AMARHUBO 104

₁Dumisa uSomnini mphefumulwami!

Somnini, Zimami, umkhulu khulu wena,

wembethe ukuhlonitjhwa nobukhosi!

₂Yena ozisonga ngokukhanya njengengubo;

ondlala amazulu njengetende,

₃owakha amalawakhe angehla emanzini,

amafu awenze ikaranakhe,

akhambe phezu kwamaphiko wommoya.

₄Yena owenza imimoya iinthunywa zakhe,

umlilo namalangabi kube ziinsebenzi zakhe.

₅Yena osekela iphasi phezu kweensekelo zalo

ukuze lingasanyakaziswa nini nanini.

₆Wena Somnini, wagubuzesa iphasi

ngamanzi amanengi njengengubo,

njengombana amanzi ajama ngehla kweentaba.

₇Ngokukhalima kwakho abaleka,

ngokuzwakala kokuduma kwakho

asuka masinyana,

₈anyukela eentabeni,

agelezela phasi emikghotheni,

endaweni owawajamisela yona.

₉Wawabekela umkhawulo

lapha angeze afahla khona;

akhange asagubuzesa iphasi godu.

₁₀USomnini wenza iiyalo ziphundluke emirhobeni;

zigeleze hlangana neentaba,

₁₁ziseze zoke iimbadana zenarha:

Abodumbana bommango basuse ukoma kwabo;

₁₂iinyoni zesibanga zizakhele ngehla kwamanzi,

zibethe imilozi hlangana namakari wemithi.

₁₃Uthelelela iintaba ngamanzi asemalawinakhe angehla,

iphasi lanelisiwe ngeenthelo zemisebenzakhe.

₁₄Yena omilisela ifuyo utjani

neentjalo kobana abantu bazilime

ukuze bavune ukudla ehlabathini:

₁₅Iwayini elithokozisa ihliziyo yomuntu,

amafutha we-oliva aphazimulisa ubuso

nesikwa esiqinisa ihliziyo yobhubhako.

₁₆Imithi yakaSomnini isezelwa kuhle,

ngitjho nemisedari yeLibhanoni ayitjalileko,

₁₇lapha iinyoni zakha khona iinhlakana;

udoyi abe nendlwana emithini yomsayipurusi.

₁₈Iintaba eziphakamileko zingezeembuzi zeentaba;

amadwala alirharha leembila.

₁₉Wenze inyezi kobana kuphawuleke iinkhathi

nelanga elazi isikhathi sokutjhinga kwalo.

₂₀Uletha ubumnyama kube busuku,

khonapho kuphume zoke iinlwana zehlathi.

₂₁Amabhubezana ayabhodla afune inyama,

abawe ukudla kwawo kuZimu.

₂₂Ilanga naliphumako, ayasithela,

alale emadzabenawo.

₂₃Umuntu uyaphuma aye emsebenzinakhe,

iye, emtjhikatjhikeni bekuhlwe.

₂₄Maye, minengi kangangani imisebenzakho Somnini!

Yoke uyenze ngokuhlakanipha;

iphasi ligcwele umnothwakho.

₂₅Le, kunelwandle elikhulu

begodu libanzi lendlalekile;

ligcwele iwoma leemphili ezikhakhabako,

iye, iindalwa ezinganakubalwa ezikulu nezincani.

₂₆Kilo kukhamba iinthayamanzi

nonomrhaso welwandle owamdalako;

wamenza bona adlale kilo.

₂₇Koke kuqalelele kuwe

kobana ukuphe ukudla ngesikhathi.

₂₈Lokha nawukunikela ukudla, kuyakudobha;

nawuvula isandla sakho

kwaneliswe ngokuhle.

₂₉Lokha nawusitheza ubuso, kuyakakamala;

nawususa ummoya wakho lokho, kuyafa,

kubuyele ethulini lapha kubuya khona.

₃₀Lokha nawuphefumulela kikho, kuyadaleka;

ngendlela leyo uvuselela ubuso bephasi.

₃₁Kwanga iphazimulo yakaSomnini

ingajama isiphelani!

Kwanga uSomnini angathaba emsebenzinakhe;

₃₂iye, yena othi naqala iphasi, lidengezele;

nathinta iintaba, zithunye intuthu.

₃₃Ngizakukhalelela uSomnini ipilwami yoke,

ngidumise uZimami qobe ngisekhona.

₃₄Kwanga ukuzimisela kwami

kungamukeleka kuye,

njengombana ngenamile kuSomnini.

₃₅Kwanga izoni zingapheliswa ephasini

neenkhohlakali zingasabakhona.

Dumisa uSomnini mphefumulwami!

Haleluya!