UNUMERI 2

₁USomnini wakhuluma noMosi no-Aroni wathi: ₂“Lokha ama-Israyeli nakahloma amatendawo kufuze ahlome magegana netende lokuhlanganela kudanyana nalo. Omunye nomunye ahlome itende lakhe esibekisweni sekoro yekhabo ngokwetshwayo lomndeni waboyise.

₃“BakwaJuda kufuze bahlome amatendabo esibekisweni sabo ukuyela ngepumalanga. Umrholi wekoro yakwaJuda kube nguNarhitjhoni umsa ka-Aminadaba. ₄Abatlolisweko bebutho lakhe bazakuba ziinkulungwana ezimatjhumi alikhomba nane namakhulu asithandathu. ₅Bakwa-Isakari kufuze bahlome amatendabo ngehlangothini lakwaJuda. Umrholi wekoro leyo kube nguNataneli umsa kaTsuwari. ₆Abatlolisweko bebutho lakhe bazakuba ziinkulungwana ezimatjhumi amahlanu nane namakhulu amane. ₇BakwaZebuloni nabo bahlome khonapho. Umrholi wekoro leyo kube ngu-Eliyabu umsa kaRheloni. ₈Abatlolisweko bebutho lakhe bazakuba ziinkulungwana ezimatjhumi amahlanu nalikhomba namakhulu amane. ₉Isibalo soke samabutho ahlome noJuda sizakuba ziinkulungwana ezilikhulu namatjhumi abunane nasithandathu namakhulu amane wabatlolisweko. Ngibo abazakuphuma qangi.

₁₀“Isibekiso sakwaRubeni sizakuba ngesewula lapha bazakuhloma khona amatendabo. Umrholi wekoro leyo kube ngu-Elitsuri umsa kaTjhedewuri. ₁₁Abatlolisweko bebutho lakhe bazakuba ziinkulungwana ezimatjhumi amane nasithandathu namakhulu amahlanu. ₁₂BakwaSimiyoni kufuze bahlome amatendabo ngehlangothini lakwaRubeni. Umrholi wekoro leyo kube nguTjhelumiyeli umsa kaTsuritjhadayi. ₁₃Abatlolisweko bebutho lakhe bazakuba ziinkulungwana ezimatjhumi amahlanu nalithoba namakhulu amathathu. ₁₄BakwaGadi nabo bahlome khonapho. Umrholi wekoro leyo kube ngu-Eliyasafa umsa kaDewuyeli. ₁₅Abatlolisweko bebutho lakhe bazakuba ziinkulungwana ezimatjhumi amane nahlanu namakhulu asithandathu namatjhumi amahlanu. ₁₆Isibalo soke samabutho ahlome noRubeni sizakuba ziinkulungwana ezilikhulu namatjhumi amahlanu nanye namakhulu amane namatjhumi amahlanu. Ngibo abazakuphuma kwesibili.

₁₇“Ngemva kwalokho itende lokuhlanganela lizakuwiswa kanye nekampa yamaLevi ephakathi kweenkampa ezinye. Ama-Israyeli azakuwisa amatendawo ngendlela awahlome ngayo, ikoro ngekoro endawenayo njengokwesibekiso.

₁₈“Isibekiso sakwa-Efrayimu sizakuba ngetjingalanga lapha bazakuhloma khona amatendabo. Umrholi wekoro leyo kube ngu-Elitjhama umsa ka-Amihudi. ₁₉Abatlolisweko bebutho lakhe bazakuba ziinkulungwana ezimatjhumi amane namakhulu amahlanu. ₂₀BakwaManase kufuze bahlome amatendabo ngehlangothini lakwa-Efrayimu. Umrholi wekoro leyo kube nguGamaliyeli umsa kaPedatsuri. ₂₁Abatlolisweko bebutho lakhe bazakuba ziinkulungwana ezimatjhumi amathathu nambili namakhulu amabili. ₂₂BakwaBhenjamini nabo bahlome khonapho. Umrholi wekoro leyo kube ngu-Abidani umsa kaGidiyoni. ₂₃Abatlolisweko bebutho lakhe bazakuba ziinkulungwana ezimatjhumi amathathu nahlanu namakhulu amane. ₂₄Isibalo soke samabutho ahlome no-Efrayimu sizakuba ziinkulungwana ezilikhulu nabunane nekhulu. Ngibo abazakuphuma kwesithathu.

₂₅“Isibekiso sakwaDani sizakuba ngetlhagwini lapha bazakuhloma khona amatendabo. Umrholi wekoro leyo kube ngu-Arhiyezeri umsa ka-Amitjhadayi. ₂₆Abatlolisweko bebutho lakhe bazakuba ziinkulungwana ezimatjhumi asithandathu nambili namakhulu alikhomba. ₂₇Bakwa-Atjheri kufuze bahlome amatendabo ngehlangothini lakwaDani. Umrholi wekoro leyo kube nguPagiyiyeli umsa ka-Okirani. ₂₈Abatlolisweko bebutho lakhe bazakuba ziinkulungwana ezimatjhumi amane nanye namakhulu amahlanu. ₂₉BakwaNafitali nabo bahlome khonapho. Umrholi wekoro leyo kube ngu-Arhira umsa ka-Enani. ₃₀Abatlolisweko bebutho lakhe bazakuba ziinkulungwana ezimatjhumi amahlanu nantathu namakhulu amane. ₃₁Isibalo soke samabutho ahlome noDani sizakuba ziinkulungwana ezilikhulu namatjhumi amahlanu nalikhomba namakhulu asithandathu. Ngibo abazakuphuma kokugcina ngaphasi kwesibekiso sabo.”

₃₂Lawo-ke ma-Israyeli atloliswa ngokuya ngokwezindlu zaboyise. Isibalo sawo woke atloliswako ngokwamabuthwawo saba ziinkulungwana ezimakhulu asithandathu nantathu namakhulu amahlanu namatjhumi amahlanu. ₃₃Ikoro yakwaLevi yona akhange itloliswe neenkoro ezinye. Kwaba njengombana uSomnini bakayale uMosi.

₃₄Ama-Israyeli enza koke uSomnini ebe ayale uMosi ngakho. Nje-ke ahloma amatendawo ngokweembekiso zawo begodu aphuma ngokwemindeni yaboyise nangokwezindlu zawo.