AMARHUBO 62

₂Umphefumulwami uzithulele kuZimu kwaphela;

isindiswami ivela kuye.

₃Nguye yedwa olidwala nesindiswami,

iye, isiphephelo sami,

angeze ngasikinywa linengi.

₄Kuzabe kube nini nidumela umuntu

kobana nimhlanganyele nimbulale,

khisibe unjengeboda eliwako

nomthangala obhurukako?

₅Baneqhinga lokumketula

esihlalweni sakhe esiphakemeko

benamela ikohliso:

ngemilomabo bayabusisa,

kodwana ngeenhliziyo bayathuwelelisa.

₆Mphefumulwami, ziphumulele kuZimu kwaphela

ngombana ithemba lami livela kuye.

₇Nguye yedwa olidwala nesindiswami,

iye, isiphephelo sami,

angeze nganyakaziswa.

₈KukuZimu ukusindiswa nokwaziwa kwami;

idwala lobuphephelo nerholo lami nguZimu.

₉Thembelani kuye ngeenkhathi zoke nina bantu,

thululani iinhliziyo zenu phambi kwakhe;

uZimu usiphephelo sethu.

₁₀Abantukazana bamumoya nje,

abantu abaziinkhulu bayikohliso;

esilinganisweni bayakhuphuka,

boke balula kunommoya.

₁₁Ningabeki ithemba ekudlelezeleni,

ningabi nethemba elililize lobugebengu.

Nanyana umnotho wanda,

ningabeki ihliziywenu kiwo.

₁₂UZimu ukhulume kanye,

ngezwa kabili:

Amandla angawakaZimu.

₁₃Kukuwe ukwethembeka, Somandla

ngombana uvuza umuntu ngokwemisebenzakhe.