ngiqinisile ngithi kuwe uzakubhadla ngapho kufikela bewukhokhe ngitjho nopenyanakho wokugcina.”

₂₇“Nizwile bona abantu ekadeni batjelwa kwathiwa, ‘Ungahlobongi.’ ₂₈Kodwana ngiyanitjela bona nanyana ngubani oqala umfazi amkhanuke sele ahlobonge naye ngehliziywenakhe. ₂₉Nakube ilihlo lakho langesigomeni likwenza wone, ligobhodlhe ulilahle! Kungcono khulu ukulahlekelwa ngesinye sezitho zakho zomzimba kunobanyana umzimbakho woke uphoselwe ngesirhogweni. ₃₀Nangabe isandla sakho sangesigomeni sikwenza bona wone, siqunte usilahle! Kungcono khulu ukulahlekelwa sisandla sakho kunobanyana umzimbakho woke uphoselwe ngesirhogweni.”

₃₁“Godu kwathiwa, ‘Nanyana ngubani otlhalana nomkakhe kufanele amnikele incwadi yesahlukaniso.’ ₃₂Kodwana ngithi kini nanyana ngubani otlhala umkakhe ngaphandle kweenzathu zokuhlobonga, umbangela bona ahlobonge begodu nanyana ngubani othatha umfazi otlhaliweko uyahlobonga.”

₃₃“Nizwile bona abantu ekadeni batjelwa kwathiwa, ‘Ungafungi ngamanga, kodwana yenza iimfungo owazenza kuSomnini.’ ₃₄Kodwana ngiyanitjela bona ningafungi nakanye, kungabi ngezulu ngombana lisihlalo sobukhosi sakaZimu, ₃₅namkha ngephasi ngombana lisinabelo seenyawo zakhe, namkha ngeJerusalema ngombana lilidorobho leKosi ekulu. ₃₆Ungafungi ngehlokwakho ngombana angekhe watjhugulula ngitjho nasinye isihlutjhwana sibe mhlophe namkha sibe nzima. ₃₇Kwaphela yithi, ‘Iye, iye’ namkha, ‘Awa, awa’. Okudlula lokhu kuvela komumbi.”

₃₈“Nizwile bona kwathiwa, ‘Ilihlo ngelihlo, izinyo ngezinyo.’ ₃₉Kodwana kwanjesi ngithi kini: Ningajamelani nesikhohlakali. Umuntu nakuwahla emhlathini wangesigomeni, mnikele nomunye umhlathi. ₄₀Nakube kukhona ofuna ukukudosela ebandla kobana akwemuke isambatho sakho, mnikele nesinye. ₄₁Okukatelela bona ukhambe naye ikhilomitha elilodwa, khamba naye amakhilomitha amabili. ₄₂Yipha woke umuntu okubawa okuthileko, ungabagodleli ababoleka kuwe.”

₄₃“Nizwile bona kwathiwa, ‘Thanda umuntu womphakathi uzonde isitha sakho.’ ₄₄Kodwana manjesi ngithi kini: Thandani izitha zenu, nithandazele labo abanizumako, ₄₅ukuze nibe bantwana bakaYihlo osezulwini ngombana wenza ilanga lakhe liphumele abambi nabalungileko, anise nezulu kabalungileko nabakhohlakeleko. ₄₆Yeke nanithanda labo abanithandako, ninomvuzo bani na? Angithi nabathelisi benza njalo? ₄₇Godu nanibingelela abafowenu kwaphela, nizakuthi nibaphala ngani abanye abantu na? Angithi nabatjhili bayakwenza lokho na? ₄₈Yeke yibani ngabapheleleko njengombana noYihlo osezulwini aphelele!”