AMARHUBO 30

₂Ngiyakuphakamisa Somnini ngombana ungenyulile,

akhange uvume bonyana izitha zijabule ngami.

₃Somnini, Zimami,

ngilile kuwe, wangipholisa.

₄Wena Somnini ungenyule endaweni yabafileko,

wangihlenga phakathi kwabehlela emgodini.

₅Khalelani nidumise uSomnini

nina bathembekileko bayo,

thokozani ibizo layo elicwengileko

₆ngombana itukuthelo kaSomnini ingeyesikhatjhana,

kodwana umusayo ungowepilo yoke.

Nanyana kungaba nesililo ebusuku,

nokho amasa eza nesihleko.

₇Ekwenameni kwami mina ngathi:

“Angisoze nganyakaziswa.”

₈Somnini bekungomusakho

kobana ungenze nganzinza njengentaba eqinileko;

kodwana lokha nawufihla ubuso bakho,

ngathoma ukukakamala.

₉Ngalila kuwe Somnini,

iye, ngazincengela kuSomandla, ngathi:

₁₀“Ingabe kukhona okuzuzako ngokufa kwami,

lokha nangehlela emgodini na?

Ithuli lona lizakudumisa,

lidembe ngokwethembeka kwakho na?

₁₁Yizwa Somnini, ube nomusa kimi,

yiba msizami Somnini!”

₁₂Uphendule isililo sami saba ligido,

wangihlubulisa izambatho zami zesililo,

wangembathisa ukujabula,

₁₃ukuze ngikudumise ngamandla, ngingathuli.

Somnini Zimami, ngizakuthokoza nini nanini.