IZAGA 12

₁Othanda ukusolwa uthanda ilwazi,

ozonda ukukhalinywa usiyila.

₂Umuntu olungileko ufumana umusa kuSomnini,

kodwana uyamlahla umuntu onobuqili.

₃Umuntu akanzinzi ngobukhohlakali;

isisekelo sabalungileko sinzinzile.

₄Umfazi oqotho unjengesihlohlo endodenakhe,

kodwana ohlazisako unjengesidliso emathanjenayo.

₅Amano wabalungileko alungile,

kodwana iseluleko seenkhohlakali siyikohliso.

₆Amezwi weenkhohlakali acuphe iingazi,

kodwana umlomo wabaqotho uyabahlenga.

₇Abakhohlakeleko bayaketulwa banyamalale,

kodwana ikumba yabalungileko iyadzimelela.

₈Umuntu udunyiswa ukuya ngokuhlakanipha kwakhe,

kodwana onomkhumbulo ophambeneko uyanyazeka.

₉Kungcono ukuba phasi khibe nokho unekhoboka,

kunobana uzenze umuntu kanti udobha phasi.

₁₀Olungileko unakekela iindingo zefuywakhe,

kodwana imizwa yeenkhohlakali ililunya.

₁₁Olima isimakhe uzakufumana ukudla okunengi,

kodwana ogijimisana nelize akanangqondo.

₁₂Okhohlakeleko uyakhanuka,

iingilamkhuba ziyarhiribidela,

kodwana ipande yabalungileko iyathela.

₁₃Omumbi ubanjwa ziimphambeko zomlomakhe,

kodwana olungileko uphunyurha emirarweni.

₁₄Esithelweni somlomakhe umuntu utlonyeliswa okuhle,

njengombana imisebenzi yezandla zakhe imvuza.

₁₅Indlela yesidlhadlha ibonakala ilungile kiso,

kodwana ohlakaniphileko ulalela iseluleko.

₁₆Isidlhadlha siyarhaba ukukhombisa ukunyenya kwaso,

kodwana ovuthiweko uyayithalalisa ihlamba.

₁₇Ufakazi weqiniso ukhuluma iqiniso,

kodwana wekohliso ubika amanga.

₁₈Kunabantu abanamezwi ahlaba njengesabula,

kodwana ilimu labahlakaniphileko liyaphilisa.

₁₉Iimbhena zeqiniso zijame mlibe,

kodwana ilimu lamanga ngelesikhatjhana.

₂₀Kunekohliso eenhliziyweni zabahlosa okumbi,

kodwana kulithabo kilabo abakhuthaza ukuthula.

₂₁Olungileko angeze ehlelwa ngokumbi,

kodwana abakhohlakeleko bazele ngehlupheko.

₂₂Iimbhena ezikhuluma amanga zisinyenyiso kuSomnini,

kodwana uthokoziswa mumuntu oneqiniso.

₂₃Umuntu ovuthiweko uzigoba ngengqondo nangelwazi;

iindlhadlha zipepeza ubudlhayela.

₂₄Izandla zabakhutheleko zizakubusa,

kodwana ubuvila buphelela emsebenzini okatelelako.

₂₅Obalabala ngehliziyo uyawurubajeka,

kodwana ilizwi elakhako liyamthabisa.

₂₆Olungileko ukhombisa wekhabo indlela,

kodwana indlela yabakhohlakeleko iyabadurhisa.

₂₇Isibozi asiyibasi inyamazana,

kodwana ukukhuthala kulilifa eliligugu emuntwini.

₂₈Endleleni yokulunga kunokuphila

nokukhamba emzileni wakhona akunakufa.