AMARHUBO 114

₁Lokha u-Israyeli naphuma eGibhide,

iye, indlu kaJakopo nayiphuma

ebantwini belimi elitjhili,

₂uJuda waba sisabelo esicwengileko sakaZimu,

u-Israyeli waba mbuswakhe.

₃Ilwandle lakubona lokho labaleka,

iJordani yajika yabuyela emuva.

₄Iintaba zatjakadula njengamaqama,

imibundu njengeemvana.

₅Kubayini wena lwandle ubaleka,

nawe Jordani ubuyela emuva na?

₆Kubayini nina ntaba nitjakadula njengamaqama,

nani mibundu njengeemvana na?

₇Wena phasi, thuthumela

phambi kobukhona bakaSomandla,

iye, phambi kwakaZimu wakaJokopo,

₈owaphendula idwala laba siziba,

ilitje eliqinileko laba siyalo.