KWEBEROMA 14

₁Yamukelani loyo onokukholwa okutekatekako ngaphandle kokumgweba ngokunande niphikisana naye. ₂Ukukholwa komuntu omunye kumvumela bona agome nanyana yini, kodwana omunye onokukholwa okutekatekako uzigomela imirorho kwaphela. ₃Umuntu ogoma koke akangamqaleli phasi loyo okhethako. Naloyo ongagomi koke angamgwebi loyo osogoma yoke into ngombana naye uZimu umamukele. ₄Ungubani-ke wena bona ungazokugweba inceku yomunye umuntu na? Ukujama nokuwa kwayo kukumniniyo. Izakujama ngombana iKosi inamandla wokuyenza bona ijame.

₅Omunye umuntu uthi ilanga elinye liqakathekile kunelinye, omunye uthi woke amalanga ayafana. Ngiloyo naloyo akazanelise ehliziywenakhe. ₆Loyo onelanga alihloniphako, ulihloniphela ukudumisa iKosi. Naloyo ogoma inyama, uyigomela iKosi ngombana uthokoza uZimu. Naloyo ongagomiko, lokho ukwenzela iKosi begodu uthokoza uZimu. ₇Akakho noyedwa wethu oziphilelako, kanti-ke godu akakho noyedwa ozifelako ₈ngombana nasiphilako, siphilela iKosi nalokha nasifako sifela iKosi. Nje-ke nanyana siyaphila namkha siyafa, singebeKosi. ₉Ngesizathweso uKrestu wafa, wabuye waphila godu ukuze abe yiKosi yabafileko nabaphilako. ₁₀Alo, umgwebelani-ke umfowenu na? Namkha kubayini uqalela umfowenu phasi na? Soke nje sizokujama phambi kwesihlalo sokugweba sakaZimu ₁₁ngombana kutloliwe kwathiwa:

₁₃Nje-ke asiliseni ukugwebana, kodwana endaweni yalokho tjhugululani imikhumbulwenu, ningabeki isiqabo namkha isisitho endleleni yomfowenu. ₁₄Ngiyazi begodu ngikholisekile eKosini uJesu bonyana akunanto esilaphele ngokwayo, kodwana iba ngesilapheleko kiloyo ocabanga bonyana isilaphele. ₁₅Nakube umzalwana wakho ukhubekiswa ngilokho okugomako, khona-ke awusakhambi ethandweni. Ungavumeli bona lokho okugomako kubhubhise loyo amfelako uKrestu. ₁₆Yeke ukulunga kwakho akungathathwa njengobumbi ₁₇ngombana umbuso kaZimu awusi kugoma nokusela, kodwana kulunga, kuthula nokuthokoza kuMoya oCwengileko. ₁₈Nje-ke loyo olotjha uKrestu, wamukelekile kuZimu begodu nabantu bayamvuma.

₁₉Ngalokho-ke asirhulupheleni lokho okuletha ukuthula nokwakhana. ₂₀Ungatjhabalalisi umsebenzi kaZimu ngebanga lokudla. Iye, ije koke ukudla kuhlwengile, kodwana akukalungi kobana wena uwise abanye ngalokho okugomako. ₂₁Kuhle ukuzigoba ungagomi inyama, ungaseli iwayini namkha ungenzi nanyana yini ezokubangela bona umzalwana wakho akhubeke. ₂₂Ukukholwa onakho akube yindabakho noZimu. Babusisiwe labo abanganasizathu sokuzilahla ngebanga lalokho abakubona kukuhle. ₂₃Kodwana labo abazazako bayalahlwa nakube bayagoma ngombana nabenza njalo bakhombisa ukungakhambi ngokukholwa. Nanyana yini engaveli ekukholweni isisono.