AMARHUBO 58

₂Nina abanamandla,

niyazikhupha iinqunto ezilungileko,

nigwebe abantu ngokufaneleko na?

₃Awa! Eenhliziyweni zenu nisopha okumbi;

izandla zenu ziphehla inturhu ephasini.

₄Iinkhohlakali ziphambuke zisabikwa;

abakhohlisi bonakele basabelethwa.

₅Isihlungu sabo sinjengesenyoka;

bavala iindlebe zabo inga lirabi elisithulu,

₆ukuze bangezwa ilizwi labosomlingo,

ngitjho nosomlingo ongumakadebona.

₇Zimu, yephula amazinyo ngemlonyenabo!

Somnini, phohloza imihlathi yamabhubezana!

₈Abanyelele njengamanzi ehlabathini,

batjhwabe njengotjani obugadangiweko.

₉Ababe njengomhlobo wesibungu oncithika uphele,

babe njengombungu orhulukileko

ongazange ubone ilanga.

₁₀Ngokuzuma okukhulu uZimu uzabasusa,

abavuthele njengommoya otjhisako basaphila.

₁₁Abalungileko bazakuthaba nababona ukubuyiselela,

bahlanze iinyawo zabo eengazini zeenkhohlakali.

₁₂Abantu bazakuthi:

“Ngambala kukhona umvuzo wabalungileko,

iye, ukhona uZimu ogwebako ephasini.”