IZAGA 29

₁Umuntu okhunyalala ngekani ngemva kokusolwa,

uzakutjhabalaliswa msinyana, angabi nentatha.

₂Abalungileko nabandako, abantu bayathaba;

kodwana nakubusa isikhohlakali, abantu bayabubula.

₃Othanda ukuhlakanipha, ulethela uyise itokozo,

kodwana umngani weengwadla uchitha umnono.

₄Ngokulunga ikosi inikela inarha idzimelelo,

kodwana ethanda iimbiko iyayilulaza.

₅Umuntu oyenga umakhelwanakhe,

uzibekela isithiyo senede eenyaweni zakhe.

₆Kunesithiyo esiphambekweni sesikhohlakali,

kodwana olungileko uyabhina, athokoze.

₇Olungileko ukhambisana nokuphathwa kuhle

kwabachakileko,

kodwana okhohlakeleko akanakho ukuyelela okunjalo.

₈Iinyefuli ziphehla idorobho,

kodwana abahlakaniphileko barhobhisa ilaka.

₉Ohlakaniphileko naya ebandla nesidlhadlha,

siyadlharuma, senze amahlaya,

kungabi nokuthula.

₁₀Abanukelwa ziingazi bazonda omsulwa,

kodwana abaqotho bahlenga ipilwakhe.

₁₁Isidlhadlha sigugeka khulu ngemizwaso,

kodwana ohlakaniphileko uyasidambisa.

₁₂Lokha umbusi nalalela amanga,

zoke iinkhulu zakhe ziba ziinkhohlakali.

₁₃Isichaka nombolekisi bafana ngalokhu:

USomnini ubaphe amehlo wokubona bobabili.

₁₄Ikosi egweba abachakileko ngeqiniso,

isihlalo sayo sobukhosi sizakunzinziswa isikhathi soke.

₁₅Iswazi nokukhalima kupha ukuhlakanipha,

kodwana umntwana ozilawulako uhlazisa unina.

₁₆Iinkhohlakali nazandako nesiphambeko siyanda,

kodwana zizakuwa, abalungileko babukele.

₁₇Khalima umntwanakho, uzakunikela ukuthula

iye, uzakuletha ithabo ehliziywenakho.

₁₈Lapha kunganambono khona,

abantu abalawuleki,

kodwana ubusisiwe ogcina umthetho.

₁₉Inceku ayikhalinywa ngamezwi nje kwaphela,

nanyana izwisisa, angeze yalalela.

₂₀Ukhe wambona umuntu okhuluma angacabangi na?

Kunethemba elikhulu ngesidlhadlha kunaye.

₂₁Umuntu natotosa inceku ebutjheni bayo,

ekugcineni izakuragalala.

₂₂Umuntu othukutheleko uvusa ukucabana,

nosififana ubanga iimphambeko ezinengi.

₂₃Ukuziphakamisa komuntu kuyamehlisa,

kodwana onommoya ophasi uzuza idumo.

₂₄Ohlanganyela nesela uzonda ipilwakhe:

Uzwa abaphathi bakhuluma amanikelela,

kodwana akanikeli ngelwazi.

₂₅Ukwesaba umuntu kusisifu,

kodwana othembela kuSomnini uyaphepha.

₂₆Abanengi bafuna umusa wombusi,

kodwana ukulunga kufunyaneka kuSomnini kwaphela.

₂₇Abangakathembeki basinyenyiso kabalungileko;

abaqotho basinyenyiso kabakhohlakeleko.