IZAGA 19

₁Singcono isichaka esikhamba ngobuqotho

kunomuntu onomlomo owonakeleko, osidlhadlha.

₂Ukuba netjisakalo ngaphandle kwelwazi akusikuhle,

nomuntu opharhazelako ulahla indlela.

₃Ubudlhadlha bomuntu buhlakaza indlelakhe,

ngalokho ihliziywakhe ilwisana noSomnini.

₄Umnono uletha abangani abanengi,

kodwana isichaka sifulathelwa bangani.

₅Ufakazi wamanga uzakuhlunguphazwa,

nophafuza ikohliso akazukusinda.

₆Abanengi bafuna ukuthandwa sikhulu,

woke umuntu umungani wophana ngezipho.

₇Boke abafo besichaka bayasigega,

nakubangani baso babakude khulu naso.

Nanyana sesilandelela umbiko,

asifunyani litho!

₈Ozuza ubuhlakani, uthanda ipilwakhe

nolonda ukuzwisisa ufumana okuhle.

₉Ufakazi wamanga uzakuhlunguphazwa,

nophafuza ikohliso uzakubhubha.

₁₀Akusifaneli isidlhadlha ukunethezeka,

kangangani-ke ikhoboka nakumele libuse amakhosana!

₁₁Ohlakaniphileko ubuthaka ekusilingekeni,

ukunganaki isikhubekiso kulidumo lakhe.

₁₂Itukuthelo yekosi ifana nokubhodla kwebhubezi,

kodwana umusayo ufana nombethe phezu kotjani.

₁₃Umntwana osidlhadlha uchakisa uyise,

nomfazi obalabalako ufana nephahla elinethosi.

₁₄Ikumba nomnono kulilifa elibuya kubabelethi,

kodwana umfazi ohlakaniphileko uvela kuSomnini.

₁₅Ubuvila bubangela ubuthongo obukhulu,

nomuntu obharaleleko ubulawa yindlala.

₁₆Olalela imiyalo ulonda ipilwakhe,

kodwana ongakhathali ngendlelakhe uzakufa.

₁₇Onomusa kochakileko, uboleka uSomnini,

yeke uzamvuza ngalokho.

₁₈Khalima umntwanakho kusese nethemba,

ungavumi bonyana akhambe endleleni yokufa.

₁₉Ovutha ngelaka kumele ahlawuliswe

ngombana wamenyela kanye, uzakurhobelela.

₂₀Lalela iseluleko bese wamukela ukusolwa

ukuze ekugcineni uzuze ukuhlakanipha.

₂₁Manengi amaqhinga asehliziyweni yomuntu,

kodwana ukuphumelela kwawo kusentandweni kaSomnini.

₂₂Ukuba marhamaru komuntu kulihlazo kuye,

kungcono ukuba sichaka kunokuba namanga.

₂₃Ukwesaba uSomnini kurholela ekuphileni;

onjalo ulala anelisekile,

angeze athintwa miraro.

₂₄Ivila lifaka isandla ngesitjeni linghwathe,

kodwana livilaphe ukusisa emlonyeni!

₂₅Manya isinyefuli,

ukuze onganalwazi abe ngovuthiweko;

sola umuntu onengqondo, uzakuzuza ukuzwisisa.

₂₆Onepehla kuyise, aqotjhe unina

usihlola esiletha iinhloni nehlazo.

₂₇Mntwanami, nawungasalaleli ukusolwa,

uzakulahlekelwa mamezwi welwazi.

₂₈Ufakazi okhohlakeleko unyefula ukulunga

nomlomo wesonakali urhiribidela ubumbi.

₂₉Isibetho senzelwe abanyefuli

neswazi lenzelwe imihlana yeendlhadlha.