UNUMERI 28

₁USomnini wakhuluma noMosi wathi: ₂“Yala ama-Israyeli uthi kiwo, ‘Yelelani bona kulethwa kimi ngesikhathi esifaneleko iminikelwami okutjho ukudla okumnikelo okhethekileko, owamukelekako kimi.’

₃“Godu yithi kiwo, ‘Naku umnikelo okhethekileko enizawunikela kuSomnini: Amaqamanyana amabili anomnyaka munye abe msulwa, kube mhlabelo wokutjhiswa onikelwa imihla ngemihla. ₄Kunikelwe linye ekuseni, linye ngamarhwaqela. ₅Umhlabelo lowo awukhambisane nokwetjhumi kwakapumpana womnikelo weenthoro okuyiflowuru esefiweko edutjwe ngelitha nesiquntu samafutha we-oliva. ₆Lowo kumhlabelo wokutjhiswa wesikhathi soke owasungulwa entabeni yeSinayi bona ube mnikelo okhethekileko, owamukelekako kuSomnini. ₇Iqamanyana linye alikhambisane nelitha nesiquntu somnikelo wokuselwako. Umnikelo wokuselwako obutjwala lowo awuthululelwe endaweni ecwengileko phambi kwakaSomnini. ₈Iqamanyana elinye olinikela ngamarhwaqela, linikele nomnikelo weenthoro newokuselwako kube njenganyana wenze kelekuseni. Linikele libe njengomnikelo okhethekileko owamukelekako kuSomnini.’ ”

₉“ ‘Ngelanga leSabatha umhlabelo akube maqamanyana amabili anomnyaka munye abe msulwa, namathungana amathathu weflowuru esefiweko edutjwe ngamafutha we-oliva kube mnikelo weenthoro kanye nomnikelo wakhona wokuselwako. ₁₀Lokho kuzakuba mhlabelo wokutjhiswa wangamaSabatha, ngaphandle komhlabelo wokutjhiswa wangemihla nomnikelo wakhona wokuselwako.’ ”

₁₁“Ekuthomeni kwenyanga enye nenye, nikelani umhlabelo wokutjhiswa kuSomnini: iinkunzana ezimbili, iqama linye namaqamanyana alikhomba anomnyaka munye abe msulwa. ₁₂Ikunzana enye nenye niyinikele kanye namathungana amathathu weflowuru esefiweko edutjwe ngamafutha we-oliva kube mnikelo weenthoro. Iqamelo alikhambisane namathungana amabili weflowuru esefiweko edutjwe ngamafutha we-oliva kube mnikelo weenthoro. ₁₃Iqamanyana ngalinye alikhambisane nethungana leflowuru esefiweko edutjwe ngamafutha we-oliva kube mnikelo weenthoro. Linikele libe mhlabelo wokutjhiswa, njengomnikelo okhethekileko owamukelekako kuSomnini. ₁₄Umnikelo wokuselwako okhambisana nekunzana enye nenye uzakuba malitha amane wewayini. Umnikelo wokuselwako okhambisana neqama uzakuba malitha amabili nesiquntu bese okhambisana neqamanyana kube lilitha nesiquntu. Lokho kuzakuba mhlabelo wokutjhiswa waqobe yinyanga umnyaka woke. ₁₅Ninikele nepongo yinye kube mhlabelo wehlambululo kuSomnini, ngaphandle komhlabelo wokutjhiswa ojayelekileko nomnikelo wakhona wokuselwako.”

₁₆“IPhasika lakaSomnini lizakuba elangeni letjhumi nane, ngenyanga yokuthoma emnyakeni. ₁₇Ngelanga letjhumi nahlanu lenyanga leyo kufuze kube nomnyanya, kudliwe isikwa esinganangumelo amalanga alikhomba. ₁₈Elangeni lokuthoma lomnyanya nizakuba nomhlangano okhethekileko, nje-ke mhlokho ningawuthinti umsebenzi. ₁₉Nikelani umhlabelo wokutjhiswa okumnikelo okhethekileko kuSomnini: iinkunzana ezimbili, iqama elilodwa namaqamanyana alikhomba anomnyaka munye. Qinisekisani bona zoke iinlwanezo zimsulwa. ₂₀Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Ikunzana enye nenye ikhambisane namathungana amathathu weflowuru bese iqama nalo likhambisane namathungana amabili weflowuru leyo. ₂₁Elinye nelinye iqamanyana kilawo alikhomba, nilinikele nethungana leflowuru leyo. ₂₂Godu kube nepongo yomhlabelo wehlambululo bonyana nizenzele itethelelo kuSomnini. ₂₃Nizakunikela ngalokho ngaphandle kweminikelo yokutjhiswa ejayelekileko eyenziwa njalo ekuseni. ₂₄Ngendlela efanako imihla ngemihla nizakunikela ukudla okumnikelo okhethekileko owamukelekako kuSomnini nomnikelo wakhona wokuselwako. Iminikelo leyo izakunikelwa amalanga alikhomba ngaphandle kwemihlabelo yokutjhiswa ejayelekileko. ₂₅Elangeni lekhomba lomnyanya nizakuba nomhlangano okhethekileko, nje-ke mhlokho ningawuthinti umsebenzi.”

₂₆“Ngelanga eniletha ngalo umnikelo weenthoro ezitja wesilumo kuSomnini, okutjho emnyanyeni weemVeke, yibani nomhlangano okhethekileko, nje-ke mhlokho ningawuthinti umsebenzi. ₂₇Nikelani umhlabelo wokutjhiswa owamukelekako kuSomnini: iinkunzana ezimbili, iqama elilodwa namaqamanyana alikhomba anomnyaka munye. ₂₈Kufuze ninikele imihlabelo leyo neminikelo yeenthoro yeflowuru esefiweko edutjwe ngamafutha we-oliva. Ikunzana enye nenye ikhambisane namathungana amathathu weflowuru bese iqama nalo likhambisane namathungana amabili weflowuru leyo. ₂₉Elinye nelinye iqamanyana kilawo alikhomba, nilinikele nethungana leflowuru leyo. ₃₀Godu kube nepongo bonyana nizenzele itethelelo kuSomnini. ₃₁Nizakunikela ngalokho kanye neminikelo yakhona yokuselwako, ngaphandle komnikelo wokutjhiswa ojayelekileko nomnikelo wakhona weenthoro. Qinisekisani bona zoke iinlwanezo zimsulwa.”