AMARHUBO 22

₂Zimami, Zimami, ungitjhiyeleni na?

Kubayini ukude ungangisizi,

iye, ukude namezwi wesililo sami na?

₃Zimami, ngilila emini,

kodwana awuphenduli

nebusuku kodwana angifunyani ukuthula.

₄Wena ongocwengileko,

uhlezi eembongweni zaka-Israyeli.

₅Abobamkhulu bathembela kuwe;

bakwethemba, wabasindisa.

₆Kuwe balila, wabasindisa;

kuwe bathembela, bangadaniswa.

₇Mina ngiyipethu nje, angisuye umuntu,

ngisithuko sabantu, ngidelelwa zizizwe.

₈Boke abangibonako bayanginyefula,

bayangikokomeja, bebathintithe iinhloko

₉bathi: “Uzinikele kuSomnini,

uSomnini akamsindise, amenyule,

angithi uyamthanda!”

₁₀Somnini, nguwe owangikhupha esibelethweni,

wangikhoselisa emabeleni wakamma.

₁₁Kuwe ngalahlelwa ngisabelethwa,

kwasesibelwethweni sakamma,

waba nguZimami.

₁₂Ungabi kude nami

ngombana imbandezelo iseduze

begodu akakho ongangisiza.

₁₃Iinkunzi ezinengi zingizombelezile,

iye, iinkunzi ezinamandla zeBhatjhani zingibungelele.

₁₄Zingikhamisele imilomazo

njengengonyama ebhodlako

efuna ukudabudabula.

₁₅Ngithululiwe njengamanzi,

woke amalungami akhwamukile;

ihliziywami injengamanyephe,

iyancithika ngaphakathi kwami.

₁₆Amandlami omile njengedengela,

ilimu lami linamathela eensinini zami.

Ungilalisa ethulini lokufa.

₁₇Izinja zingizombelezile,

ijima labenzi bobumbi lingibungelele;

izandla neenyawo zami zilinyaziwe,

₁₈amathambami ngingawabala woke.

Abantwabo bangirhudulele amehlo ngokungikokomeja,

₁₉babelana iimpahla zami zokwembatha,

benzelana ifumbe ngesambatho sami.

₂₀Nakunguwe Somninini, ungabi kude;

wena Sizo lami, tjhidela masinyana kimi ungisize.

₂₁Sindisa umphefumulwami ekembeni,

ipilwami eligugu emandleni wezinja.

₂₂Ngisindisa emlonyeni wengonyama

neempondweni zekukhama!

Wangizwa, wangiphendula,

₂₃nje-ke ngizakumemezela ibizo lakho kubafowethu,

ngikudumise phakathi kwebandla lamakholwa.

₂₄Nina enesaba uSomnini, mdumiseni,

noke nina nzukulwana zakaJakopo, mkhakhaziseni;

iye, noke nina nzukulwana zaka-Israyeli,

msikimeleni ngokumhlonipha.

₂₅Mbala uSomnini azange akhe anyaze,

namkha adelele ukuhlupheka kodududu;

akhange afihle ubuso bakhe kuye,

kodwana umzwile lokha nalila kuye.

₂₆Somnini, kuwe kuvela ukudumisa kwami

ebandleni elikhulu!

Ngizaziphumelelisa iinthembiso zami

phambi kwabayesabako.

₂₇Abathobekileko bazakudla basuthe.

Abafuna uSomnini bazamdumisa bathi: “Uyaphila!”

Iinhliziyo zenu ngesikhathi soke ₂₈zizakukhumbula.

Boke abasemaphethelweni wephasi

bazakuphendukela kuSomnini.

Iye, zoke iinkoro zezizwe

zizakhothama phambi kwakhe

₂₉ngombana umbuso ungowakaSomnini

obusa phezu kwezizwe,

₃₀iye, yena yedwa.

Boke abamajadu bazamkhothamela;

phambi kwakhe boke abafako bazakuguqa.

Onganapilo uzakuvuseleleka!

_31-32Iinzukulwana zizakulotjha uSomnini,

imindeni ezako ibikelwe ngoSomandla;

ukuhlula kwakhe kuzakutjelwa abangakabelethwa,

kuthiwe: “Lokhu kwenziwa nguSomnini!”