AMARHUBO 66

Hlokomani kuZimu, noke nina bantu bephasi!

₂Dumisani ukuhlonipheka kwebizo lakhe,

nibabaze idumo lakhe!

₃Yenithi kuZimu:

“Imisebenzakho iyesabeka

ngebanga lamandlakho amakhulu,

izitha zakho zizakutjhotjhobana phambi kwakho.

₄Loke iphasi lizakukhothama kuwe,

lidumise wena,

iye, lidumise ibizo lakho.”

₅Yizani nizokubona izenzo zakaZimu,

kuyesabeka ukwenza kwakhe phakathi kwabantu:

₆Uphendule ilwandle walenza ihlabathi eyomileko,

abantu beyama umlambo ngeenyawo.

Nje-ke asithakaseni kuye,

₇kuye obusa ngeenkhwepha isiphelani,

onamehlo ahlala eluse izizwe.

Ngalokho abakhunyaleleko abangaziphakamisi.

₈Babazani uZimethu nina zizwe,

akuzwakaliswe ilizwi lobukhulu bakhe,

₉yena osilonde hlangana nabaphilako,

akhange avume bona iinyawo zethu zitjhelele.

₁₀Mbala wena Zimu, usizizinyile;

wasihlola njengesiliva nalihlungwako.

₁₁Wasingenisa esifwini,

wasithwesa iinhlupheko.

₁₂Wavumela abantu bakhwela

phezu kweenhloko zethu;

sakhamba emlilweni nemanzini,

kodwana wena wasikhuphela ebukhosini.

₁₃Ngizakungena ethempelini lakho nemihlabelo yokutjhiswa,

ngizalise kuwe iimfungo zami,

₁₄iye, iimfungo engiziphimise ngeembhena zami;

ekuhluphekeni ngathembisa ngomlomami ngathi:

₁₅“Ngizakunikela kuwe imihlabelo yokutjhiswa

yezimvu ezinonisiweko

kanye nomnuko wemihlabelo yamaqama;

godu ngizakunikela ngeenkunzi nangeempongo.”

₁₆Yenize nizokulalela noke nina enesaba uZimu,

ngizonibikela lokho angenzele khona:

₁₇Kuye ngalila ngomlomami

indumiso iselimini lami.

₁₈Ngathana bengisophe okumbi ehliziyweni,

uSomandla ubangeze angizwa.

₁₉Kodwana mbala uZimu ungizwile,

wabeka indlebe emezwini womthandazwami.

₂₀UZimu akadunyiswe

ngombana akhange awale umthandazwami,

namkha asuse ukwethembeka kwakhe kimi.