Umthandazo wokusindiswa ezitheni
1Irhubo lakaDavida.
Somnini, phikisana nabaphikisana nami,
ulwe nalabo abalwa nami.
2Hloma ngekhande nesihlangu,
usikime kobana ungisize.
3Rhwatjha umkhonto nesilembe,
uqalane nabalandelana nami.
Yithi kimi: “Ngiyisindiswakho.”
4Akuthi labo abazumana nami
badane, barhubutjheke bebabaleke;
iye, abangisongelako bakhene.
5Ababe njengomungu ophetjhulwa mumoya,
lokha ingilozi kaSomnini nayibadudulako;
6indlelabo ibe mnyama, itjhelele,
lokha ingilozi kaSomnini nayibagijimisako.
7Bangembele umgodi ngaphandle kwesizathu,
bawufihla ngokuwembesa ngenedabo;
iye, bangembele wona kunganabanga.
8Ukubhujiswa akubehlele bangakanaki,
kuthi isifu abasithiyileko sibambe bona;
bawele ngemgodinapho babhubhe.
9Khona-ke ngizakuthaba kuSomnini,
ngename ngokusindisa kwayo.
10Ngamandlami woke ngizakuthi:
“Somnini, ngubani onjengawe?
Wena osindisa ohluphekileko
kilabo abanamandla kunaye,
iye, ohluphekileko nodududu
kilabo abamdlelezelako.”
11Kuvuka abofakazi abanelunya
bangibuza izinto engingazaziko.
12Bangibuyiselela okumbi ngokuhle;
ngizizwa inga ngilahliwe.
13Kodwana nakugula bona,
mina ngembatha izambatho zokuzila,
ngazikhandla ngokuzila ukudla;
ngaqinisela ekubathandazeleni.
14Kwaba sengathi ngililela
umngani namkha umfowethu.
Ngembatha iinzilo, ihlokwami ikhotheme,
ngakhamba njengotlhuwileko ngonina.
15Kodwana ekukhutjhweni kwami
bona bajabula babuthana ndawonye.
Babuthana kobana bangibethe ngingakatjheji,
bangidabula bangasakhawula.
16Ekuhluzeni kwami
abaphoqi bangiphoqa,
bangigugudela amazinyo.
17Somnini, lokho uzakubukela bekube nini na?
Ngisindise elunyeni labo,
iye, ipilwami eligugu emabhubezini.
18Ngizakuthokoza ebandleni elikhulu,
ngikudumise phakathi kwesiqubuthu.
19Ungavumeli izitha zami,
iye, abakhohlisi bajabule ngami
nabangizonda kunganasizathu
bona bangikhwinyisele.
20Ngambala abakhulumi ukuthula
begodu kilabo abahlezi ngokuthula enarheni
basopha izinto eziyikohliso.
21Bangikhamisela imilonyanabo bathi:
“Arha! Arha! Sizibonele ngawethu.”
22Somnini, uyakubona lokho,
nje-ke ungathuli;
ungabi kude nami, Somnini.
23Zimami, Somandla, phakama!
Sikima umele indabami, ungivikele!
24Somnini, Zimami,
ngimela ngokulunga kwakho!
Ungabavumeli bajabule ngami.
25Ungabavumeli bathi eenhliziyweni zabo:
“Arha, nakho-ke ebesikufisa!”
Ungabavumeli bathi: “Simginyile.”
26Akuthi boke abathakasa ngesizi lami
badaniswe bebakhene;
labo abazikhukhumeza ngami,
bembathiswe ihlazo neenhloni.
27Kuthi abathokoza ngobumsulwa bami,
bahlokome, bajabule.
Njalonjalo bathi:
“Mkhulu uSomnini othatjiswa kuthula kwencekwakhe.”
28Nje-ke ilimu lami lizakumemezela
ukulunga kwakho,
iye, ilanga loke idumo lakho.
