IZAGA 20

₁Iwayini lisinyefuli notjwala bunetjhada,

nanyana ngubani odurhiswa ngilokhu akakahlakaniphi.

₂Ilaka lekosi lifana nokubhodla kwebhubezi,

oyithukuthelisako ubeka ipilwakhe engozini.

₃Kulidumo emuntwini ogegeda irarano,

kodwana esinye nesinye isidlhadlha siyarhaba ukulwa.

₄Ivila alilimi ngesilimela,

ngesikhathi sokuvuna silindela ilitho

kodwana asizuzi.

₅Amasu engqondweni yomuntu anjengamanzi azikileko,

onelwazi uyawakhelela.

₆Banengi abantu abathi bathembekile,

kodwana angatholakalaphi othembeke ngeqiniso na?

₇Olungileko ukhamba ngobuqotho,

babusisiwe abantwabakhe abamlandelako!

₈Ikosi ehlezi esihlalweni sokulunga

ihlunga boke ubumbi ngamehlwayo.

₉Ngubani ongathi: “Ngihlambulule ihliziywami,

ngihlanzekile, anginasono”?

₁₀Amatje namathungana wokulinganisa ahlukileko,

kokubili njalo kusinyenyiso kuSomnini.

₁₁Ngitjho nomntwana uziveza ngezenzo zakhe,

kuyabonakala nazimsulwa begodu ziqotho.

₁₂Iindlebe ezizwako namehlo abonako,

kokubili kwenziwe nguSomnini.

₁₃Ungathandi ubuthongo, nakungasi njalo uzakuchaka;

nawuvula amehlwakho uzakuba nokugoma okwaneleko.

₁₄Umthengi uthi, “Into le yimbi, iye yimbi!”,

kuthi nakhambako azibethe isifuba ngakuthengilekokho.

₁₅Kunegolide namaparele amanengi,

kodwana iimbhena ezinelwazi ziligugu elingakandi.

₁₆Thatha ingubo yowenzela umqhamuka isibambiso,

iye, ithathe ngombana ujamele abatjhili.

₁₇Ukugoma okuzuzwe ngokudlelezela kuyanandipha,

kodwana umlomo ugcina ukhume iqulwani.

₁₈Amaqhinga aqiniswa siseluleko,

nepi ihlelwa ngamano.

₁₉Ukuhleba kugubulula ifihlo,

yeke mgegede umuntu onomlomo.

₂₀Othuka uyise nonina,

isibani sakhe sizakucinywa nakurhwalalako.

₂₁Ilifa elizuzwa ngamawala ekuthomeni,

angeze labusiswa ekugcineni.

₂₂Ungeze wathi: “Ngizazibuyiselela ngobumbi!”

Qalelela uSomnini, yena uzakubonelela.

₂₃Iinlinganiso ezihlukako zisinyenyiso kuSomnini,

neenlinganisi zekohliso azisizihle nakancani.

₂₄Amagadango womuntu anqotjhiswa nguSomnini;

nje-ke ngubani ongazwisisa indlela yomuntu na?

₂₅Kusisifu emuntwini ukurhaba ukuthi,

“Lokhu ngikwahlukanisela uZimu!”

bese ngemva kokwenza isithembisweso azisole.

₂₆Ikosi ehlakaniphileko ihlunga iinkhohlakali,

izibuyekeza ngevili lesibhulo.

₂₇Umphefumulo usibani sakaSomnini,

uhlolisisa ngawo ilingaphakathi lomuntu.

₂₈Ukwethembeka neqiniso kugcina ikosi ibulungekile,

iye, isihlalo sayo sobukhosi sinzinze phezu kokwethembeka.

₂₉Idumo labantu abatjha mamandlabo,

kodwana ubuhle babadala kuthukghela kwabo.

₃₀Amaduma namanceba athanyela ubumbi,

nokubethwa kuphilisa ilingaphakathi lomuntu.