AMARHUBO 85

₂Somnini, wabonisa umusa enarhenakho,

wabuyisa itjhudu lakaJakopo.

₃Wacolela amacala wabantu bakho,

wasibekela zoke izono zabo.

₄Wasusa yoke itukuthelwakho,

waphenduka ekuvutheni kwelaka lakho.

₅Nje-ke, Zimu wesindiswethu, buyela kithi godu,

bamba ukusilingeka kwakho phezu kwethu.

₆Uzasithukuthelela isiphelani na?

Kghani, uzakwelula ilaka lakho

kizo zoke iinzukulwana na?

₇Wena awuzukusivuselela godu

ukuze abantu bakho bathabe kuwe na?

₈Sitjengise ukwethembeka kwakho, Somnini,

usiphe isindiswakho.

₉Ngifuna ukuzwa lokho uZimu uSomnini azakutjho

ngombana uzakukhuluma ukuthula ebantwini,

iye, kwabathembekileko bakhe.

Bangabuyeli ebudlhayeleni!

₁₀Ngambala isindiswakhe iseduze kwabamesabako:

Iphazimulwakhe izakuhlala enarhenethu,

₁₁ukwethembeka neqiniso kuhlangabezane,

ukulunga nokuthula kwangane.

₁₂Kuzakuhluma iqiniso ehlabathini,

ukulunga komkayi kwengamele iphasi.

₁₃Godu uSomnini uzasipha okuhle,

inarhethu ithele iinthelo zayo.

₁₄Ukulunga kuzakukhamba phambi kwakhe,

kwenzele iinyawo zakhe umzila.