AMARHUBO 106

₁Haleluya!

Dumisani uSomnini ngombana ulungile

nokwethembeka kwakhe kujame isiphelani!

₂Ngubani ongamemezela izenzo zakaSomnini zamandla,

namkha azwakalise loke idumo lakhe na?

₃Babusisiwe abalonda okufaneleko,

benze nokulungileko ngeenkhathi zoke!

₄Somnini, ungikhumbule

lokha nawuba nomusa ebantwini bakho;

ungitjheje nawubasindisako

₅ukuze ngibone okuhle kwabakhethiweko bakho,

ngijabule ekwenameni kwesizwe sakho,

ngizikhakhazise nabalilifa lakho.

₆Thina njengabobamkhulu sonile;

siphambukile, nje-ke sonakele.

₇Lokha abobamkhulu nabaseseGibhide,

akhange banake iimangaliso zakho;

azange bakhumbule ukwethembeka kwakho okukhulu.

Bahlubuka nabaselwandle,

iye, elwandle lomGaba.

₈Nokho uSomnini wabasindisa

ngenca yebizo lakhe,

kobana azise amandlakhe amakhulu.

₉Wakhalimela ilwandle lomGaba, loma,

wabayamisa ekuzikeni inga kuserhalawumbeni.

₁₀Wabasindisa esandleni sabanezondo,

wabahlenga esandleni sezitha.

₁₁Amanzi abhibha amanababo,

akhange kusinde nelilodwa lawo.

₁₂Nje-ke bakholwa amezwakhe,

bavuma idumo lakhe.

₁₃Kodwana baba masinya

ekukhohlweni imisebenzakhe;

akhange baqalelele iseluleko sakhe.

₁₄Baba nokukhaluza okukhulu nabaserhalawumbeni,

bazizinya uZimu khona enarheni elibhudu.

₁₅Wabapha abakubawako,

kodwana wabehlisela ukugonyuluka.

₁₆Ekampeni bafela uMosi umona

no-Aroni ocwengileko wakaSomnini.

₁₇Iphasi lavuleka laginya uDatani,

ladibizesa nejima laka-Abiramu.

₁₈Hlangana nejimelo kwaqubuka nomlilo;

iinkhohlakalezo zadliwa malangabi.

₁₉Benza ikunzana eRhorebe,

balotjha isithombesibunjwa.

₂₀Benana uZimu oyiphazimulwabo

ngomfanekiso wekomo edla utjani!

₂₁Bakhohlwa uZimu omsindisabo

owenza izinto ezikulu eGibhide,

₂₂iye, iimangaliso enarheni kaRhamu

nezinto ezesabekako elwandle lomGaba.

₂₃Yeke wathi gade azobabhubhisa,

kodwana ngetjhudu uMosi, okhethiweko wakhe,

wajama esikhaleni phambi kwakhe

kobana adambise ilaka lakhe ekubhubhiseni.

₂₄Godu banyaza nenarha ekhangako,

akhange bakholwe iinthembiso zakaSomnini.

₂₅Bakhonona ematendenabo,

azange balalele ilizwi lakaSomnini.

₂₆Ngalokho waphakamisa isandla,

wafunga bona uzobawisa erhalawumbeni,

₂₇nokobana uzokusabalalisa

iinzukulwana zabo hlangana nezizwe,

azihlakaze kizo zoke iinarha.

₂₈Nje-ke bazibophelela kuBhali wePewori,

badla okuhlatjelwe abafileko.

₂₉Ngalokho bathukuthelisa uSomnini ngezenzo zabo,

kwaqubuka isifo phakathi kwabo.

₃₀UFiniyasi wasikima walamula,

isifo saphela;

₃₁wabalelwa lokho njengokulunga,

iinzukulwana ngeenzukulwana nini nanini.

₃₂Godu bathukuthelisa uSomnini emanzini weMeriba,

uMosi wehlelwa zizehlo ngebanga labo:

₃₃Lokha nabahlubuka uMoya kaSomnini,

umlomo wakaMosi wakhuluma ngamawala.

₃₄Godu akhange babhubhise izizwe

njengombana uSomnini bekabayalile.

₃₅Kodwana bakhozisana nazo

bebafunda ukwenza imikhubazo.

₃₆Balotjha abosingazimu bazo

okwabuye kwaba sisifu kibo.

₃₇Benzela imimoya emimbi imihlabelo

ngamadodana namadodakazabo.

₃₈Bathulula iingazi ezinganamlandu,

iye, iingazi zamadodana namadodakazabo.

Benzela ngawo abosingazimu beKanana imihlabelo;

ngalokho inarha yasilaphazwa ziingazi ezinengi.

₃₉Mbala, bazininda ngezenzo zabo,

ngemikhubabo leyo bangwadla.

₄₀Yeke ilaka lakaSomnini lavutha ngabantu bakhe,

wanyenya ilifa lakhe.

₄₁Wabanikela esandleni sezizwe

ukuze labo ababazondako bababuse.

₄₂Izitha zabo zabagandelela,

baguqiswa ngaphasi kwesandla sazo.

₄₃Wabasindisa kanengi uSomnini,

kodwana bona baba namasu wokuhlubuka;

ngalokho bacwila ngecala labo.

₄₄Nokho wanaka isizi labo

lokha nezwa isililo sabo.

₄₅Wakhumbula isivumelwano sakhe ngenca yabo,

waba nomusa ngokwethembeka kwakhe okukhulu.

₄₆Wenza bona barhawukelwe

kilabo egade babathumbile.

₄₇Somnini, Zimethu, sisindise!

Yewusibuthe hlangana nezizwe

ukuze sazise ibizo lakho elicwengileko,

sibabaze iphazimulwakho.

₄₈Akudunyiswe uSomnini uZimu ka-Israyeli

kusukela nini nanini bekube siphelani!

Abantu abatjho bathi: “Amen!”

Haleluya!