AMARHUBO 89

₂Ngizakuvuma ngezenzo zokwethembeka kwakaSomnini

nini nanini.

Somnini, ngomlomami ngizakumemezela ubuqotho bakho

iinzukulwana ngeenzukulwana.

₃Ngambala, ngizakumemezela ngithi:

Ukwethembeka kwakho kunzinze isiphelani,

uqinise ubuqotho bakho emazulwini.

₄Wena wathi:

“Ngenze isivumelwano nokhethiweko wami,

ngafunga encekwinami uDavida ngathi,

₅‘Isizukulwana sakho ngizasiqinisa isiphelani,

nginzinzise isihlalo sakho sobukhosi

iinzukulwana ngeenzukulwana.’ ”

₆Iindalwa zezulu azidumise iimangaliso zakho, Somnini;

iye, ubuqotho bakho ehlanganweni yabacwengileko

₇ngombana hlangana nabaphezulu

ngubani ongalinganiswa noSomnini?

Iye, ngubani ongafaniswa noSomnini

phakathi kwabozinyana?

₈USomnini unguZimu osabekako ebandla labacwengileko;

mkhulu uyababazeka kibo boke abamzombelezileko.

₉Somnini, Zimu Mninimandlawoke,

ngubani onamandla njengawe?

Somnini, ubuqotho bakho bukuzombelezile.

₁₀Wena ulawula ilwandle naliphakamako;

uthulise amadlambalo nakhiphizelako.

₁₁Wena wahlaba uRahabu bewamtshidlha;

wahlakaza izitha zakho ngengalwakho enamandla.

₁₂Amazulu angawakho nephasi ngelakho;

wanzinzisa umhlaba nakho koke okukiwo.

₁₃Wena wadala itlhagu nesewula;

iTabori neRherimoni ziyahlokoma ebizweni lakho.

₁₄Ingalwakho ineenkhwepha,

isandla sakho sinamandla,

isidla sakho siphakamile.

₁₅Ukulunga nobulungiswa

kusisekelo sesihlalo sakho sobukhosi;

ukwethembeka neqiniso kukhamba phambi kwakho.

₁₆Somnini, babusisiwe abantu abazi umkhosi womgidi,

labo abakhamba emkhanyweni wobukhona bakho.

₁₇Ilanga loke bahlokoma ngebizo lakho

begodu baphakamisa ukulunga kwakho.

₁₈Mbala, uyiphazimulo yamandlethu,

ngomusakho idumo lethu liphakamile.

₁₉Umbusi osihlangu sethu, ungowakaSomnini,

iye, ubabethu ungowoCwengileko ka-Israyeli.

₂₀Kothembekileko wakho

wakhe wakhuluma ngombono wathi:

“Ngibeke isihlohlo phezu kwengorho,

ngaphakamisa loyo okhethwe ebantwini.

₂₁Ngifumene incekwami uDavida,

ngamzesa ngamafuthami acwengileko.

₂₂Isandla sami sizakuhlala simsekele

begodu ingalwami izamqinisa.

₂₃Akunasitha esizamhlula

nesikhohlakali angeze samthobisa.

₂₄Ngizakuqova amanabakhe phambi kwakhe,

ngimadlhe phasi labo abamzondileko.

₂₅Ubuqotho nokwethembeka kwami kuzakuba naye;

ngebizo lami idumo lakhe lizakuphakanyiswa.

₂₆Ngizakubeka isandla sakhe phezu kwelwandle

nesidla sakhe phezu kwemilambo.

₂₇Uzangibiza ngokuthi, ‘UnguBaba,

unguZimami, nedwala lesindiswami.’

₂₈Ngizamenza izibulo lami,

iye, ongehla kwamakhosi wephasi.

₂₉Ngizamgcinela ukwethembeka kwami isiphelani,

isivumelwano sami naye sizakuhlala siqinile.

₃₀Ngizakujamisa isizukulwana sakhe nini nanini,

iye, nobukhosi bakhe, ije izulu lisekhona.

₃₁“Nakube abantwabakhe

bahlubuka umthethwami

begodu bangakhambi ngeemfundiso zami,

₃₂nalokha nabalulaza neemiso zami

begodu bangagcini imiyalwami,

₃₃ngizokuphobola ngentonga iimphambeko zabo

namacalabo ngamatshwenyeko.

₃₄Kodwana angekhe ngasusa ukwethembeka kwami kuye

namkha ngiphambukise ubuqotho bami.

₃₅Isivumelwano sami asobe ngasilulaza,

namkha ngijikele ilizwi engilikhulumileko.

₃₆Ngafunga kwaba kanye ngokucwengeka kwami,

angeze ngamkhohlisa uDavida:

₃₇Isizukulwana sakhe sizakujama nini nanini,

isihlalo sakhe sinzinze phambi kwami njengelanga,

₃₈sizakudzimelela isiphelani njengenyezi

ebufakazi obuqinileko esibhakabhakeni.”

₃₉Kodwana wena Zimu,

kwanjesi umlahlile, wamala.

Uvuthe ngelaka lakho kumzeswakho,

₄₀wajikela isivumelwano sakho nencekwakho,

wabhutjhabhutjha isihlohlo sayo ehlabathini.

₄₁Uphundluse yoke imithangalayo,

wenza iimphephelo zayo zaba liququ.

₄₂Boke abadlula ngendlela bayayiphanga;

seyiphenduke isiphoqo sabomakhelwana.

₄₃Uphakamise isidla samanabayo,

wenza zoke izitha zayo zathakasa

₄₄begodu uphendulele ubukhali besabulayo,

iye, epini akhange uyisekele.

₄₅Ususe isithunzi sayo,

waradlha phasi isihlalo sayo sobukhosi.

₄₆Urhunyeze amalanga wobutjha bayo,

wayithela ngeenhloni.

₄₇Kuzabe kube nini Somnini uzifihla?

Ilaka lakho livutha njengomlilo isiphelani na?

₄₈Khumbula bona ukuphila kwami kungangani:

Boke abantu owabadalako imihla yabo mifitjhani.

₄₉Ngubani ongaphila angasaboni ukufa?

Ngubani ongasinda emandleni wethuna na?

₅₀Somandla, kuphi ukwethembeka kwakho kwakade

owafunga ngakho ngobuqotho bakho kuDavida na?

₅₁Somandla, khumbula isiphoqo seenceku zakho

engisethwele ngaphakathi kwami;

khumbula zoke izizwekazi ₅₂eziphoqakwezi,

iye, Somnini, izitha zakho eziphoqa

amabhadu wozesiweko wakho.

₅₃Akadunyiswe uSomnini nini nanini!

Amen, iye, Amen.