AMARHUBO 68

₂UZimu uzakusikima,

izitha zakhe zisabalale;

abamzondako babaleke phambi kwakhe.

₃Zimu, baqotjhe njengentuthu nayiphephethwako.

Mbala, njengokuncithika kwamanyephe ahlanu komlilo,

ngokunjalo iinkhohlakali zizakubhubha phambi kwakaZimu.

₄Kodwana abalungileko bazakuthaba

basase phambi kwakaZimu;

bathakase ngokujabula.

₅Rhubelani uZimu, nidumise ibizo lakhe,

hlokomani kiloyo okhwele amafu;

ibizo lakhe nguSomnini, nililizele phambi kwakhe.

₆Unguyise weentandani nomjameli wabahlolokazi,

unguZimu ohlezi endawenakhe ecwengileko.

₇UZimu upha abadududu ikhaya,

arholele iimbotjhwa ekuthakaseni,

kodwana abahlubukileko bahlala ebhudwini.

₈Zimu, nawuphuma ipi phambi kwabantu bakho,

iye, lokha nawukhamba erhalawumbeni leJetjhimoni,

₉iphasi lahlengezela.

Amazulu anisa izulu

phambi kwakaZimu, onguZimu weSinayi,

iye, phambi kwakaZimu, uZimu wakwa-Israyeli.

₁₀Zimu, wawululela izulu phezu kwelifa lakho.

₁₁Umhlambakho wanzinza kilo,

ngokulunga kwakho Zimu,

walilungiselela labo abadududu.

₁₂USomandla ukhupha umyalo;

abafazi abanengi bamemezela iindaba,

₁₃bathi: “Amakhosi ayabaleka!

Amabuthwawo nawo ayabaleka!

₁₄Ngitjho nani eniseembayeni

nifumana amaphiko wezuba atshidzwe ngesiliva,

iye, iinsiba zakhona zinegolide elidarhileko!”

₁₅Lokha oSabekako nahlakaza amakhosi enarheni,

igabhogo likhithikela ngeTsalimoni.

₁₆Wena ntaba enamandla, ntaba yeBhatjhani,

iye, neenqongo zentaba yeBhatjhani,

₁₇ngitjho nina ntaba ezineenqongo ezinengi,

kubayini ninomona naniqala

intaba uZimu ayikhethe

kobana ahlale kiyo na?

USomnini uzakuhlala lapho isiphelani!

₁₈Ngeenkarana ezinamandla,

eziziinkulungwana ngeenkulungwana,

iye, iinkulungwana ebuphaziphazini,

uSomandla uvele eSinayi ngokucwenga.

₁₉Ngemva kobana uthumbe abathunjwa,

wathatha izipho ebantwini,

ngitjho nakilabo abahlubukileko,

wakhuphukela ekuphakameni,

kobana uhlale lapho, wena Somnini, Zimu.

₂₀Akudunyiswe uSomnini,

osisingatha imihla ngemihla,

iye, uZimu oyisindiswethu.

₂₁Mbala, uZimethu unguZimu wesindiso;

ukuphepha ukufa, kukuSomnini uSomandla.

₂₂UZimu uzakuphahlaza iinhloko zezitha zakhe,

iye, ifokotho eneenhluthu

yalabo abaphikelela ekoneni.

₂₃USomandla wathi: “Ngizabehlisa eBatjhani,

ngibenyuse ekuzikeni kwelwandle,

₂₄ukuze nihlanze iinyawo zenu eengazini,

namalimu wezinja zenu afunyane isabelo ezitheni.”

₂₅Zimu, iinqhema zakho ziyabonakala,

nazingena endaweni ecwengileko,

iye, iinqhema zakho Zimami, Kosami.

₂₆Ngaphambili kukhamba abavumi,

phakathi kube matlawu aphethe abosotjherere,

ngemva kube ngababetha iinara,

₂₇bavuma bathi:

“Dumisani uZimu emihlanganweni emikhulu;

nidumise uSomnini emthonjeni ka-Israyeli.”

₂₈Ngemva kwabo uBhenjamini ongomncani,

urhola phambili;

ulandelwa liviyo leenkhulu zakwaJuda

neenkhulu zakwaZebuloni kanye nezakwaNafitali.

₂₉Zimu, bonakalisa amandlakho,

iye, amandla owasikhombisa wona, Zimu,

₃₀usethempelini lakho ngehla kweJerusalema.

Amakhosi kumele alethe iimbiko kuwe.

₃₁Khalimela isibandana emhlangeni,

okuziinkunzikazi ezibhodlela abantu,

inga bamathole.

Gadangela labo abathanda isiliva;

uhlakaze abantu abakarekela ipi.

₃₂Akuze abazenda abasuka eGibhide,

amaKutjhe akarhabe alethe izipho kuZimu.

₃₃Nina mibuso yephasi, rhubelani uZimu,

nidumise uSomandla,

₃₄iye, yena okhwele amafu

emkayini wakade.

Qalani, uzwakalisa ilizwi lakhe,

iye, ilizwi elinamandla.

₃₅Yamukelani amandla kaZimu,

yena obukhosi bakhe buphezu kwaka-Israyeli

namandlakhe asemafini.

₃₆UZimu uyesabeka endawenakhe ecwengileko,

unguZimu wakwa-Israyeli;

upha abantu bakhe amandla nesibindi.

Akadunyiswe uZimu!