UNUMERI 25

₁Kwathi lokha ama-Israyeli asahlezi eTjhithimu, amadoda athoma ukungwadla namadodakazi wakwaMowabi. ₂Amadodakazi lawo awamema emihlatjelweni yabozinyana bawo. Amadoda lawo adla abe alotjha abozinyana bamadodakazi lawo. ₃Ngalokho ama-Israyeli azibophelela kuBhali wePewori.

Nje-ke ilaka lakaSomnini lavutha ngama-Israyeli ₄bewathi kuMosi: “Thatha boke abarholi babantwaba bese ubaphanyeka babe selangeni phambi kwakaSomnini ukuze ilaka lakaSomnini lizokwazi ukusuka kuma-Israyeli.”

₅Yeke uMosi wathi ebagwebini bakwa-Israyeli: “Omunye nomunye wenu akabulale abantu abengameleko abazibophelele kuBhali wePewori.”

₆Khonapho, nango omunye wama-Israyeli aletha umfazi wakwaMidiyani emndeninakhe, uMosi nomkhambathi woke wakwa-Israyeli baqalile. Ngesikhatheso bebasalila phambi kwetende lokuhlanganela. ₇Kwathi lokha uFiniyasi umsa ka-Elazara omsa ka-Aroni umphristi nakabona lokho, wasikima watjhiya umkhambathi, wathatha umkhontwakhe, ₈walandela umuntu wakwa-Israyeli loyo ngencabafazi ngetendeni. Kwathi basalele wabahlaba bobabili, indoda nomfazi loyo, umkhonto waphundlukela esiswini somfazi. Emva kwalokho isifo sasuka kuma-Israyeli. ₉Labo ebegade sele bafe ngesifo bebaziinkulungwana ezimatjhumi amabili nane.

₁₀USomnini wathi kuMosi: ₁₁“UFiniyasi umsa ka-Elazara omsa ka-Aroni umphristi, urhobhise ilaka lami kuma-Israyeli ngombana yena ube netjisakalo ngami. Ngalokho akhange ngiwabhubhise ama-Israyeli ngesikhwele enginaso. ₁₂Yeke mtjele bona ngenza naye isivumelwano sokuthula: ₁₃Yena neenzukulwana zakhe bazakwamukeliswa isivumelwano sobuphristi nini nanini ngombana ube nesikhwele ngoZimakhe, wabuye wenzela ama-Israyeli itethelelo.”

₁₄Ibizo lendoda yakwa-Israyeli eyabulawa nomfazi wakwaMidiyani bekunguZimri umsa kaSalu oyihloko yomndeni wakwaSimiyoni. ₁₅Ibizo lomfazi wakwaMidiyani owabulawako bekunguKozibi indodakazi kaTsuri oyihloko yemindeni yekoro yakwaMidiyani.

₁₆USomnini wathi kuMosi: ₁₇“Phathani amaMidiyani njengezitha zenu bese niyawabulala, ₁₈ngombana nawo aniphatha njengezitha ngobuqili bawo lokha nakaniyenga ngendaba yePewori. Kwaba njalo nangendaba kadadwawo uKozibi indodakazi yomrholi wakwaMidiyani, owabulawa ngelanga lesifo esabangwa yiPewori.”