IZAGA 24

₁Ungakhanukeli abantu abakhohlakeleko,

ungafisi ukuhlanganyela nabo

₂ngombana iinhliziyo zabo ziphehla inturhu,

neembhena zabo zikhuluma umonakalo.

₃Indlu yakhiwa ngokuhlakanipha

inzinziswe ngokuzwisisa;

₄ngelwazi amalawu wayo azaliswe

ngomnotho oligugu nomuhle.

₅Ingorho ehlakaniphileko inamandla,

kodwana umuntu onelwazi udlulele ngeenkhwepha.

₆Yeke, yilwa ipi ngamano

iye, ukuphepha kuza ngabeluleki abanengi.

₇Ukuhlakanipha kuphakeme khulu esidlhayeleni;

nakuhlangenwe ebandla asibi nalitho esingalitjho.

₈Ophemba ubumbi

uzakwaziwa bona mgulukudu.

₉Iqhinga lesidlhadlha sisono

nesinyefuli sisinyenyiso ebantwini.

₁₀Nawunyefako ngesikhathi sokubandezelwa,

umkhawulo wamandlakho uyabonakala.

₁₁Hlenga labo abadoselwa ekufeni,

ukhandele abadzimelela banqombe ekubulaweni,

₁₂ngombana nawuthi,

“Qala akhange sazi litho ngalokhu”,

nje-ke ohlola iinhliziyo, nguye ozakwazi iqiniso;

iye, owelusa ipilwakho, nguye olaziko,

uzakubuyiselela umuntu ngalokho akwenzileko.

₁₃Goma iliju mntwanami ngombana limnandi,

iye, iliju lesihlaka liyanandipha kurhwalabhakho.

₁₄Yazi-ke bona nokuhlakanipha

kunjalo emphefumulwenakho,

nawukufumanako, uzakuba nengomuso,

nethemba lakho angeze lafeleliswa.

₁₅Wena sikhohlakali ndina,

ungalindeli ukudla idlelo lolungileko,

ungasusi isikhundla sakhe sokuhlala

₁₆ngombana nanyana olungileko angawa kalikhomba,

uyavuka azithathe,

kodwana iinkhohlakali zona zizakuguqiswa yihlekelele.

₁₇Ungathabi ngokuwa kwesitha sakho,

ihliziywakho ingajekezeli nasikhutjwako.

₁₈Nakungasinjalo, uSomnini uzakubona lokho

kube kumbi emehlwenakhe,

asuse itukuthelwakhe phezu kwaso.

₁₉Ungakhathazeki ngabenzi bobumbi,

ungakhanukeli iinkhohlakali

₂₀ngombana alikho ilingomuso kowenza okumbi

nesibani seenkhohlakali siyacima.

₂₁Mntwanami, yesaba uSomnini,

uhloniphe ikosakho,

ungahlanganyeli nabahlubukako,

₂₂ngombana behlelwa yihlekelele msinyana.

Ngubani owazi isizi

elivela kuSomnini nekosi na?

₂₃Nanzi godu ezinye izitjho zabahlakaniphileko:

Akusikuhle ukukhetha ubuso ekugwebeni.

₂₄Nanyana ngubani othi konomlandu, “Umsulwa wena”,

umphakathi uzamthuwelelisa nabantu bamhlanuke;

₂₅kodwana kilabo abakhalima onomlandu,

kuzakuba kuhle kibo

nesibusiso esinothileko sizakwehlela phezu kwabo.

₂₆Ipendulo enqombileko

ifana nokuncwangwa eembheneni.

₂₇Ncama ngomsebenzakho wangaphandle,

unake umsebenzi wamasimakho;

ngemva kwalokho, wakhe ikumbakho.

₂₈Ungafakazi ngomuntu wekhenu kunganasizathu.

Kubayini iimbhena zakho zifafaze amanga?

₂₉Ungathi: “Ngizamenza angenze sona;

ngizazibuyiselela ngalokho angenze khona.”

₃₀Ngidlule esimini yevila,

ngadlula esidiribeni somuntu onganagqondo,

₃₁qala-ke, yoke indawo imile ikhula,

iqulwani ivalwe mitjhatjhana

nesibiyelo samatje sibhurukile.

₃₂Lokha nangiyelela lokho, ngazibuza,

iye, nangibona lokho ngafunda isifundo:

₃₃Uyalalalala, uyendayende,

usongasonge izandla uphumule,

₃₄ngalokho ubuchaka buzakubhudungela njengesela,

nokweswela njengendoda ehlomileko.