AMARHUBO 120

₁Ingoma yekhambo lokuya ethempelini.

Esizini lami ngiyalila kuSomnini

kobana ungiphendule, ngithi:

₂“Somnini, sindisa ipilwami

emlonyeni okhuluma amanga

iye, elimini lekohliso.”

₃Wena limu lekohliso,

yini ekufuze unikelwe khona?

Yini okhunye ekufuze wenzelwe khona na?

₄Imisubela ebukhali yengorho,

enamalahle avuthako wemithi yomthanyelo!

₅Maye kimi,

ngombana ngisikhonzi eMetjheki

begodu ngihlala

hlangana namatende weKhedari!

₆Sekusikhathi eside mina ngihlezi

phakathi kwabantu abazonda ukuthula.

₇Mina ngimumuntu wokuthula;

kodwana nangikhuluma ukuthula,

bona baphehla ipi.