Abahlali beJerusalema
1Ngemva kobana abarholi babantu banzinze eJerusalema, abantu benza ifumbe ngombana bekufuneka munye umndeni njalo kelitjhumi ozokuhlala eJerusalema, idorobho elicwengileko. Eminye imindeni elithoba beyizokuhlala emizaneni eminye. 2Bekuthi lokha umuntu nomndenakhe nabazinikela ukuhlala eJerusalema, abantu bababuke.
3Amabizo alandelako ngeweenhloko zemindeni ebegade ibuya esifundeni sakwaJuda kobana izokuhlala eJerusalema. Nanyana inengi lama-Israyeli, abaphristi, amaLevi, iinsebenzi zethempelini kanye neenzukulwana zeenkhulu zakaSolomoni belihlala omunye nomunye endawenakhe emizini yakwaJuda, 4amanye wamaJuda namaBhenjamini anzinza eJerusalema.
Eenzukulwaneni zakaJuda iinhloko zemindenezo bekungilezi:
u-Ataya umsa ka-Uziya omsa kaZakariya umsa ka-Amariya omsa kaTjhefathiya umsa kaMahalaliyeli, okuziinzukulwana zakaPeretsi;
5uMaseya umsa kaBharuki omsa kaKolirhoze umsa kaRhazaya omsa ka-Adaya umsa kaJoyaribu omsa kaZakariya umsa womTjhiloni. 6Zoke iinzukulwana zakaPeretsi ebezihlala eJerusalema bezimakhulu amane namatjhumi asithandathu nabunane. Lawo bekumadoda aziingorho.
7Eenzukulwaneni zakaBhenjamini iinhloko zemindeni bekungilezi:
uSalu umsa kaMetjhulamu omsa kaJowedi umsa kaPedaya omsa kaKholaya umsa kaMaseya omsa ka-Itiyeli umsa ka-Isaya;
8uGabhayi noSalayi abafika ngemva kwesikhathi. Isibalo sabo besimakhulu alithoba namatjhumi amabili nabunane. 9Omunye bekunguJoweli umsa kaZikiri, owengamele amadoda lawo,
kanye noJuda umsa kaHasenuwa ogade asisandla sakamengameli wedorobho iJerusalema.
10Abaphristi bekungilaba:
uJedaya umsa kaJoyaribu, uJakini,
11uSeraya umsa kaRhilikhiya omsa kaMetjhulamu umsa kaTsadokhi omsa kaMerayothi umsa ka-Arhithubi ogade asikhulu sethempeli lakaZimu 12nabafowabo egade basebenza ethempelini. Isibalo sabo besimakhulu abunane namatjhumi amabili nambili.
Omunye bekungu-Adaya umsa kaJerorhamu omsa kaPelalaya umsa ka-Amatsi omsa kaZakariya umsa kaPatjhirhuri omsa kaMalikiya 13nabafowabo okuziinhloko zemindeni. Isibalo sabo besimakhulu amabili namatjhumi amane nambili.
Omunye bekungu-Amatjhisayi umsa ka-Azareli omsa ka-Arhizayi umsa kaMetjhilemothi omsa ka-Imeri 14nabafowabo okumadoda aziingorho. Isibalo sabo besilikhulu namatjhumi amabili nabunane. UZabidiyeli umsa kaHagedolimu gade angumengamelabo.
15AmaLevi bekungilawa:
uTjhemaya umsa kaRhatjhubi omsa ka-Azrikamu umsa kaRhatjhabiya omsa kaBhuni;
16uTjhabetayi noJozabadi ebegade bangabanye babaphathi bamaLevi. Bona gade baqalene nomsebenzi ongaphandle kwethempeli lakaZimu.
17Omunye bekunguMataniya umsa kaMika omsa kaZabadi umsa ka-Asafa ogade amkhaleli orhola indumiso ngomthandazo.
Omunye bekunguBhakhibhukhiya osisandla sakaMataniya.
Omunye godu bekungu-Abida umsa kaTjhamuwa omsa kaGalali umsa kaJedutuni.
18Sele awoke amaLevi ngedorobheni elicwengileko, bekamakhulu amabili namatjhumi abunane nane.
19Abalindisango bekungilaba:
u-Akhubu, uThalimoni nabafowabo. Bona bebasoloko baqaphele amasango. Isibalo sabo besilikhulu namatjhumi alikhomba nambili.
20Inengi lama-Israyeli, abaphristi namaLevi belisemizini eminye yakwaJuda, omunye nomunye azihlalela elifeni lakhe. 21Kodwana iinsebenzi zethempeli bezihlala e-Ofeli, zenganyelwe nguTsirha noGitjhipha.
22Umengameli wamaLevi eJerusalema bekungu-Uzi umsa kaBhani omsa kaRhatjhabiya umsa kaMataniya omsa kaMika. U-Uzi lo bekusizukulwana sabo-Asafa ebebabakhaleli ekonzweni yokulotjha uZimu ngethempelini. 23Imisebenzi yangemihla yabakhalelaba beyingaphasi komyalo owawujanyiswe nguDavida ikosi.
24UPetharhiya umsa kaMetjhezabeli weenzukulwana zakaZerarhi umsa kaJuda, gade amyelelisi wekosi yePheresiya eendabeni zoke zabantu besifunda sakwaJuda.
Imizi esemaphandleni weJerusalema
25Mayelana nemizi esemaphandleni: Abanye babantu bakwaJuda bebahlala eKhiriyathi-Araba nemizayo, eDiboni nemizayo, eJekhabitsiyeli nemizanayo. 26Abanye bebahlala eJetjhuwa, eMolada, eBhethe-Pelethi, 27eRhatsari-Tjhuwali, eBheritjheba nemizayo, 28eTsikhilagi, eMekona nemizayo, 29e-Eni-Rimoni, eTsora, eJarimuthi, 30eZanowarhi, e-Adulamu nemizanayo, eLakitjhi nemimangwayo, e-Azekha nemizayo. Nje-ke banzinza kusukela eBheritjheba bekwaba semrhobeni weHinomu.
31Abantu bakwaBhenjamini bebanzinze ukusukela eGeba ukuya eMikimasi, e-Aya, eBhethe-Eli nemizayo, 32e-Anatothi, eNobi, e-Ananiya, 33eRhatsori, eRama, eGitayimu, 34eRhadida, eTseboyimu, eNebhalathi, 35eLodi, e-Ono nemrhobeni waboSosino. 36Ezinye iinqhema zamaLevi kwaJuda zahlanganiswa nebakwaBhenjamini.
