UMIKHA 4

₁Kuzakufika isikhathi lapha

intaba yethempeli lakaSomnini

izakunzinza khona esiqongolweni seentaba;

izakuphakanyiswa yengamele imibundu yoke;

yeke izizwe zizayirhuluphela.

₂Izizwe zoke zizakuhlangana zithi:

“Nambani sikhambeni,

senyukeleni entabeni kaSomnini,

ekumbeni kaZimu wakaJakopo.

USomnini uzasifundisa imithetho yakhe;

ukuze sikhambe ngeendlela zakhe.”

Ngambala kuzakubethwa umthetho eZiyoni,

kuphume ilizwi lakaSomnini eJerusalema.

₃USomnini uzakugweba izizwe zoke

begodu ararulule imiraro yezizwe ezinengi

eziseduze nezikude.

Zizakuthatha iinsabula zazo

zenze ngazo amalembe wokulima;

zithathe nemikhonto yazo

zenze imikhwa yokuqopha imithi.

Izizwe angeze zisaphakamiselana iinkhali,

namkha zizibandulele ipi.

₄Woke umuntu uzazigedla ngaphasi

kwesidiribe sakhe,

nanyana ngaphasi komuthakhe wamakhiwani.

Yeke akunamuntu ozabethusa.

Ngambala uSomnini uSomandla ukhulumile.

₅Ngitjho nanyana izizwe zoke

zingathembela kibosingazimu bazo,

kodwana thina sizakuthembela kuSomnini

uZimethu nini nanini.

“ngizakubuthelela abatshinyekileko;

ngihlanganise ndawonye abaphadlhalajiweko

nalabo engabazwisa ubuhlungu.

₇Abatshinyekileko ngizabenza isizwe esikhulu,

abaqotjhiweko ngibenze isizwe esinamandla.

USomnini uzakubusa phezu kwabo entabeni yeZiyoni

kusuka mhlokho bekube nini nanini.

₈Wena-ke Sithala sokwelusa umhlambi,

wena Ntatjana yendodakazi yeZiyoni,

umbuso waphambilini uzakubuyiselwa kuwe,

ngitjho ubukhosi bendodakazi yeJerusalema.”

₉Alo, urhahlawulelani-ke gadesi Jerusalema,

nangabe unekosi na?

Kghani umlulekakho uhlongakele,

nawulokhu uzibinyabinya inga umfazi

oseenhlungwini zokubeletha nje na?

₁₀Yewuzibinyabinye urhuwelele

njengomfazi obelethako

wena ndodakazi yeZiyoni

ngombana ngambala uzakuphuma ngedorobhenapha

ukhambe uhloma umtlhatlhana emmangweni

bewuyokufika eBhabheli.

Lapho uzakwenyulwa;

khonapho uSomnini uzakuhlenga esandleni sezitha zakho.

₁₁Ngambala izizwe ezinengi

zihlangene ngawe Ziyoni,

zithi: “Ayirhubutjhwe iZiyoni le,

ukuze siyibone kuhle!”

₁₂Kodwana izizwezi aziwazi

umkhumbulo kaSomnini

namaqhingakhe aziwalimuki.

Ngambala uzazibuthelela

njengeenqwambe zekoroyi eselelweni,

₁₃bese uthi: “Sikima ugadange, ndodakazi yeZiyoni

ngombana ngizakuhlomela iimpondo zesimbi,

ngikufake iinqatha zekoporo

bese upitliza izizwe ezinengi.

Ulethe kimi iinzuzo zazo

ezizifumene ngobugirikijani,

kimi mina Kosi yephasi loke.”

₁₄Lokha nawubuthelela amabuthwakho,

Dorobho lemigulukudu,

izitha zizabe zisizombelezile.

Zizakusawula umbusi wakwa-Israyeli

emhlathini ngentonga.