ISAMBULO 9

₁Ingilozi yesihlanu yavuthela iporompita, ngabona ikwekwezi ebeyikhithike ezulwini yawela ephasini; yona-ke yanikelwa isihluthulelo somgodi onganamkhawulo. ₂Yavula umgodi onganamkhawulo kwaphuma intuthu ngesiwulwini kwanga intuthu yekehla yomlilo; ilanga nesibanga kwafiphala ngebanga lentuthu ephuma ngesiwulwini. ₃Hlangana nentuthu kwavela isikhonyani sehlela ephasini, sona saphiwa igunya bona sibe namandla njengeempephenu zephasi. ₄Sakhalinywa bona singarhayili utjani bephasi nanyana yini ehlaza, iye, nanyana ngiwuphi umuthi, kwaphela abantu labo abanganaphawu lakaZimu eempandla zabo. ₅Savunyelwa bona sibazwise ubuhlungu iinyanga ezihlanu kodwana singababulali. Ubuhlungu esabazwisa bona, bebufana nobuhlungu bepephenu lokha nayitinyela umuntu. ₆Ngemihla leyo abantu bayokwenyula ukufa kodwana ukufa angekhe kubafikele; iye, bazokuthanda bonyana bafe kodwana ukufa kuzobabalekela.

₇Godu isikhwenyani saqaleka njengeenjomani ezilungiselwe ipi. Eenhloko zaso besinalokho okufana neenhlohlo zegolide; ubuso baso bebufana nobabantu, ₈iinhluthu zaso zifana nezabafazi, kuthi amazinyo waso afane newamabhubezi. ₉Besineemvikelo zesifuba ezinjengeemviko zesimbi; itjhada leempiko zaso belifana netjhada leenkarana ezinengi ezibotjhelwe iinjomani ezigijimela epini. ₁₀Besinemisila etinyela njengeempephenu; begodu imisila leyo inamandla wokulimaza abantu iinyanga ezihlanu. ₁₁Sinekosi yaso ekuyingilozi yomgodi onganamkhawulo; ibizo layo ngesiHebheru ngu-Abadoni, ngesiGirigi kuthiwa ngu-Apholiyoni.

₁₂Umaye wokuthoma udlulile. Nje-ke abomaye ababili basazokuza.

₁₃Ingilozi yesithandathu yavuthela ipalapala, ngezwa ilizwi livela eempondweni ezine ze-aldari legolide phambi kwakaZimu, ₁₄lathi engilozini yesithandathu ebeyiphethe iporompita: “Akhe utjhaphulule iingilozi ezine ezikhungeke emlanjeni omkhulu iYufrathe!” ₁₅Ngokunjalo-ke, zatjhatjhululwa iingilozi ezine ebegade sele zilungiselelwe i-awara, ilanga, inyanga nomnyaka kobana zibhubhise okwesithathu kwabantu. ₁₆Isibalo samabutho akhwele iinjomani besiziingidi ezimakhulu amabili; ngokunjalo ngezwa isibalo sawo.

₁₇Nje-ke nasi indlela engabona ngayo iinjomani embonweni wami: Abakhweli bazo bebafake iimvikelo zeemfuba zombala onjengomlilo, umbala ohlaza njengesibhakabhaka nezimthubi. Iinhloko zeenjomani bezifana neenhloko zamabhubezi; emilonyeni yazo kwaphuma umlilo, intuthu nesibabuli. ₁₈Ngeenhluphekwezo kwabhujiswa isithathu sabantu, okutjho ngomlilo, ngentuthu nangesibabuli okwaphuma emlonyeni weenjomani. ₁₉Amandla weenjomanezo gade asemilonyeni nemisileni yazo ngombana imisila yazo leyo beyinjengeenyoka, ineenhloko ekungizo eziyingozi yokulimaza.

₂₀Inengi labantu elingazange libulawe ngeenhluphekwezi, akhange liphenduke emisebenzini yalo eliyenzako namkha lilise ukulotjha amadimoni neenthombembunjwa zegolide, zesiliva, zekoporo, zelitje nekhuni ezingakwazi ukubona, ukuzwa namkha ukukhamba. ₂₁Begodu azange baphenduke ekubulaleni, ebuloyini, ekungwadleni nekwebeni kwabo.